राष्ट्रध्वजाचा अवमान करण्याचा प्रयत्न झाल्याचे आढळल्यास राष्ट्रीय अवमान प्रतिबंधक कायदा १९७१ कलम २ नुसार कारवाई करण्यात येते. राष्ट्रीय कार्यक्रमांच्या वेळी तसेच विशेष कला-क्रीडाप्रसंगी प्लास्टिकचे राष्ट्रध्वज इतरत्र दिसतात. केंद्र सरकारच्या गृह मंत्रालयाने राष्ट्रध्वजासाठी प्लास्टिकच्या वापरास मान्यता दिलेली नाही. त्यामुळे गृह मंत्रालयाच्या वतीने देण्यात आलेल्या आदेशानुसार आदेशाचा भंग करणारी व्यक्ती शिक्षेस पात्र राहील, असा इशारा पोलिसांच्या वतीने देण्यात आला आहे.
सामाजिक संस्थांच्या वतीनेही आवाहन प्लास्टिकचे राष्ट्रध्वज वाहनांवर लावताना किंवा राष्ट्रप्रेमाचे प्रतिक म्हणून जवळ बाळगण्यामागची नागरिकांची भूमिका योग्य असली तरीही नंतर मात्र या ध्वजांची हेळसांड होते. याबाबत शहरातील विविध सामाजिक संस्थांच्या वतीनेही प्रबोधन करण्यात येत आहे. या प्रकारच्या ध्वजांचा उपयोग टाळावा, असे आवाहन विविध शाळा, कॉलेजेस आणि सार्वजनिक ठिकाणी सामाजिक संस्थांच्या वतीने करण्यात आले. दिवसभरात या प्रकारे प्लास्टिकचे ध्वज नजरेस पडल्यास सोशल माध्यमांद्वारे किंवा थेट पोलिसांशी संपर्क साधावा, असेही आवाहन करण्यात आले आहे.
प्रजासत्ताक दिन किंवा स्वातंत्र्यदिनासारख्या औचित्यांवर प्लास्टिकचे राष्ट्रीय ध्वज विक्रीस येतात. मात्र, अशा ध्वजांच्या वापरात केंद्राच्या गृह मंत्रालयाची मान्यता नाही. आपल्या राष्ट्रध्वजाचा सन्मान जपण्यासाठी नागरिकांनी अशा प्लास्टिक राष्ट्रध्वजाचा वापर टाळावा; अन्यथा पोलिसांच्या वतीने दोषींवर व विक्रेत्यांवर कठोर कारवाई केली जाईल. - अविनाश बारगळ, पोलिस उपायुक्त, विशेष शाखा
मोबाइल अॅप डाउनलोड करा आणि राहा अपडेट