म. टा. प्रतिनिधी, नाशिक
सावरपाडा एक्सप्रेस धावपटू कविता राऊत हिच्या पाठोपाठ नाशिक जिल्ह्यातील दत्तू बबन भोकनळ या आणखी एका क्रीडापटूने रोईंग या क्रीडा प्रकारात ऑलिंपिकमध्ये प्रवेश मिळवला आहे. यामुळे नाशिकचा क्रीडा क्षेत्रातील दबदबा वाढणार असून, धावपटूंचे शहर आता इतरही खेळांमध्ये अग्रेसर होत असल्याने नाशिकच्या क्रीडा क्षेत्राला झळाळी मिळणार आहे.
दत्तू भोकनळ हा नाशिक जिल्ह्याच्या चांदवड तालुक्यातील तळेगाव रोहे येथील रहिवासी असून, त्याचे शिक्षण संत ज्ञानेश्वर विद्यालय येथे झाले आहे. दत्तू याने रोईंग खेळाच्या पुरुषांच्या एकेरी स्कल्स प्रकारात पात्रता फेरीत यश मिळविले आहे. साऊथ कोरियाच्या चुन जु येथील तेगेऊन तलाव या ठिकाणी स्पर्धा सुरु आहेत.
दत्तू हा लष्करातील जवान असून तो पुण्यातील बॉम्बे इंजिनीअरींग ग्रुप येथे नियुक्तीवर आहे. त्याने यापूर्वी आशियाई रोईंग चॅपिंयनशिप स्पर्धेत रौप्यपदक पटकावले होते. भारताच्या ओम प्रकाश आणि दत्तू भोकनळ यांनी या आधी पुरुषांच्या दुहेरी स्कल्स रोईंग प्रकारात आशियाई स्पर्धेत पाच फेऱ्यांमध्ये यश मिळविले होते. सैन्य दलाने पुण्यातील नाशिक फाटापरिसरात असलेल्या तलावात द्रोणाचार्य पुरस्कार विजेते इस्माईल बेग यांच्या मार्गदर्शनाखाली दत्तू सराव करीत आहे. दत्तूने या खेळात अत्यंत कमी कालावधीत यश संपादन केले असून, अवघ्या तीन ते चार वर्षाच्या कारकिर्दीत त्याने यश मिळवले आहे. त्याच्या यशामुळे तळेगाव रोहे येथे आनंदोत्सव साजरा करण्यात आला.
दत्तू लहान असताना त्याच्या वडिलांचे निधन झाल्याने आईने कष्ट करुन त्याचे शालेय शिक्षण तळेगाव येथील संत ज्ञानेश्वर विद्यालयात पूर्ण केले. कुटुंबाला हातभार लागावा यासाठी दत्तूने बारावीनंतर सैन्यदलात प्रवेश केला. तेव्हापासून तो पुण्यात आहे.
पात्रता फेरीत विजय मिळेल अशी खात्री होती. रिओ ऑलिंपिक स्पर्धेत पात्र होण्यासाठी रोज सकाळ-संध्याकाळ चांगला सराव करत होतो. त्या प्रयत्नांना यश आले आहे. ऑलिंपिकमध्ये निश्चित चांगली कामगिरी करु अशी खात्री आहे.
दत्तू भोकनळ, खेळाडू
मोबाइल अॅप डाउनलोड करा आणि राहा अपडेट
