ओझर विमानतळाच्या ठिकाणी असलेल्या अत्याधुनिक पॅसेंजर टर्मिनलच्या देखभालीसाठी दिग्गज कंपन्यांनी तयारी दर्शविली आहे. त्यामुळेच ख्यातनाम कंपन्यांनी सोमवारच्या बैठकीला हजेरी लावली आहे. त्यामुळे नाशिकच्या विमानसेवेला त्याचा अधिक फायदा होणार आहे.
येत्या फेब्रुवारीत एअर इंडियाची उपकंपनी असलेल्या अलायन्स एअरची विमानसेवा सुरु होणार आहे. याची दखल घेत हिन्दुस्थान एअरोनॉटिक्स लिमिटेडने (एचएएल) टर्मिनलचा सांभाळ करण्यासाठीचे टेंडर काढले आहे. या टेंडरला दिग्गज कंपन्यांनी प्रतिसाद दिला आहे. राजधानी नवी दिल्ली येथील इंदिरा गांधी आंतरराष्ट्रीय विमानतळाच्या ठिकाणी असलेल्या टर्मिनलचा सांभाळ जीएमआर ही कंपनी सध्या करीत आहेत. तर, मुंबई येथील छत्रपती शिवाजी आंतरराष्ट्रीय विमानतळाचे अत्याधुनिक टर्मिनलचा सांभाळ जीव्हीके ही कंपनी करीत आहे. या दोन्ही कंपन्यांनी ओझर येथील टर्मिनलच्या देखभालीसाठी इच्छा प्रदर्शित केली आहे. त्यामुळेच या दोन्ही कंपन्यांचे अधिकारी ओझर टर्मिनलमध्ये सोमवारी झालेल्या बैठकीला हजर होते. त्याशिवाय रिलायन्स आणि सोव्हिका समुह यांच्या अधिकाऱ्यांनीही उपस्थित लावली आहे. त्यामुळे यापैकी कुठल्याही कंपनीला देखभालीचे कंत्राट मिळाले तर त्याचा फायदा ओझरच्या विमानसेवेलाच होणार आहे. येत्या जानेवारीपर्यंत एचएएलकडून टेंडरची प्रक्रिया पूर्ण केली जाणार आहे. त्यामुळे जानेवारीपासूनच टेंडरमध्ये निवड होणाऱ्या कंपनीकडे टर्मिनलचा ताबा दिला जाणार आहे. दरम्यान, येत्या फेब्रुवारीत सेवा सुरु करण्यात येणार असल्याने त्या पार्श्वभूमीवर एअर इंडियाच्या अधिकाऱ्यांनी सोमवारी ओझर विमानतळाला भेट दिली आहे.
मोबाइल अॅप डाउनलोड करा आणि राहा अपडेट