भारतीय जनता पक्षाचे सरकार हे थापाड्यांचे सरकार असून, त्यांना सत्तेचा व पैशाचा माज आला असल्याची घणाघाती टीका महाराष्ट्र नवनिर्माण सेनेचे अध्यक्ष राज ठाकरे यांनी शुक्रवारी केली. नाशिक महापालिकेच्या सार्वत्रिक निवडणुकीनिमित्त शुक्रवारी गोल्फ क्लब मैदानावर ठाकरे यांची सभा झाली. त्या वेळी ते बोलत होते.
भाजपव टीकास्त्र सोडताना राज ठाकरे म्हणाले, की भारतीय जनता पक्षाने पैशांच्या गोण्या ओतून लोकांना उमेदवाऱ्या दिल्या आहेत. अशा लोकांच्या हातून विकास होऊच शकत नाही. जनतेला वेड्यात काढण्याचे काम हे सरकार करीत असून, थापा कशा मारायच्या हे भाजपकडून शिकावे. ज्याप्रमाणे राज्यात परिस्थिती आहे तशीच परिस्थिती केंद्रात आहे. २०१४ च्या निवडणुकीत नरेंद्र मोदींनी प्रत्येक नागरिकाच्या खात्यात १५ लाख रुपये जमा केले जातील, असे आश्वासन दिले होते. कुठे गेले १५ लाख? त्यातील १५ रुपयेदेखील नागरिकांच्या हातात पडले नाहीत. नाशिक शहरात मेट्रो रेल्वे आणू, अशी घोषणा केली होती. तीदेखील पूर्ण होऊ शकलेली नाही. विमानतळ बांधून तयार आहे. त्यावर विमानं मात्र नाहीत. ती उतरवून दाखवा, असेही ते म्हणाले.
ते म्हणाले, की कॉँग्रेसने शिवस्मारकाची केलेली घोषणा हे सरकार पूर्ण करणार आहे. त्यासाठी ८ ते १० हजार कोटी रुपये खर्च अपेक्षित आहे. राज्य सरकारच्या खिशात पैसे नाहीत, तेव्हा हे स्मारक कसे पूर्ण करणार आहे? जनतेच्या डोळ्यांत धूळ फेकण्याचे काम हे सरकार करीत आहे. शिवाजी महाराजांचे स्मारक करायचे झाल्यास राजांचे गडकिल्ले व्यवस्थित करा, हेच त्यांचे स्मारक ठरेल.
या वेळी त्यांनी नाशिकमध्ये मनसेने केलेल्या विकासकामांचे प्रेझेंटेशन सादर करताना सांगितले, की आम्ही नाशिक महापालिकेची सूत्रे हाती घेतल्यापासून भ्रष्टाचाराचे एकही प्रकरण नाही. शहरात ५१० किलोमीटरचे रस्ते बांधले आहेत. शहरात अनेक वर्षांपासून फोफावत असलेले अतिक्रमण हटवण्याचे साहस कुणी दाखवले नाही. ते काम केवळ मनसेमुळे शक्य झाले असल्याचे त्यांनी सांगितले. बाळासाहेब ठाकरे यांच्या नावाला साजेसे असलेले संग्रहालय स्थापन व्हावे अशी इच्छा होती. ती नाशिकमध्ये साकार झाली आहे. शहरात देशाला भूषणावह ठरेल असे बॉटनिकल गार्डन, गोदा पार्क अशी अनेक उदाहरणे देता येतील, अशी सुशोभीकरणाची कामे केली आहेत. शहरात इतर कोणत्याही पक्षाला निवडून दिल्यास नागरिकांना पश्चात्ताप करण्याची वेळ येईल. शहराचा विकास साधायचा असेल तर मनसेशिवाय पर्याय नाही, अशी साद त्यांनी मतदारांना घातली.
विस्थापित करणारी नियमावली आली कशी?
नाशिक शहराची विकास नियमावली प्रकाशित न होता बाहेर पडली आहे. व्हायरल झालेल्या या नियमावलीतील तरतुदींनुसार शहरातील नागरिकांना विस्थापित होण्याची वेळ येणार आहे. १६ लाख लोकसंख्येपैकी दोन लाख लोकांना शहराबाहेर जावे लागणार आहे. ही नियमावली रद्द करण्याचे धाडस मुख्यमंत्र्यांनी करावे किंवा ती खोटी असल्याचे जाहीर करावे, असे आव्हान ठाकरे यांनी दिले. भाजपने ७७ नव्हे, तर ८८ गुन्हेगारांना उमेदवारी दिली आहे. १९५२ मध्ये स्थापन झालेल्या भाजपसारख्या पक्षाला उमेदवार मिळत नाही ही शोकांतिका आहे.
मोबाइल अॅप डाउनलोड करा आणि राहा अपडेट
