लग्नाचे आमिष दाखवत बलात्कार करून मुलीचा गर्भपात करणाऱ्या संशयित आरोपीस मदत केल्याच्या आरोपावरून पोलिसांनी डॉ. उमेश आर. मराठे यास अटक केली आहे. यामुळे शहरात खळबळ उडाली आहे. संशयित डॉक्टरास कोर्टाने तीन दिवसांची पोलिस कोठडी सुनावली आहे.
लग्नाचे आमिष दाखवून बलात्कार व गर्भपात केल्याप्रकरणी स्थायी समितीचे माजी सभापती शिवाजी चुंभळे यांचा मुलगा अजिंक्यवर इंदिरानगर पोलिसांनी गुन्हा दाखल केला आहे. पीडित युवतीच्या तक्रारीनुसार, बलात्कारानंतर संशयित आरोपीने इच्छा नसताना लेखानगर येथील लाइफ केअर हॉस्पिटलचे डॉ. उमेश मराठे यांच्या हॉस्पिटलमध्ये गर्भपात केला. दरम्यान, गुन्हा दाखल झाल्यानंतर मुख्य संशयित आरोपी अजिंक्य चुंभळेने अटकपूर्व जामिनासाठी कोर्टात धाव घेतली. कोर्टाने २३ नोव्हेंबरपर्यंत अजिंक्यचा अटकपूर्व जामिन अटी-शर्तींसह मंजूर केला. सदर प्रकरणाचा तपास करताना पोलिसांनी काही हॉटेलांमधील व्हिडिओ फुटेज जप्त केले आहेत. दुसरीकडे पीडित मुलीच्या तक्रारीनुसार डॉ. मराठे यांची दोन दिवस कसून चौकशी केली. पोलिसांच्या चौकशीदरम्यान डॉक्टरांनी समाधानकारक खुलासा दिला नाही. त्यामुळे डॉक्टर मराठे यांना कलम ३१३ नुसार पोलिसांनी रविवारी उशिरा अटक केली. एखाद्या महिलेच्या इच्छेविरोधात गर्भपात करणाऱ्या व्यक्तीस कलम ३१३ नुसार दहा वर्ष किंवा आजीवन कारावास अशी शिक्षा होऊ शकते. दरम्यान, सोमवारी डॉ. मराठे यांना पोलिसांनी कोर्टात हजर केले. बचाव तसेच सरकारी पक्षाचा युक्तिवाद पूर्ण झाल्यानंतर कोर्टाने डॉ. मराठे यांना तीन दिवसांची पोलिस कोठडी सुनावली. यामुळे वैद्यकीय क्षेत्रासह राजकीय पातळीवर खळबळ उडाली आहे.
मुंबईलाही तपास
या गुन्ह्याचे कनेक्शन मुंबई येथे जोडले गेले आहे. पीडित मुलीच्या तक्रारीनुसार मुंबईतील काही बड्या हॉटेल्समध्ये संशयित आरोपीने वेळोवेळी तिच्यावर बलात्कार केला. नाशिकमधील अशाच एका हॉटेलमधील सीसीटीव्ही फुटेज जप्त करण्यात आले आहेत. आता तपास पथकाने मुंबईकडे आपले लक्ष वळवले असून, तेथील व्हिडिओ फुटेज जप्त करण्यात येणार आहे. याप्रकरणी सध्या तरी नवीन आरोपी होण्याची शक्यता नाही, असे मत एका अधिकाऱ्याने व्यक्त केले.
मोबाइल अॅप डाउनलोड करा आणि राहा अपडेट