देवळाली कॅम्प परिसरात असणाऱ्या विविध बँकांच्या एटीएम सेंटर्सची सुरक्षा रामभरोसे असल्याचे चित्र पाहायला मिळत आहे. या एटीएम सेंटर्सवर सुरक्षा रक्षकच नसल्याने इथे काही समस्या निर्माण झाल्यास त्याची जबाबदारी कोण घेईल?, असा प्रश्न नागरिकांमधून उपस्थित होते आहे.
येथील संसरी नाक्यावर असलेले बँक ऑफ इंडियाचे एटीएम, सौभाग्यनगर भागात असलेले युनियन बँकेचे एटीएम तसेच लेव्हीट मार्केट परिसरातील आयसीआय बँकेचे एटीएम यासह विविध बँकांच्या एटीएम सेंटर्सची सुरक्षा सध्या वाऱ्यावर आहे. या ठिकाणी एकही सुरक्षारक्षक नसल्याचे निदर्शनास आले आहे. देवळालीत ग्रामीण भागातून येणारे नागरिक व्यवहारासाठी एटीएमचा वापर करतात. अशा नागरिकांना पैसे काढताना निर्माण होणाऱ्या समस्येसाठी बाहेरील व्यक्तींची मदत घ्यावी लागते. अशा परिस्थितीत कोणी पैसे काढून लुटले तर दाद कोणाकडे मागायची?, असा सवाल हे नागरिक करत आहेत.
देशात अनेक ठिकाणी एटीएम फोडण्याचे प्रकार घडले आहेत. देवळालीमध्ये असा एखादा अनुचित प्रकार घडल्यास त्याला जबाबदार कोण?, असा प्रश्नही नागरिक विचारत आहेत. संबधित बँक शाखांना एटीएम सेंटर्सवर सुरक्षा रक्षक नेमण्याचे आदेश पोलिसांनी दिले असूनही त्याची कार्यवाही होत नसल्याचे
दिसत आहे. त्यामुळे बँकांचे देवळाली कॅम्प भागातील एटीएम सेंटर्सच्या सुरक्षेकडे दुर्लक्ष असल्याचे निदर्शनास आले आहे. या प्रकारामुळे ज्येष्ठांची फसवणूक तसेच चोरीच्या घटना होण्याबद्दलची भीती नागरिकांमधून व्यक्त केली जात आहे.
सीसीटीव्ही कॅमेऱ्यांवर सुरक्षेची मदार
अनेक बँकांच्या एटीएम सेंटर्सवर सुरक्षा रक्षकाऐवजी सीसीटीव्ही कॅमेरा कार्यरत आहे. सुरक्षेसाठी केवळ एवढा उपाय पुरेसा नसून सुरक्षा रक्षक असणे अनिवार्य आहे. तंत्रज्ञानाचा उपयोग चोर शोधण्यासाठी किंवा गैरप्रकारांना आळा घालण्यासाठी होत असला तरी त्याच्या पळवाटाही अनेक असल्याने एवढ्यावर विसंबून राहणे धोकादायक असल्याचे या भागातील नागरिकांचे मत आहे. त्यामुळे बँकांनी तातडीने या सुरक्षेबाबात दक्षता घ्यावी असे नागरिकांचे मत आहे.
'संबधित बँक शाखांना एटीएम सेंटर्सकरीता सुरक्षा रक्षक नेमण्याबाबत पूर्वीच सूचित करण्यात आले आहे. त्यांनी या सूचनांचे पालन करुन नागरिकांसाठी ही सुविधा पुरवायला हवी.'
राजेश आखाडे,
वरिष्ठ पोलिस निरीक्षक
'दिवसभरात अनेकजण येथील एटीएमचा वापर करत असतात. पण सुरक्षा रक्षक नसल्याने इथे पैसे काढण्याचा धोका कायम आहे. अनेकदा काही अडचण आल्यास कोणाला विचारायचे असा प्रश्नही पडतो.'
कमल धामेजा,
व्यावसायिक
मोबाइल अॅप डाउनलोड करा आणि राहा अपडेट
