साठ टक्के शालेय विद्यार्थ्यांमध्ये हिमोग्लोबिनची कमतरता असल्याची बाब पुढे आली आहे. नाशिक एज्युकेशन सोसायटीने (नाएसो) जवळपास २० हजार विद्यार्थ्यांच्या केलेल्या आरोग्य तपासणीचा हा निष्कर्ष असून, योग्य आहाराअभावीच हिमोग्लोबिनचे प्रमाण कमी राहत असल्याचे तज्ज्ञांनी सांगितले आहे.
शालेय विद्यार्थ्यांची आरोग्य तपासणी करण्याचा निर्णय नाएसोने घेतला. त्यानुसार संस्थेच्या शहरातील सर्व शाळांमधील जवळपास २० हजार विद्यार्थ्यांची आरोग्य तपासणी करण्यात आली आहे. या तपासणीचा अहवाल मात्र काहीसा चिंताजनक आहे. तब्बल ६० टक्के विद्यार्थ्यांमध्ये हिमोग्लोबिनचे (लोह) प्रमाण कमी असल्याचे त्यात आढळून आले आहे. हिमोग्लोबिनचे प्रमाण प्रति १०० ग्रॅम मध्ये किती टक्के आहे याची तपासणी करण्यात आली. सर्वसाधारणपणे १२ टक्के हे प्रमाण असणे आवश्यक असल्याचे तज्ज्ञांचे मत आहे. मात्र, ५० टक्के विद्यार्थ्यांमध्ये हिमोग्लोबिनचे प्रमाण मध्यम (८ ते ११ टक्के), २५ टक्के विद्यार्थ्यांमध्ये सौम्य (११ ते १२ टक्के) तर ५ टक्के विद्यार्थ्यांमध्ये तीव्र (८ टक्क्यांपेक्षा कमी) आढळून आले आहे. यास प्रामुख्याने आहार कारणीभूत असल्याचे डॉक्टरांचे म्हणणे आहे.
या सर्व बाबींची दखल घेऊन विद्यार्थी व पालकांमध्ये जागरुकता आणण्याचा निर्णय संस्थेने घेतल्याची माहिती अध्यक्ष सूर्यकांत रहाळकर यांनी दिली आहे. दरम्यान, नाशिक जिल्हा परिषदेनेही जिल्ह्यातील विद्यार्थ्यांची आरोग्य तपासणी केली असता त्यात हिमोग्लोबिनचे प्रमाण कमी असल्याची आढळून आले होते. तर, संपूर्ण राज्यातच अशी परिस्थिती असल्याचे डॉक्टरांचे म्हणणे आहे.
जंक फूडच कारणीभूत
विद्यार्थ्यांना जंक फूड मोठ्या प्रमाणात आवडते. त्यामुळे विद्यार्थी योग्य आहाराऐवजी जंक फूडला पसंती देतात. शिवाय हिरव्या पालेभाज्या किंवा भाजी-पोळी खाण्यासही टाळाटाळ करतात. पाल्य नाराज होऊ नये यासाठी पालकही जंक फूड देतात, असे आहार तज्ज्ञांचे निरीक्षण आहे. तर काही विद्यार्थ्यांना योग्य आहारच उपलब्ध होत नसल्याचे सांगितले जात आहे. हिरव्या भाज्या, पालक, केळी, संत्री यांचा आहारात समावेश असेल तर हिमोग्लोबिन वाढण्यास मदत होते, असे आहार तज्ज्ञांनी सांगितले आहे.
विद्यार्थ्यांचे आरोग्य उत्तम रहावे यासाठीच आम्ही आरोग्य तपासणीचा निर्णय घेतला. ६० टक्के विद्यार्थ्यांमध्ये हिमोग्लोबिनचे प्रमाण कमी आढळल्याचे निष्कर्ष आले आहेत. यासंदर्भात पालक व विद्यार्थ्यांमध्ये जागरुकता निर्माण करीत आहोत.
- प्रा. सूर्यकांत रहाळकर, अध्यक्ष नाएसो
पालकांनी मुलांच्या आहाराची योग्य ती काळजी घेणे आवश्यक आहे. जंक फुड विद्यार्थ्यांना आवडत असले तरी त्याचा आरोग्यावर विपरीत परिणाम होतो, हे लक्षात घ्यायला हवे.
- डॉ. विकास देवकर
मोबाइल अॅप डाउनलोड करा आणि राहा अपडेट
