घोटी शहराच्या वैभवात भर घालणारे अनेक उपक्रम सध्या राबविले जात आहेत. याच पार्श्वभूमीवर घोटी शहरात नुकतेच ग्रीन जिमची सुरुवात करण्यात आली. यासोबतच शहरात लवकरच जॉगिंग ट्रॅक सुरू होणार आहे. त्याचे काम युद्धपातळीवर सुरू असून नागरिकांना याचा लाभ घेता येणार असल्याची माहिती जिल्हा परिषद सदस्या अलका जाधव यांनी 'मटा'शी बोलताना दिली.
दरम्यान येथील संभाजीनगर येथे या जॉगिंग ट्रॅक आवारातच ग्रीन जिम उभारण्यात आली असून या ग्रीन जिमचा लोकार्पण सोहळा नुकताच करण्यात आला. या सर्व विकासकामांना जिल्हा परिषदेच्या निधीतून बळ देण्याचा प्रयत्न जिल्हा परिषद सदस्या अलका जाधव यांच्याकडून सुरू आहे. यासोबतच शहरातील घोटी पोलिस ठाण्याच्या लगत असलेल्या जुन्या प्राथमिक आरोग्य केंद्राच्या इमारतीचे निर्लेखन करून या विस्तीर्ण जागेचे सपाटीकरण करण्यात आले. नागरिकांना उत्तम आरोग्य लाभण्यासाठी जॉगिंग ट्रॅक उभारून या ठिकाणी अद्ययावत सुविधा उपलब्ध करून देण्यात येणार आहे.
या ग्रीन जिममध्ये विविध साहित्य व सुविधा उपलब्ध करून देण्यात आले आहे. त्यामध्ये हायमास्ट, वनौषधी झाडे, वृक्षारोपण करून हा परिसर सुशोभीत करण्यात येणार असल्याचेही अलका जाधव यांनी सांगितले.
रोजच्या दगदगीच्या जीवनातून वेळ काढत शहरवासीयांना उत्तम आरोग्य व व्यायामासाठी जॉगिंग ट्रॅक व ग्रीन जिम या संकल्पना राबविण्याच्या निश्चय करून युद्धपातळीवर काम सुरू आहे. या ठिकाणी आगामी काळात विविध सुविधा उपलब्ध करून देण्याचा सातत्याने प्रयत्न राहील.
अलका जाधव, जिल्हा परिषद सदस्या, नाशिक
मोबाइल अॅप डाउनलोड करा आणि राहा अपडेट
