मुसळधार पावसामुळे दळणवळण, वीजपुरवठा, वैद्यकीय सेवा ठप्प
म. टा. वृत्तसेवा, घोटी
इगतपुरी तालुक्यात रविवार रात्रीपासून सुरू असलेल्या संततधार पावसामुळे जनजीवन विस्कळीत झाले आहे. दारणा नदीपात्रात अचानक वाढ झाल्याने घोटी-काळुस्ते मार्गावरील पर्यायी मार्गावरील रस्ता वाहून गेल्याने वाहतूक खंडित झाली. यामुळे काळुस्ते-कांचनगावसह चौदा गाव, वाड्यापाड्यांचा तालुक्यासह घोटी शहराशी संपर्क तुटला आहे.
इगतपुरी तालुक्यात रविवार रात्रीपासून जोरदार पाऊस सुरू असल्याने दारणा नदीपात्रात मोठ्या प्रमाणात पाणी वाढले. दारणा, भाम, वाकी नद्या मोठ्या प्रमाणात प्रवाहित झाल्या आहेत. दारणा नदीवरील घोटी-काळुस्ते मार्गावर गेल्या वर्षभरापासून पुलाचे काम सुरू असल्याने वाहतुकीसाठी तूर्त या मार्गावर भराव टाकून पर्यायी रस्त्यावरून वाहतूक सुरू होती. जोरदार पावसामुळे व नदीच्या प्रवाहामुळे पहिल्याच पावसात हा रस्ता वाहून गेल्याने काळुस्ते-कांचनगावसह एकूण चौदा गावांची वाहतूक व्यवस्था अचानक कोलमडली. आता या परिसरातील चौदा गावे वाड्यापाड्यातील नागरिकांचा घोटीशी व तालुक्याशी पूर्णतः संपर्क तुटला आहे. वैद्यकीय सेवा, वीजपुरवठा, वाहतूक या सेवा ठप्प झाल्या आहेत.
या परिसरातील काळुस्ते, कांचनगाव, भरवच, निरपन, तळोघ, शेनवड, खडकवाडी, औचितवाडी, जुनवनेवाडी आदी चौदा गावे वाड्यापाड्यातील नागरिकांचा घोटी व इगतपुरी तालुक्याशी संपर्क तुटला आहे. यामुळे नागरिकांना आता अनेक समस्याना सामोरे जावे लागत आहे. इगतपुरी तालुक्यात सकाळी आठ वाजेपर्यंत चोवीस तासात पावसाने जवळपास एका दिवसात शतक गाठले आहे. अर्थात ४८ मिलीमीटर पावसाची नोंद झाली आहे. या संततधार व मुसळधार पावसामुळे तालुक्यातील दारणा, वाकी, भावली, भाम या नद्या जोर धरून वाहत आहे. त्यामुळे काही बंधारे व तलावांमध्ये काहीसा साठा तयार झाल्याने शेतकरी वर्गात समाधान व्यक्त होत आहे. या
पावसाने संपूर्ण तालुका पिंजून काढल्यामुळे शेतीच्या कामांना वेग येणार आहे.
पंचायत समितीचे उपसभापती पांडूरंग वारुंगसे, माजी जि. प. सदस्य जनार्दन माळी, तहसीलदार संघमित्रा बाविस्कर, माजी आमदार काशीनाथ मेंगाळ, मनसे तालुकाप्रमुख भगीरथ मराडे, पंचायत समिती सदस्य रमेश जाधव, कृउबा संचालक सुनील जाधव, माजी सभापती रामदास घारे, कांचनगाव उपसरपंच रामदास गव्हाने आदींनी घटनास्थळी भेट देऊन परिस्थितीचा अहवाल घेतला. या भागातील नागरिकांसाठी तत्काळ पर्यायी मार्गाची व्यवस्था करावी, अशी मागणी केली.आश्चर्याची बाब म्हणजे काही शाळकरी मुलांनी नव्या पुलाच्या अर्धवट भागाला लाकडी शिडी बांधून तात्पुरती येण्या जाण्याची वाट सुखकर केली.
उन्हाळ्याच्या कालावधीतच ठेकेदाराने काम गतीने केले असते तर आज हा प्रसंग निर्माण झाला नसता. या घटनेला व प्रसंगाला ठेकेदार हेच सर्वस्वी जबाबदार आहेत. - पांडूरंग वारुंगसे, उपसभापती, पंचायत समिती
पावसामुळे जवळपास चौदा गावांचा संपर्क तुटला आहे. शिक्षण, आरोग्य, दळणवळण, वीजपुरवठा आदी समस्या निर्माण झाल्या आहेत. यामुळे प्रशासन व लोकप्रतिनिधींनी तत्काळ खैरगाव मार्गे असणारा पर्यायी मार्ग मजबूत करून वाहतूक सुरळीत करावी. - भगीरथ मराडे, मनसे तालुकाप्रमुख
मोबाइल अॅप डाउनलोड करा आणि राहा अपडेट
