म. टा. प्रतिनिधी, नाशिक
शहरात आणि नाशिक तालुक्यात मंगळवारी रात्रीपासून अनेक ठिकाणी दंगल सदृश परिस्थिती निर्माण झाल्याने जिल्हा प्रशासनाने आठ गावांमध्ये ४८ तासांसाठी संचारबंदी लागू केली आहे. जिल्हा परिषदेचे रस्ते तसेच या गावांलगतच्या महामार्गाला त्यामधून वगळण्यात आल्याने वाहतुकीवर त्याचा परिणाम होणार नसल्याचे प्रशासनाने स्पष्ट केले आहे. दरम्यान, शहरासह लगतची काही गावे, त्र्यंबकेश्वर आणि इगतपूरी तालुक्यात तणावपूर्ण परिस्थिती असून, तेथे मोठा पोलिस बंदोबस्त तैनात करण्यात आला आहे.
शहरात राणेनगर, सातपूर, पाथर्डी फाटा, गरवारे पॉइंट, लेखानगर, मुंबई नाक्यासह त्र्यंबकेश्वरपर्यंतच्या अनेक गावांमध्ये मध्यरात्रीपर्यंत हाणामारीचे प्रकार सुरू होते. मुंबई-आग्रा महामार्गावर पाथर्डी फाट्यापासून घोटीपर्यंत अनेक गावांमध्ये तणावाची परिस्थिती होतो. काही समाजकंटकांकडून या वादाला आता जातीय रंग दिला गेला असून, त्यामुळे दंगलसदृश परिस्थिती निर्माण झाली आहे. त्यामुळेच शहरासह ग्रामीण भागातही पोलिस बंदोबस्त वाढविण्यात आला असून, गस्तही वाढविण्यात आली आहे. परिस्थिती नियंत्रणात असून अफवांवर विश्वास ठेऊ नका, परिसरात सलोख्याचे वातावरण ठेऊन सहकार्य करा असे आवाहन जिल्हा तसेच पोलिस प्रशासनाने केले आहे.
अतिरिक्त बंदोबस्त दाखल
नाशिकमध्ये तणावाचे वातावरण असल्याने परिस्थिती चिघळून कायदा आणि सुव्यवस्थेचा प्रश्न निर्माण होण्याची शक्यता बळावली आहे. त्यामुळेच पोलिसांनी अतिरिक्त कुमक मागविली असून धुळे, अहमदनगर, औरंगाबाद आणि पुणे येथील पोलिसांच्या तुकड्या नाशिकमध्ये दाखल झाल्या आहेत. नाशिककर भयभीत झाल्याने या सर्व घटनांच्या पार्श्वभूमीवर पोलिसांनी रूट मार्च काढून शहरवासियांच्या सुरक्षेसाठी आम्ही कट‌िबध्द असल्याची ग्वाही दिली.
इंटरनेट सेवा शुक्रवारपर्यंत बंद
नाशिकमध्ये जातीय तेढ निर्माण करणाऱ्या आणि गैरप्रकारांना प्रोत्साहन देणाऱ्या पोस्ट मोबाइलद्वारे व्हायरल होऊ नयेत यासाठी प्रशासनाने खबरदारी घेतली आहे. मोबाइल कंपन्यांकडून पुरविण्यात येत असलेली इंटरनेट सेवा गेल्या दोन दिवसांपासून बंद आहे. ती शुक्रवारपर्यंत बंद ठेवण्याचा निर्णय जिल्हा प्रशासनाने घेतला असून त्यानंतर परिस्थितीनुरूप ती केव्हा सुरू करावी याचा निर्णय घेतला जाणार आहे. याखेरीज केबल प्रक्षेपणही बंद करण्याचा विचार जिल्हा प्रशासनाने सुरू केला आहे. दरम्यान अजूनही बससेवा पुर्णत: सुरू झाली नसल्याने प्रवाशांचे हाल सुरूच आहेत.
दगडफेक करणाऱ्या तिघे ताब्यात
लेखानगर भागातील एका नगरसेवकाच्या घरावर दगडफेक करून त्यांच्या वाहनाचे नुकसान करणाऱ्या एका संशयितासह दोघा अल्पवयीन मुलांना पोलिसांनी ताब्यात घेतले. कोर्टाने त्या संशयिताला १४ ऑक्टोबरपर्यंत पोलिस कोठडी दिली, तर दोन अल्पवयीन संशयितांची बालनिरीक्षणगृहात रवानगी केली. मंगळवारी सायंकाळी १५ ते २० जणांच्या टोळक्याने लेखानगरमधील एका नगरसेवकाच्या घरावर दगडफेक करून शिवीगाळ केल्याची घटना घडली. तसेच त्यांच्या घरासमोरील इनोव्हा कारच्या काचा फोडून नुकसान केले. यानंतर मोटरसायकल सोडून गेलेल्या तिघा संशयितांना पोलिसांनी ताब्यात घेतले. त्यांना कोर्टात हजर केले.
कार्यकर्त्यांना आवर घालण्याचे आवाहन
तळेगाव-अंजनेरी येथील पीडित बालिकेवरील अत्याचाराच्या घटनेनंतर गेल्या तीन दिवसांपासून शहरासह जिल्ह्यात तणावाचे वातावरण आहे. राजकीय पदाधिकाऱ्यांनी कार्यकर्त्यांना आवर घालावा अन्यथा कुणाचीही गय केली जाणार नाही असा इशारा पोलिसांनी दिला.
या पार्श्वभूमीवर बुधवारी पोलिस आयुक्तालयामध्ये जिल्हाधिकाऱ्यांच्या मुख्य उपस्थितीत राजकीय पदाधिकाऱ्यांसह शांतता समितीच्या पदाधिकाऱ्यांची बैठक घेण्यात आली. शहरासह जिल्ह्यात शांतता प्रस्थापित करण्यासाठी पदाधिकाऱ्यांना सहकार्य करण्याचे आवाहन जिल्हाधिकारी राधाकृष्णन बी. तसेच पोलिस आयुक्त रवींद्रकुमार सिंघल यांनी केले. बालिकेवरील बलात्काराच्या प्रकरणानंतर शहरासह जिल्ह्यात गेल्या तीन ते चार दिवसांपासून अशांतता आहे. शहरासह जिल्ह्यात अनेक ठिकाणी दगडफेकीच्या घटना घडल्या आहेत. हा तणाव निवळावा यासाठी पोलिस आयुक्तालयामध्ये जिल्हाधिकारी राधाकृष्णन् बी., पोलिस आयुक्त रवींद्रकुमार सिंघल, नाशिक परिक्षेत्राचे विशेष पोलिस महानिरीक्षक विनयकुमार चौबे, ग्रामीणचे पोलिस अधीक्षक अंकुश शिंदे, उपायुक्त विजय पाटील यांच्या प्रमुख उपस्थितीमध्ये जिल्ह्यातील राजकीय पदाधिकाऱ्यांची बैठक घेण्यात आली. या बैठकीला खासदार हेमंत गोडसे, आमदार अनिल कदम, जयवंत जाधव, माजी आमदार दिलीप बनकर, राष्ट्रवादीचे जिल्हाध्यक्ष रवींद्र पगार, नगरसेवक अजय बोरस्ते, शिवाजी चुंभळे, शशिकांत जाधव, उद्धव निमसे, दिनकर पाटील, विलास शिंदे, दत्ता गायकवाड, शैलेश कुटे, नाना महाले, राहुल ढिकले, अनिल ढिकले, गोकुळ पिंगळे, प्रकाश मते, संदीप गुळवे, अर्जुन टिळे, शिवाजी सहाणे, लक्ष्मण जायभावे आदींसह अनेक पदाधिकारी उपस्थित होते. याखेरीज माजी महापौर अशोक दिवे, नगरसेवक संजय साबळे, अण्णासाहेब कट्यारे आदींसह रिपाइं, भारिपचे पदाधिकारी उपस्थित होते.
तणावाविषयी यावेळी चर्चा करण्यात आली. आपल्या कार्यकर्त्यांना आवर घाला असे आवाहन पोलिसांनी या पदाधिकाऱ्यांना केले. ज्यांच्यावर पोलिस स्टेशनमध्ये गुन्हे दाखल आहेत, त्यांना तत्काळ पोलिसांत हजर करण्याचे आवाहन केले. तसेच, तणावाची परिस्थिती निर्माण करण्यासाठी कारणीभूत ठरणाऱ्यांची गय केली जाणार नाही, असा इशाराही दिला. सामाजिक सलोखा टिकून ठेवण्यासाठी सहकार्य करा असे आवाहन यावेळी करण्यात आले.
मोबाइल अॅप डाउनलोड करा आणि राहा अपडेट
