पाणवापर टाळत टिळा होळीला प्राधान्य
म. टा. प्रतिनिधी, नाशिक
दुष्काळाच्या पार्श्वभूमिवर नाशिक परिसरात धुळवडचा जल्लोष तुलनेने यंदा कमी असला तरी विविध रंगांचे टिळे कपाळी लावत नागरिकांनी गुरूवारी आनंद लुटला. पाणी कमी वापराकडे नागरिकांनी कटाक्षाने लक्ष दिले. मात्र, पाही ठिकाणी तरुणाईन रंगाची मनसोक्त उधळण केल्याचेही दिसून आले.
देवळालीला जल्लोष
देवळाली कॅम्प : देवळाली परिसरात हिंदू, जैन, सिंधी समाजाच्या बांधवांसह सर्वधर्मीयांनी एकत्र येत होळी व धुलिवंदन सण पारंपारिक पद्धतीने साजरा केला. होळीला पुरणपोळीचा नैवैद्य दाखवून गोडधोड जेवणासह दुपारनंतर वीरांच्या मिरवणुका काढण्यात आल्या. लामरोड वरील भैरवनाथ मंदिर, गवळी वाड्यातील झुलेलाल मंदिर आदी ठिकाणी वीरांची गर्दी दिसून आली.
सोसायट्यांमध्ये रेनडान्स
यंदाच्या सणांवर दुष्काळाचे सावट असल्याने पाणीटंचाईच्या पार्श्वभूमीवर परिसरातील महिलांनी सामाजिक भान राखत एकमेकांना टीका लावत आनंद लुटला. मात्र, वडगाव रोडवरील काही सोसायट्यांमध्ये रेनडान्ससाठी तरुणाई आग्रही दिसून आली. यासाठी त्यांनी शेकडो लिटर पाण्याची नासाडी केली
भोजपुरी गीतांची मेजवानी
सातपूर : सातपूर आणि अंबड एमआयडीसी परिसरात रोजगारानिमित्त आलेल्या आणि नाशिकमध्ये स्थायिक झालेल्या उत्तर भारतीयांनी कोरडे रंग उधळत आनंद लुटला. यावेळी भोजपुरी गीत भजनांची मेजवानी उपस्थितांना चाखता आली.
होळीच्या दिवशी गोड जेवणाचा नैवैद्य महिला देवाला दाखवितात. तर धुलिवंदनाला उत्तर भारतीयांकडून नॉनव्हेज जेवणावर अधिक भर असतो. धुलिवंदनाला बहुतांश जणांनी कोरडे रंग लावत सण साजरा केला. यात पाणीबचतीचे आवाहन करण्यात आले. सातपूरच्या सोमेश्वर कॉलनी, शिवाजीनगर, श्रमिकनगर, राधाकृष्णनगर, निलकंठेश्वरनगर, सातपूर राजवाडा व अंबडलिंकरोड भागात जल्लोष दिसून आला.
नगरसेवकांचाही सहभाग
सातपूर भागात मोठ्या प्रमाणावर उत्तर भारतीयांचे वास्तव्य असल्याने स्थानिक नगरसेवकांचा धुलिवंदन कार्यक्रमात सहभाग दिसून आला. शिवाजीनगर परिसरात नगरसेवक दिनकर पाटील, सातपूरला प्रकाश लोंढे, सविता काळे, रवी काळे तर अंबड लिंकरोडला नगरसेवक सचिन भोर यांनी ठिकठिकाणच्या कार्यक्रमांना हजेरी लावली.
पर्यावरण संवर्धन
पंचवटी : पंचवटी परिसरात पारंपारीक पद्धतीला फाटा देत साध्या पद्धतीने होळी साजरी करण्यात आली. कोणत्याही प्रकारचे लाकूड न जळता गोवऱ्यांची होळी करण्यात आली. धार्मिक पद्धतीने पूजाविधी करून नैवद्य अर्पण करण्यात आला. पाणीबचत आणि पर्यावरणाचे रक्षण करीन, इकोफ्रेण्डली धुळवड व रंगपंचमी खेळणार अशी ठिकठिकाणी शपथ घेण्यात आली. पर्यावरण रक्षणाचा संदेश देण्यात आला.
कचऱ्याची होळी
कळवण : होळीसाठी मोठ्या प्रमाणात वृक्षतोड केली जाते आणि पर्यावरणाचा ऱ्हास होतो ही बाब लक्षात घेत मानूर (ता. कळवण) येथील शरद पवार पब्लिक स्कूलमध्ये परिसरातील कचरा गोळा करून प्रतिकात्मक होळी करण्यात आली. पर्यावरण रक्षणासाठी शाळेचे संस्थापक डॉ. जे. डी. पवार यांच्या संकल्पनेतून हा अभिनव उपक्रम राबवण्यात आला. होळीसाठी झाडांचे लाकूड न वापरता परिसरातील प्लास्टिक, कागद व वेगवेगळा कचरा गोळा करून त्याची होळी करण्यात आली. विद्यार्थ्यांना स्वच्छतेचे महत्त्व पटवून देण्यात आले. वाढत्या वृक्षतोडीमुळे पर्यावरणाचा ऱ्हास होत असून त्याचे दुष्परिणाम मानवाला भोगावे लागत आहेत. त्यामुळे वृक्षसंवर्धन करण्याचे आवाहन विद्यार्थ्यांना करण्यात आले. यावेळी मीनाक्षी पवार, चेअरमन शैलेश पवार, सचिव अनुप पवार, प्राचार्य एन. बी. शिंदे, मुख्याध्यापक जे. एल. पटेल आदींसह विद्यार्थी उपस्थित होते.
राणेनगर मैदानात कचऱ्याची होळी
नाशिक : राष्ट्रवादी युवक काँग्रेसच्या वतीने राणेनगर मैदान येथे स्वछता करून कचऱ्याची होळी करण्यात आली. पर्यावरण समतोल राखत वृक्षतोड न करता परिसरातील मोठ्या प्रमाणावर साचलेल्या कचरा गोळा करण्यात आला होता. याप्रसंगी पश्चिम विधानसभा अध्यक्ष अमोल नाईक, शहर उपाध्यक्ष मनोज चव्हाण, प्रसिद्धी प्रमुख कुणाल बागडे, पप्पू काळे, राजू दीक्षित, अनिल बोरसे, रिझवान शेख आदी पदाधिकारी उपस्थित होते. परिसरातील नागरिकांनी या उपक्रमाचे स्वागत केले.
गुटख्याची होळी
सातपूर : डॉ. वसंत पवार वाचनालयासमोर जनविकास फाऊंडेशनतर्फे गुटखा, विडी सिगारेट, तंबाखू यांची होळी करण्यात आली. याप्रसंगी व्यसनमुक्तीची देखील उपस्थितांनी शपथ घेतली. याप्रसंगी फाऊंडेशनचे अध्यक्ष बाळासाहेब जाधव, संयज तांबे, राजेंद्र चिखले, विजय पाटील, बाळासाहेब पोरजे, अरुण लांडगे उपस्थित होते.
इकोफ्रेण्डली धुळवड
पंचवटी : तपोवन व परिसरात धुळवड इकोफ्रेंडली साजरी करण्यात आली. विविध राज्यातील समाज बांधवांनी साधे रंग वापरून पाणी अपव्यय टाळण्यात आला. बहारदार गीतांवर तरुणाईसह बच्चे कंपनी मनसोक्त नाचली. मारवाडी युवा मंचचे राजकुमार जेफ, देवकिसन पारीख, राजेश पारीख, रघुनाथ कुमावत, अनिल शर्मा, नारायण सैनी, कैलास सैनी, आदी सहभागी झाले.
कोरड्या रंगाने रंगपंचमीचे आवाहन
नाशिकरोड : जैन सोशल ग्रुप नाशिकरोड देवळालीने यंदाची तीव्र पाणीटंचाई लक्षात घेता कोरड्या रंगाने होळी आणि रंगपंचमी खेळण्याचा निर्णय घेतल्याची माहिती ग्रुपचे अध्यक्ष नितीन कर्नावट आणि अशोक चोरडिया यांनी दिली. ग्रुपची बैठक नुकतीच झाली. त्यावेळी दुष्काळी परिस्थिती लक्षात घेऊन पाण्याचा अपव्यय टाळण्यासाठी कोरड्या रंगाने होळी साजरी करण्याचे आवाहन सदस्यांना करण्यात आले.
मोबाइल अॅप डाउनलोड करा आणि राहा अपडेट