जिल्हा मध्यवर्ती बँकेतून शिक्षकांना पगाराच मिळत नसल्यामुळे संतप्त माध्यमिक शिक्षकांनी मंगळवारी जिल्हा बँकेच्या मुख्यालयाला टाळे ठोकण्याचा प्रयत्न केला. पण, शटर बंद न करता आल्यामुळे या शिक्षकांनी घोषणाबाजी करीत बँकेच्या आवारात ठिय्या आंदोलन करून आपला संताप व्यक्त केला. यावेळी शिक्षक व बँक कर्मचाऱ्यांमध्ये झटापट व शाब्दिक चकमकही झाली. पोलिसांनी हस्तक्षेप केल्यानंतर आंदोलकांनी बँकेचे कार्यकारी संचालक यशवंत शिरसाठ यांच्याशी चर्चा केली. यावेळी शिरसाठ यांनी आरटीजीएस व रोख रक्कम देऊन पैसे देण्याचे आश्वासन दिल्यानंतर हे आंदोलन मागे घेण्यात आले. पण, हे पैसे दोन दिवसांत न मिळाल्यास पुन्हा शुक्रवारी बारा वाजता आंदोलन करण्याचा निर्णयही शिक्षकांनी या ठिकाणीच जाहीर केला.
गेल्या चार महिन्यांपासून शिक्षकांचे पगार खात्यात जमा होऊनही पूर्णपणे मिळत नाहीत. त्यात मार्च महिन्यात आलेले ६० कोटींहून अधिक पैसे शिक्षकांच्या खात्यात जमा झाले. पण, ते बँकेतून दिले जात नसल्यामुळे शिक्षक अधिक संतप्त झाले. द्वारका येथील जिल्हा मध्यवर्ती बँकेत एक हजार किंवा दोन हजारांच्या स्वरुपात पगार दिला जात असल्यामुळे जिल्ह्यातील सर्व माध्यमिक शिक्षकांनी एकत्र येत हे आंदोलन केले. सकाळी ११ वाजेपासून सुरू झालेले हे आंदोलन तब्बल दोन तास सुरू होते. यावेळी शिक्षक एकजुटीचा विजय असो, पगार आमच्या हक्काचा नाही कोणाच्या बापाच्या, या संचालकांचे करायचे काय खाली डोके वर पाय... अादी घोषणा देऊन परिसर दणाणून सोडला. आंदोलनादरम्यान शिक्षक अाक्रमक झाल्यामुळे पोलिसांनी यावेळी मध्यस्थाची भूमिका घेतली. त्यानंतर शिक्षक काहीसे शांत झाले. प्रथम कार्यकारी संचालकांनी राष्ट्रीयीकृत बँकेतच पैसे नसल्याचे कारण देत शिक्षकांना या बँकेत पैसे आल्यानंतर तातडीने देण्याचे सांगितल्यानंतर शिक्षकांनी त्यांच्या या आश्वासनावर नाराजी व संताप व्यक्त केला. त्यानंतर शिक्षकांचे काही प्रतिनिधी कार्यकारी संचालकांच्या केबिनमध्ये गेले व तेथे चर्चा केल्यानंतर आरटीजीएस व रोख रक्कम स्वरुपात पैसे देण्याचे मान्य केल्यानंतर शिक्षकांना आपले आंदोलन मागे घेतले.
--
चेअरमन, व्हाइस चेअरमन गैरहजर
जिल्हा मध्यवर्ती बँकेत शिक्षकांनी आंदोलनास सुरुवात केल्यानंतर त्यांनी चेअरमनशिवाय कोणाशीही चर्चा करणार नाही, अशी भूमिका जाहीर केली. पण, त्यानंतर चेअरमन नरेंद्र दराडे मुंबईला, तर व्हाइस चेअरमन सुहास कांदे उपस्थित नसल्याचे सांगितल्यानंतर शिक्षकांनी कार्यकारी संचालक यशवंत शिरसाठ यांच्याबरोबर चर्चा केली.
--
चेक होताहेत बाउन्स
यावेळी अनेक शिक्षकांनी इन्कम टॅक्स, इन्शुरन्स कंपनी, होम लोनसह इतर ठिकाणी दिलेले चेक बाउन्स होत असल्याच्या तक्रारी करीत बाउन्स चेक सर्वांना दाखविले. त्यामुळे या आंदोलनाला चांगलीच धार आली.
--
लग्नपत्रिकाही झळकल्या
एका शिक्षिकेने आपल्या मुलीचे लग्न असून, त्यासाठीही पैसे नसल्याचे सांगत लग्नपत्रिकाच या ठिय्या आंदोलनात झळकावत आपला संताप व्यक्त केला. बँकेत पैसे जमा असूनही ते काढता येत नसल्यामुळे या शिक्षिकेने आपला संताप सर्वांसमोर मांडला. लग्नासाठी अनेकांना आॅर्डर दिल्या. पण, त्यांना देण्यासाठी पैसे नसल्याचे सांगत लग्नाअगोर पैसे द्यावेत, अशी मागणी केली.
मुलीच्या आजाराने अश्रू
एका शिक्षिकेने आपली मुलगी आजारी असून, ती हाॅस्पिटलमध्ये आहे. तिच्या उपचारांसाठी पैशाची गरज आहे, असे सांगितले. त्यावेळी त्यांना रडू कोसळल्याने आंदोलन करणारे शिक्षक काही काळ स्तब्ध झाले. त्यानंतर त्यांनी आक्रमक भूमिका घेत जोरदार घोषणाबाजी केली. साकोऱ्याचे शिक्षक संजय बोरसे हे कॅन्सरने आजारी असून, त्यांना बिल व पगार मिळाले नसल्याचेही यावेळी सांगण्यात आले.
--
राज्यात अनेक ठिकाणी राष्ट्रीयीकृत बँकेतून शिक्षकांना पगार मिळत आहे. पण, नाशिक जिल्ह्यात तो सहकारी बँकेतून मिळत आहे. बँकेची आर्थिक स्थिती चांगली नाही. परिणामी नोव्हेंबरपासून पगार काढण्यासाठी अडचण येत आहे. त्यामुळे जिल्हाधिकाऱ्यांनी लक्ष घालून शिक्षकांचे पगार राष्ट्रीयीकृत बँकेतून व्हावेत यासाठी प्रयत्न करावेत.
-मोहन चकोर, अध्यक्ष, माध्यमिक शिक्षक संघटना
मोबाइल अॅप डाउनलोड करा आणि राहा अपडेट
