शहर व परिसरात नववर्षाच्या स्वागताचे सेलिब्रेशन सुरू असतानाच, गुरुवारी मध्यरात्रीच्या सुमारास सिडकोतील उत्तमनगर परिसरात तीन मोटारसायकल्सची जाळपोळ करण्यात आली. नववर्षाच्या पार्श्वभूमीवर दहशत पसरविण्याचा हा प्रकार असल्याचा कयास सुरुवातीला लावला जात होता. मात्र, प्रत्यक्षात जुन्या भांडणातून वाहने जाळण्यात आल्याचा दावा पोलिसांनी केला आहे. अंबड पोलिसांनी चार संशयितांना अटक केली आहे. शहरात व विशेषकरून अंबड व सिडको भागात यापूर्वीही अशा पद्धतीने समाजकंटकांनी मोटारसायकल जळीतकांड घडवून आणलेले आहे. त्यामुळे घडल्या प्रकाराने नागरिकांमध्ये प्रचंड दहशतीचे वातावरण आहे.
उत्तमनगरमधील बंदावणे नगरमध्ये रमेश दळवी यांचे रो हाऊस आहे. घराच्या आवारात लावलेल्या त्यांच्या तीन दुचाकी काही लोकांनी पेटवून दिल्या. नागरिकांनी पाणी टाकून त्या विझविण्याचा प्रयत्न केला. परंतु, तोपर्यंत उशिर झाला होता. गाड्या जळून खाक झाल्या होत्या. या प्रकरणी दळवी यांच्या फिर्यादीनंतर पंकज सोनवणे, विजय पाटील, राहूल गोतीसे व अजय काचे यांना पोलिसांनी ताब्यात घेतले आहे. चार महिन्यांपूर्वी झालेल्या वादातून दळवी यांच्या वाहनांची जाळपोळ करण्यात आल्याचे पोलिसांचे म्हणणे आहे.अंबड पोलिस स्थानकात गुन्हा दाखल करण्यात आला असून, संशयितांची कसून चौकशी केली जात असल्याचा दावाही पोलिस सूत्रांनी केला आहे.
बंदावणे मळे परिसरात पहिल्यांदाच घडलेल्या घटनेमुळे रहिवाशांमध्ये भीतीचे वातावरण आहे. अंबड पोलिसांनी परिसरात गस्त वाढवावी अशी मागणी रहिवाशी करीत आहेत. रहिवाशांनीही देखील चुकीची अथवा संशयित व्यक्ती आढळल्यास तत्काळ पोलिसांना कळवावे, असे आवाहन पोलिसांकडून करण्यात आले आहे.
मोबाइल अॅप डाउनलोड करा आणि राहा अपडेट
