शहरातील बेरोजगार युवकांना कौशल्य प्रशिक्षणाद्वारे रोजगार उपलब्ध करुन देण्याच्या महापालिका आयुक्त अभिषेक कृष्णा यांनी ठेवलेल्या प्रस्तावाला स्थायी समितीने ग्रीन सिग्नल दिला आहे. शहरातील पाचशे बेरोजगार युवकांना हॉस्प‌िटॅलिटी, हेल्थ केअर, ऑटोमोबाइल, बांधकाम क्षेत्रासंदर्भातील प्रशिक्षण देण्यासाठी स्थायीने एक कोटी रुपयांना आर्थिक मंजुरी दिली आहे.
मुंबईतल्या प्रथमेश एज्युकेशन फाऊंडेशने दरवर्षी प्रतिविद्यार्थी २० हजार रुपयांचा दर दिल्याने या संस्थेसोबत महापालिका आता करार करणार असून, पुढील वर्षापासून या कौशल्य प्रशिक्षणाला सुरुवात होणार आहे. आयुक्तांच्या या महत्वाकांक्षी प्रकल्पामुळे दरवर्षी पाचशे तरुणांना रोजगाराच्या नव्या संधी मिळणार असून, त्यांना प्रशिक्षणानंतर रोजगार उपलब्धतेसाठीही पालिका प्रयत्न करणार आहे.
महापालिका आयुक्त अभिषेक कृष्णा यांनी महापालिकेमार्फत शहरातील बेरोजगार युवकांना कौशल्य प्रशिक्षण देऊन त्यांना रोजगार उपलब्ध करून देण्याचा महत्वाकांक्षी प्रकल्प सुरू केला आहे. या प्रकल्पाअंतर्गत शहरातील पाचशे सुशिक्षित बेरोजगार युवकांची निवड करून त्यांना विविध क्षेत्राचे प्रशिक्षण दिले जाणार आहे. महापालिकेच्या बजेटमध्ये दरवर्षी या कामासाठी एक कोटी रुपयांची तरतूद करण्यात येणार आहे. या प्रकल्पाअंतर्गत शहरातील पाचशे विद्यार्थ्यांना हॉस्प‌िटॅलिटी, हेल्थ केअर, ऑटोमोबाइल, बांधकाम क्षेत्रासंदर्भातील प्रशिक्षण दिले जाणार आहे. महासभेने संबंधित प्रस्तावाला हिरवा कंदील दाखवल्यानंतर प्रशासनाने यासंदर्भात निविदा प्रक्रिया राबविली होती.
प्रशासनाने राबविलेल्या निविदा प्रक्रियेला तीन संस्थांनी प्रतिसाद दिला आहे. त्यात मुंबईच्या प्रथमेश एज्युकेशन फाऊंडेशनने प्रतिविद्यार्थी २० हजार रुपयांचा दर दिला आहे. त्यात लॉजिंग, बोर्डिंग, नाश्ता, दोन वेळा जेवण, ट्रेनिंग क्लासरूम, प्रशिक्षक यांचा समावेश आहे. संबंधित संस्थेमार्फत या सुविधा युवकांना पुरविल्या जाणार आहेत. प्रशिक्षणाचा कालावधी हा ६ ते ९ मह‌िने असणार आहे. प्रशिक्षणार्थींचा सर्व खर्च महापालिका उचलणार आहे. स्थायी समितीवर संबंधित संस्थेला काम देण्याचा व आर्थिक खर्चाला मान्यता देण्याचा प्रस्ताव ठेवण्यात आला होता. त्याला स्थायी समितीने मान्यता दिल्याने आता पुढील वर्षापासून शहरातील पाचशे बेरोजगार युवकांना रोजगाराचे प्रशिक्षण मिळणार आहे. शहरात जाहिरात देवून या प्रशिक्षणार्थींची निवड केली जाणार आहे.
शहरातच रोजगार
संबंधित संस्थेकडून युवकांना कौशल्य प्रशिक्षणाद्वारे रोजगाराचे प्रशिक्षण दिल्यानंतर पालिकाच या युवकांच्या रोजगारासाठी मदत करणार आहे. औद्योगिक वसाहती, हेल्थ केअरमध्ये काम करणाऱ्या संस्था, ऑटोमोबाइल्स व बांधकाम क्षेत्रातील संस्थांशी संपर्क साधून त्यांना शहरातच रोजगार उपलब्ध करून देण्याचा पालिकेचा मानस आहे. अशा प्रकारचे प्रशिक्षण सुरू करणारी नाशिक ही पहिलीच महापालिका असणार आहे. नागरिकांना सुविधा देण्यासह रोजगाराच्या संधी उपलब्ध करून देण्याचा हा अनोखा उपक्रम आहे.
दरवर्षी शहरातील पाचशे सुशिक्षित युवकांना या कौशल्य प्रशिक्षणाद्वारे रोजगाराचे प्रशिक्षण दिले जाणार आहे. यासाठी संस्थेची निवड करण्यात करण्यात आली असून, युवकांचीही लवकरच निवड केली जाणार आहे. या सर्वांना शहरातच रोजगार उपलब्ध करून देण्याचा प्रशासनाचा प्रयत्न असणार आहे.
-अभिषेक कृष्णा, आयुक्त, मनपा
मोबाइल अॅप डाउनलोड करा आणि राहा अपडेट
