म. टा. खास प्रतिनिधी, नाशिक
भाजपपासून दुरावलेल्या आणि शिवसेनेच्या मंचावर आलेल्या स्वाभिमानी शेतकरी संघटनेचे अध्यक्ष खासदार राजू शेट्टी यांनी मुख्यमंत्र्यांसह पंतप्रधानांना लक्ष्य करत, सरकारला मातीत घालण्याची, थडगे बांधण्याची तसेच खुर्च्या काढून घेण्याची भाषा वापरत थेट हल्लाबोल केला.
नाशिकमध्ये शिवसेनेच्या वतीने शेतकऱ्यांच्या कर्जमुक्तीसाठी आयोजित केलेल्या कृषी अधिवेशनाला राजू शेट्टी यांनी हजेरी लावून मुख्यमंत्री देवेंद्र फडणवीस आणि पंतप्रधान नरेंद्र मोदींच्या धोरणांवरच हल्लाबोल केला.
ते म्हणाले की, गेल्या तीन वर्षांत केंद्र आणि राज्यसरकारने दिलेले आश्वासन पाळले असते, तर आज शेतकऱ्यांवर भीक मागण्याची वेळ आली नसती. आमच्या डोक्यावरचे कर्ज हे सरकारचे अनैतिक पाप असल्याची घणाघाती टीका शेट्टी यांनी केली. एक निवडणूक जिंकले म्हणजे राजकारण संपत नाही, असे सांगत शेतकऱ्यांना फसवले तर २०१९ फार लांब नाही, वांरवार फसवाल तर मातीत गाडू, असा इशारा त्यांनी दिला. तुमच्या स्वप्नांच्या आड आम्ही येणार नाही. परंतु, जर का शेतकऱ्यांची थडगी बांधून तुम्ही मनोरे उभे करत असाल, तर त्याच थडग्यांमध्ये तुम्हालाही गाडू अशा शब्दांत शेट्टी यांनी शिवसेनेच्या व्यासपीठावरून मुख्यमंत्र्यांना आव्हान दिले.
शेट्टी यांनी केंद्र व राज्यसरकारला थेट अंगावर घेत, मी शेतकऱ्यांची भाषा बोलणार असून मला कुणाला घाबरायची गरज नाही. सरकार शेतकऱ्यांच्या अज्ञानाचा फायदा घेत असल्याचा आरोप त्यांनी केला. कृषी मूल्य ठरवणारा आयोग हे सरकारचे खेळणे असल्याचा आरोप त्यांनी केला.
आमच्या डोक्यावरचे कर्ज हे सरकारचेच अनैतिक पाप असून तेच पापाचे धनी आहेत. त्यामुळे सरकारनेच हे पाप संपवले पाहिजे असे सांगत, शेट्टी यांनी पतंप्रधान नरेंद्र मोंदीनी महायुतीच्या बैठकीपूर्वी दिलेले स्व‌ामिनाथन आयोगाच्या दीडपट हमी भावाचे आश्वासन पाळले नसल्याचा आरोप केला. मुख्यमंत्र्यांची सातबारा कोरा करण्याची भाषा का बदलली, असा प्रश्न त्यांनी विचारला.
कर्जमुक्ती केली तर आत्महत्या थांबतील अशी खात्री मुख्यमंत्री मागत आहेत. परंतु तुम्ही फसवणार नाहीत अशी खात्री आम्ही मागितली होती का, असा सवालही त्यांनी केला. सरकारने आतापर्यंत आत्महत्या केलेल्या शेतकऱ्यांच्या ४५ हजार विधवा महिलांचे कर्ज माफ करायला हवे होते. सिंचन घोटाळ्यात भ्रष्टाचाराच्या पुराव्याची बैलगाडी आता कुठे गेली, असा जाब विचारला. भ्रष्टाचारासाठी तुरुंगात जाणारे तुमच्यासोबत उजळ माथ्याने फिरत आहेत, अशी टीका त्यांनी केली.
थडग्यात गाडू अन् खुर्च्या फेकू
मुख्यमंत्र्यांच्या स्वप्नांना आमचा विरोध नाही. परंतु माझ्या शेतकऱ्यांची थडगी बांधून जर तुम्ही मनोरे उभे करणार असाल तर तुम्हाला त्या थडक्यात गाडू, असा इशारा शेट्टी यांनी मुख्यमंत्र्यांना दिला. आधी शेतकऱ्यांना समृद्ध करा, मगच समृद्धी महामार्ग करा असे सांगत समृद्धी, हमीभाव, संप याला विरोध करणार असाल तर ते तुम्हाला महागात पडेल. खुर्च्या आणि सत्ता देवून तुम्ही फसवाल तर त्या खुर्च्या काढून फेकण्याची ताकद आमच्यात आहे, असा इशाराही त्यांनी दिला.
आता वाल्मिकी नको
मुख्यमंत्री आणि भाजपच्या नेत्यांनी भ्रष्टाचाऱ्यांना जेलमध्ये घातलेच नाही. गावगुंडांना आणि भ्रष्टाचाऱ्यांना वाल्याचा पक्षात घेतले. महाराष्ट्राला एवढ्या वाल्मिकींची गरज नाही, असेही ते म्हणाले.
‘त्या’ १५ लाखांचे काय झाले?
म. टा. खास प्रतिनिधी, नाशिक
निवडणुकीपूर्वी विदेशातून काळा पैसा आणून प्रत्येकाच्या खात्यात १५ लाख टाकणार होते, त्याचे काय झाले, असा सवाल करत शेतकऱ्याला कर्जमुक्त करू नका, पण त्याच्या खात्यात स्वीस बँकेतील १५ लाख आधी टाका असे आवाहन शिवसेना पक्षप्रमुख उद्धव ठाकरे यांनी सरकारला केले.
नाशिकमध्ये शिवसेनेच्या वतीने शेतकऱ्यांच्या कर्जमुक्तीसाठी भव्य कृषी अधिवेशनाचे आयोजन करण्यात आले होते. या अधिवेशनात ‘मी कर्जमुक्त होणारच’ हा नारा देण्यात आला. शिवसेनेचे राज्यातील मंत्री, आमदार व खासदार या अधिवेशनाला झाडून हजर होते. कर्जमुक्तीसाठी जुलैमध्ये विधिमंडळावर भव्य मोर्चा काढण्याची घोषणा करत त्यांनी सरकारविरोधात रस्त्यावर उतरून लढण्याचा इशारा दिला.
ते म्हणाले की, भाजप पूर्ण सत्तेसाठी राज्यात मध्यावधी निवडणुकांच्या चाचपणीसाठी सर्व्हेक्षण करत आहे. परंतु, मध्यावधीसाठी चाचपणी काय करता, शेतकरी संपूर्ण कर्जमुक्त करा. तुम्ही कर्जमुक्तीचा शब्द पाळल्यास माझे सगळे मंत्री सत्तेतून बाहेर पडून तुम्हाला पूर्ण सत्ता देतील, असे आव्हान शिवसेना पक्षप्रमुख उद्धव ठाकरेंनी मुख्यमंत्री देवेंद्र फडणवीस यांना दिले.
उध्दव म्हणाले की, आता शेतकरी रडणार नाही, साल्यांची सालपटं काढणार असा टोला ठाकरे यांनी दानवेंना लगावला. तूर खरेदीसाठी उत्पादनाचे मॅपिंग करण्याचा निर्णय सरकारने घेतला. अरविंद सुब्रह्मण्यम यांच्या अध्यक्षतेत केंद्राने समिती नेमली. तुरीचे बम्पर पीक येणार असा अहवाल समितीने दिला. झालेही तसेच. विक्रमी उत्पादन होणार होते तर आयात करण्याचा निर्णय कुठल्या सुप‌िक डोक्यातून आला, त्याचे आधी मॅपिंग करा, असा टोला उद्धव ठाकरेंनी लगावला. तूर घोटाळ्याची चौकशीची मागणी त्यांनी केली.
दानवेंना शेण काढायला ठेवले असते!
नाशिक : आत्महत्याग्रस्त शेतकऱ्यांचा अस्थिकलश घेऊन राज्यभर फिरणारे विजय जाधव म्हणाले, पूर्वी शेतकरी शेकडो एकर जमिनींचा मालक होता. आता त्याच्याकडचे क्षेत्र कमी झाले आहे. हल्ली त्याने दहा रुपये पेरले की त्याला पाचच रुपये मिळतात. एक बी पेरले की १०० बियाणे उगविण्याची क्षमता शेतकऱ्यात आणि त्याच्या जमिनीत आहे. परंतु, या उत्पादनाला १०० पटींनी नफा दिला जात नाही. हा नफा मिळाला असता तर दानवे साहेब याच साल्याने तुम्हाला शेण काढायला ठेवले असते, असा टोला जाधव यांनी लगावला. शेतकऱ्याची किंमत करणाऱ्यांना त्याने पिकविलेले अन्न घेण्याची लायकी नाही, असे ते म्हणाले. मंत्र्यांच्या बंगल्यांवर काचा आणि मंत्र्यांच्या घरांमध्ये अन्नधान्य राहू देणार नाही, असा इशारा जाधव यांनी दिला. डॉ. एस. के पाटील यांनीही यावेळी मनोगत व्यक्त केले. आमचे दाजी (रावसाहेब दानवे) कुठे भेटले तर आम्ही आमचा सातबारा आमच्या बहिणीच्या नावावर करून द्यायला तयार आहोत. दाजींना तुरीचे वरण खाऊ घालायला तयार आहोत. पण कर्जमाफी द्यावी, अशी मागणी पाटील यांनी केली.
मोबाइल अॅप डाउनलोड करा आणि राहा अपडेट
