मोबाइल अॅप डाउनलोड करा आणि राहा अपडेट
म. टा. प्रतिनिधी, नाशिक नेटबँकिंगसाठी वापरला जाणाऱ्या रजिस्टर मोबाइल क्रमांकाचा वापर करीत एका हॅकरने राका कॉलनीत राहणाऱ्या व्यावसायिकाच्या बँक खात्यातील ६५ लाख १० रुपयांवर डल्ला मारला आहे. सरकारवाडा पोलिसांनी आयटी अॅक्ट नुसार गुन्हा दाखल केला असून, पोलिसांचे दोन पथक या चोरीच्या गुन्ह्याची उकल करण्यात गुंतले आहेत. राका कॉलनीतील पूनम अपार्टमेंटमध्ये राहणाऱ्या दिनेश प्रकाश बदलानी (३७) यांच्या बँक खात्यात तांत्रिक हेरफार करीत संशयितांनी ६५ लाख १० हजार रुपये काढून घेतले. नेटबँकिंगसाठी रजिस्टर मोबाईल नंबरचा वापर केला जातो. बदलानी यांनीही ९३७३९०११९१ हा मोबाइल नंबर बँकेकडे रजिस्टर केला होता. आरोपींनी हाच नंबर सुरुवातीस बंद करून तोच नंबर पुन्हा मिळवला. या मोबाइल नंबरच्या मदतीने चोरट्यांनी पासवर्ड व इतर माहिती हॅक करण्यास सुरूवात केली. चोरट्यांनी आयसीआयसीआय बँक सांताक्रुझ, मुंबई, विजया बँक मुंबई, तसेच एचडीएफसी बँक गोमतीनगर, उत्तरप्रदेश या बँकांचे पासवर्ड एकएक करीत हॅक केले. पासवर्ड हॅक केल्यानतंर चोट्यांनी बदलानी यांच्या खात्यातील ६५ लाख १० हजार रूपये वरील तीन खात्यात वर्ग केले. दरम्यान, बदलानी यांनी बँकेचे व्यवहार तपासले असता मोठी रक्कम इतर खात्यात वर्ग झाल्याचे निर्दशनास आले. त्यांनी तत्काळ ही माहिती बँक ऑफ इंडियाच्या व्यवस्थापनाला कळवली. हा चोरीचा प्रकार असावा, याची जाणिव झालेल्या बँकेच्या अधिकाऱ्यांनी बदलानी यांना तत्काळ पोलिसांत जाण्याचा सल्ला दिला. खाते हॅक करून एवढ्या मोठ्या प्रमाणात रक्कम लंपास होण्याची ही पहिलीच घटना शहरात घडली आहे.
