शहरातील वेगवेगळ्या घरफोड्यांमध्ये चोरट्यांनी सुमारे पावणेदोन लाखांचा ऐवज चोरून नेला. विशेष म्हणजे या तीनही घरफोड्या भरदिवसा करून चोरट्यांनी पोलिसांना आव्हान दिले आहे.
पहिल्या घटनेत राजेश रामकृष्ण ढमाळे (रा. म्हसरुळ टेक, भद्रकाली) यांच्या बंद घराची कडी कोयंडा तोडून चोरट्यांनी ५६ हजार रुपये किमतीचे सोन्याचे दागिने आणि रोकड चोरून नेली. या प्रकरणी भद्रकाली पोलिस स्टेशनमध्ये गुन्हा दाखल केला आहे. दुसरी घटना मंगळवारी (दि.१५) दुपारी दोन ते रात्री दहाच्या सुमारास घडली. चोरट्यांनी ८३ हजार ५०० रुपये किमतीचे सोन्या चांदीचे दागिने, मनगटी घड्याळ आणि शर्ट असा ऐवज चोरून नेला. या प्रकरणी शेख यांनी मुंबई नाका पोलिस स्टेशनमध्ये घरफोडीचा गुन्हा दाखल केला आहे. तिसऱ्या घटनेत हनुमान रतन देशमाणे (रा. चक्रधर स्वामीनगर, पंचवटी) यांच्या घरी सोमवारी (दि.१४) दुपारच्या सुमारास घरफोडी झाली. या घरफोडीत चोरट्यांनी ३९ हजार रुपये किमतीचे दागिने आणि रोकड चोरून नेली. पंचवटी पोलिसांनी घरफोडीचा गुन्हा दाखल केला आहे.
वृध्देचा अपघाती मृत्यू
रस्ता ओलांडणाऱ्या वृद्धेला मोटरसायकलने धडक दिल्याने तिचा मृत्यू झाला. नाशिकरोड येथील जेतवन नगर परिसरात हा अपघात झाला. वेणूबाई विठ्ठल पगारे (वय ७०, रा. जेतवन नगर) असे तिचे नाव आहे. सोमवारी सायंकाळी साडेपाचच्या सुमारास हा अपघात झाला. या धडकेत वेणूबाई यांचा मृत्यू झाला. उपनगर पोलिसांनी मोटरसायकल चालकावर गुन्हा दाखल केला आहे.
बसवर दगडफेक
रिक्षाला साईड का दिली नाही अशी कुरापत काढून एका रिक्षाचालकाने बसचालकास शिवीगाळ करीत बसची काच फोडली. नाशिकरोड परिसरात हा प्रकार घडला. राजेंद्र हरिश्चंद्र शिंदे हे शहर बस चालवत असताना मंगळवारी सायंकाळी साडेसहाच्या सुमारास एमएच १५ ईएन ७१७१ क्रमांकावरील रिक्षाचालकाने त्याची रिक्षा बससमोर आडवी लावली. तसेच रिक्षाला ओव्हरटेक करण्यासाठी जागा का नाही दिली, अशी कुरापत काढून रिक्षाचालकासह त्याच्या दोन साथीदारांना शिवीगाळ केली. रिक्षाचालकाने बसवर दगड मारून काचेचे नुकसान केले. त्यामुळे शिंदे यांनी नाशिकरोड पोलिस ठाण्यात तिघांविरोधात सरकारी कामात अडथला आणल्याची फिर्याद दाखल केली आहे.
दागिने लांबविले
रिक्षातून प्रवास करताना सहप्रवाशाने महिलेकडील दागिने आणि रोकड चोरून नेली. इंदिरानगर परिसरात हा प्रकार घडला. सुरेखा सुनील खलानेकर (रा. इंदिरानगर) मंगळवारी सकाळी आठच्या सुमारास रिक्षातून प्रवास करीत होत्या. इंदिरानगर ते इंदिरानगर सिग्नल दरम्यान संशयित रिक्षाचालक व सहप्रवाशाने खलानेकर यांचे लक्ष नसताना दोन तोळे वजनाचे सोन्याचे मंगळसूत्र आणि १५ हजारांची रोकड चोरली. खलानेकर यांनी इंदिरानगर पोलिस स्टेशनमध्ये फिर्याद दिली आहे.
सचिन गांगुर्डे याच्या पोलिस कोठडीत वाढ
म. टा. प्रतिनिधी, नाशिक
पंचवटीतील टकलेनगर परिसरातील शिक्षिकेच्ये खून प्रकरणातील संशयिताच्या कोठडीत कोर्टाने वाढ केली आहे. त्याला शनिवार (दि.१९) पर्यंत कोठडीत ठेवण्याचे आदेश कोर्टाने दिले आहेत. या खून प्रकरणातील रोकड हस्तगत करण्यात आली असली तरी दागिणे हस्तगत करणे बाकी असल्याचे सांगत पोलिसांनी कोठडीची मागणी केली होती.
सचिन रामदास गांगुर्डे (रा.गणेशवाडी) असे त्या संशयिताचे नाव आहे. भारती पाटील या शिक्षिकेचा गुरुवारी (दि. १०) रात्री खून केल्यानंतर मोलकरणीचा जावई गांगुर्डे याला अटक करण्यात आली होती. त्याने सुमारे साडेचार लाख रुपयांची रोकड पोलिसांच्या स्वाधीन केली.
२४ मोटरसायकलींसह चोरट्याला अटक
म. टा. प्रतिनिधी, सिडको
शहरातील मोटरसायकली चोरणा-या अट्टल चोरास अंबड पोलिसांनी पार्थडी फाटा येथून ताब्यात घेतले आहे. यात गुन्हे शाखेने केलेल्या कारवाईत चोरट्याकडून २४ मोटरसायकली हस्तगत करण्यात आल्या असल्याचे पोलिस उपायुक्त श्रीकांध धिवरे यांनी सांगितले. या चोरट्याने नाशिकरोड, सातपूर, अंबड, गंगापूर तसेच ग्रामीण भागातून मोटरसायकली चोरल्या असल्याचे तपासात पुढे आले आहे.
अंबड पोलिसांच्या गुन्हे शाखेला पार्थडी फाटा शिवारात गोडसे या मोटरसायकल चोरट्याची माहिती मिळाली होती. गुन्हे शाखेचे पोलिस उपनिरीक्षक महेश इंगोले व रवींद्र सहारे यांच्या टिमने कारवाई करीत त्यास ताब्यात घेतले. त्याच्याकडून २४ मोटरसायकली पोलिसांनी जप्त केल्या आहेत. स्पलेंडर, सिबिझेड, होंडा शाईन, पल्सर व अॅक्टिवा या कंपनीची वाहने ताब्यात घेतल्याचे पोलिस उपायुक्त धिवरे यांनी सांगितले. अंबड पोलिस ठाण्याचे वरिष्ठ पोलिस निरीक्षक दिनेश बर्डीकर यांच्या मार्गदर्शनाखाली गुन्हे शाखेच्या टिमने या कारवाईत सहभाग होता.
कारची चोरी
पंचवटी :हिरावाडी परिसरातील विधाते नगरातील उमा दर्शन अपार्टमेंटमधील रहिवाशी हरिषकुमार बाबुभाई पटेल यांचर ह्युंदाई कंपनीची आय ट्वेंटी (एम.एच.१५,सी.टी.-१५१५) गाडी चोरीला गेली आहे. अजून तपास लागला नाही. पंचवटी पोलिसात नोंद करण्यात आली आहे.
मोबाइल अॅप डाउनलोड करा आणि राहा अपडेट