नाशिक सायकलिस्ट फाउंडेशन, नाशिक सिटी पोलिस, ग्रॅव्हिटी जीम आणि एस. एस. के सॉलिटेअर यांच्या संयुक्त विद्यमाने 'जागतिक महिला दिनाच्या निमित्ताने' 'सेलिब्रेटिंग वूमन' या थीम अंतर्गत महिलांच्या सायकल रॅलीचे आयोजन करण्यात आले. या रॅलीत नाशिकच्या महिला पोलिसांसोबतच समाजातील सर्व स्तरांवरील डॉक्टर्स, वकील, विद्यार्थिनी अशा दोनशेहून अधिक महिला मोठ्या संख्येने सहभागी झाल्या होत्या.
महिलांप्रती आदरभाव व्यक्त करणे आणि महिला दिवस शहरातील सर्व महिलांसोबत अनोख्या पद्धतीने सेलिब्रेट करण्यासाठी नाशिक सायकलिस्ट फाउंडेशनतर्फे या वूमन सायकल रॅलीचे आयोजन करण्यात आले होते. सकाळी ७ वाजता उत्साहपूर्ण वातावरणात गोल्फ क्लब मैदानातून महिला पोलिस उपायुक्त एन. अंबिका, सायकलपटू डॉ. महाजन बंधू यांच्या मातोश्री देविका महाजन, ऑलम्पिक शुटिंग कोच मोनाली गोऱ्हे, नॅशनल शुटर श्रद्धा नलामवर, मिस इंटरनॅशनल नमिता कोहक यांच्या हस्ते रॅलीला झेंडा दाखवून सुरुवात करण्यात आली. गोल्फ क्लब ग्राउंड मार्गे टिळकवाडी, कॅनडा कॉर्नर, कॉलेज रोड, सायकल सर्कल, त्र्यंबकरोड, मायको सर्कल मार्गे, चांडक सर्कल, एस. एस. के सॉलिटेअर (तिडके कॉलनी) पर्यंत या रॅलीचे आयोजन करण्यात आले होते.
यावेळी नाशिक सायकलिस्ट फाउंडेशनचे अध्यक्ष जसपाल सिंघ बिरदी, एस. एस. के सॉलिटेअरचे शैलेश कुटे, ग्रॅव्हिटी जीमचे प्रमोद परशराम पुरिया, गोपाल जाधव, नाशिक सायकलिस्ट फाउंडेशनचे अध्यक्ष जसपाल सिंघ बिरदी, योगेश शिंदे, श्रीकांत जोशी, सोफिया कपाडिया, मनीषा रौंदळ, मनीषा भामरे, नीता नारंग, स्नेहल देव, अनघा जोशी, मनीषा इंगळे, प्रतिभा आहेर यांसह आदी नाशिक सायकलिस्टचे सदस्य उपस्थित होते.
थिरकण्याचा लुटला आनंद रॅलीनंतर एस. एस. के सॉलिटेअर येथे महिलांनी डी. जे च्या तालावर थिरकण्याचा आनंद लुटला. तसेच, महिला दिनानिमित्त सायकलवर महिलांप्रती संदेश देणाऱ्या फ्लायकार्डची स्पर्धा घेण्यात आली. या स्पर्धेमध्ये प्रथम प्रतिभा चौधरी, द्वितीय डॉ.श्वेता भिडे, तृतीय राखी पारेख यांना ग्रॅव्हिटी जीमतर्फे बक्षिसे देण्यात आली.
मोबाइल अॅप डाउनलोड करा आणि राहा अपडेट
