म. टा. खास प्रतिनिधी, नाशिक
‘ट्रायसन’ आणि सोशल नेटवर्किंग फोरम यांच्यातर्फे महाराष्ट्राच्या प्रायोगिक रंगभूमीवर गाजत असलेल्या ‘हंडाभर चांदण्या’, ‘गढीवरच्या पोरी’ आणि ‘डेटिंग विथ रेन’ या तीनही नाटकांचा एकाच दिवशी विनामूल्य आस्वाद घेण्याची अनोखी संधी बुधवारी नाशिककरांना मिळाली. ‘थिएटर अहेड फेस्टिव्हल’ या उपक्रमांतर्गत ही नाट्यत्रयी परशुराम साईखेडकर नाट्यगृहात सादर झाली.
मान्यवरांच्या हस्ते महोत्सवाचा शुभारंभ झाला. या तीनही नाटकांचा बाज एकमेकांहून वेगळा होता. व्यावसायिक नाट्यनिर्माता संघाचे पुरस्कार पटकावणारे आणि वाट बघण्यातील व्याकुळतेतही जगण्यातील संगीत शोधताना वास्तवाचे भान देणारं नाटक म्हणजे ‘हंडाभर चांदण्या’. तसेच पाच युवतींच्या जगण्यातील वास्तव आणि स्वप्नांचा कोलाज मांडणारी विराणी- अर्थात या वर्षीच्या विशेष लक्षणीय प्रायोगिक नाटकाचा झी गौरव पुरस्कार पटकावणारी कलाकृती ‘गढीवरच्या पोरी’ आणि हरवलेले प्रेम ते प्रेमात हरविण्यापर्यंतचा विलक्षण दिलखुलास प्रवास सांगणाऱ्या सखाराम पांडुरंग गांगुर्डेचं तितकेच दिलखुलास नवे फ्रेश धमाल नाटक ‘डेटिंग विथ रेन’ ही तिन्ही नाटके एकाच दिवशी पहायला मिळाल्याने नाशिककरांसाठी मेजवानीच होती.
तीनही नाटकांची निर्मिती व्यवस्था सदानंद जोशी व कैलास पाटील यांची आहे. निर्मितीप्रमुख लक्ष्मण कोकणे, ईश्वर जगताप आहेत. या तीनही नाटकांत प्राजक्त देशमुख, मोहिनी पोतदार, प्रणव प्रभाकर, दीप्ती चंद्रात्रे, नुपूर सावजी, श्रद्धा देशपांडे, पियूष नाशिककर, मयुरी मंडलिक, अरुण इंगळे, राहुल गायकवाड, राजेंद्र उगले, दत्ता अलगट, गितांजली घोरपडे, सई आपटे, प्रज्ञा तोरसकर, पल्लवी पटवर्धन, प्रतिक शर्मा, धनंजय गोसावी यांच्या भूमिका आहेत. नेपथ्य राहुल गायकवाड, प्रकाश योजना प्रफुल्ल दीक्षित, वेशभूषा श्रद्धा-नुपूर, रंगभूषा माणिक कानडे, संगीत रोहित सरोदे यांचे आहे. या तीनही नाटकांचे लेखन दत्ता पाटील तर दिग्दर्शन सचिन शिंदे यांचे आहे.
मोबाइल अॅप डाउनलोड करा आणि राहा अपडेट