तळेगाव अंजनेरी येथील घटनास्थळासह त्यानंतर पडसाद उमटलेल्या गावांना आयोगाने भेट दिली. प्रशासनाच्या अधिकाऱ्यांशी चर्चा करण्यात आली असून, दंगल बाधितांचे गाऱ्हाणेही आयोगाने ऐकले आहे. नाशिकमध्ये घडलेल्या या एकूणच प्रकाराबाबत आयोग गंभीर असून, लवकरच सविस्तर अहवाल सरकारला सादर केला जाईल, अशी माहिती अनुसूचित जाती जमाती आयोगाने सोमवारी नाशिकमध्ये दिली.
तळेगाव अंजनेरी येथे घडलेल्या अत्याचाराच्या घटनेच्या पार्श्वभूमीवर आयोगाने नाशिक जिल्ह्याचा दौरा केला. निवृत्त पोलिस अधिकारी विजय कांबळे, माजी सचिव आर. डी. शिंदे आणि माजी न्यायमूर्ती सी. एल. थुल यांचा या आयोगामध्ये समावेश होता. मुंबई-नाशिक महामार्गालगतच्या सांजेगाव आणि नांदूरवैद्य गावात त्यांनी भेट दिली. यावेळी त्यांच्यासमवेत जिल्हाधिकारी राधाकृष्णन बी, पोलिस अधीक्षक अंकुश शिंदे, प्रांताधिकारी राहुल पाटील तसेच समाज कल्याण अधिकारी प्राची वाजे होत्या. दंगलसदृश परिस्थितीमुळे बाधित झालेल्या ग्रामस्थांशी त्यांनी चर्चा केली. त्यांच्याकडून घटनाक्रम समजाऊन घेतला. त्यानंतर त्यांनी पोलिस अधिकाऱ्यांसह प्रशासनातील अधिकाऱ्यांशी चर्चा करून त्यांनी केलेल्या कार्यवाहीची माहिती घेतली. तळेगाव अंजनेरी या गावालाही आयोगाने भेट दिली. तेथील घटनास्थळाची पाहणी करण्यात आली. तेथील ग्रामस्थांशी देखील चर्चा करून आयोगाने परिस्थितीची माहिती घेतली. त्यानंतर आयोगाने सिव्हिल हॉस्पिटलमध्ये पीडित मुलीचे कुटुंबीय, तसेच अन्य काही जखमींची विचारपूस केली. नाशिक निर्माण झालेल्या परिस्थितीबाबत आपण अनेक घटकांशी या दौऱ्यादरम्यान चर्चा केली.
मोबाइल अॅप डाउनलोड करा आणि राहा अपडेट