नाशिक : कोणतीही कला ही खेड्यात जास्त बहरते, असे म्हणतात आणि याच कलेला शास्त्राची जोड मिळाली तर तो कलाकार निश्चितच नावारुपाला येतो. आदिवासी भागातील मुली आपल्या पारंपरिक लोकनृत्याची जपणूक करीत कथकचे धडे गिरवू लागल्या आहेत. आदिवासी कन्या कविता राऊतने आंतरराष्ट्रीय पातळीवर खेळात नाव कमावल्यानंतर आता नृत्याच्या क्षेत्रातही आदिवासी कन्या नाव कमावण्यासाठी सज्ज होत आहेत. आदिवासींमध्ये कलेचे भांडार आहे. त्यंच्याकडे असलेली वारली चित्रशैली, तारपा नृत्य याने संपूर्ण जगाला वेड लावले आहे. याच पारंपरिकतेची जपणूक करीत आदिवासी महिला आता जव्हार, मोखाडा, खोडाळा या सारख्या भागात कथकचे धडे गिरवू लागल्या आहेत. सामान्य खेळाडूंपेक्षा आदिवासी खेळाडू जास्त काटक असल्याने कविता राऊतसारख्या खेळाडूने मिळवलेले यश सर्वश्रुत आहे. याच शारीरिक क्षमतेचा फायदा कथकसारख्या नृत्य प्रकारात झाला तर तीदेखील बहरेल या हेतूने नाशिकच्या कीर्ती कलामंदिराच्या नृत्यगुरू रेखा नाडगौडा यांनी जव्हार मोखाडा, त्र्यंबक इत्यादी परिसरातील ३५ मुली शोधून त्यांना कथकचे धडे देण्यास सुरुवात केली. यापैकी काही मुलींनी थोड्याच कालावधीत लक्षणीय प्रगती केली असून, शहरातल्या मुली सलग चार तास नृत्य असतील तर या मुली न थकता सलग आठ तास नृत्य करीत आहेत.
जव्हारमध्ये फक्त मुलीच नाही तर तेथील सुनादेखील हा नृत्य प्रकार काय आहे, हे जाणून घेण्यासाठी क्लासला येत आहेत. जव्हार मोखाडासारख्या भागात गांधर्व महाविद्यालयाचे परीक्षा केंद्र नसल्याने त्यांना नाशिकला येऊन परीक्षा द्यावी लागत आहे.
शहरातील मुलींच्या तोडीस तोड या मुली नृत्याचे धडे गिरवीत आहेत. येत्या काही दिवसांत जव्हारसारख्या ठिकाणाहून अनेक मुली विशारद झालेल्या दिसतील.
रेखा नाडगौडा, नृत्यगुरू
चित्रपटात कथक पाहिले होते. त्यामुळे याबाबत जाणून घ्यावे, अशी इच्छा होती. सुरूवातीला थोडे अवघड गेले, मात्र नंतर नृत्य जमू लागल्यावर आवड निर्माण झाली.
साक्षी भगत, विद्यार्थिनी
मोबाइल अॅप डाउनलोड करा आणि राहा अपडेट