नाशिककरांच्या मनात अल्पावधीतच स्थान बळकट करणाऱ्या ‘महाराष्ट्र टाइम्स’च्या नाशिक आवृत्तीचा सहावा वर्धापन दिन येत्या गुरुवारी (दि. ८ जून) साजरा होत आहे. त्यानिमित्त विविध सांस्कृतिक व अन्य भरगच्च कार्यक्रमांची मेजवानी घेऊन ‘मटा’ वाचकांच्या भेटीला येत आहे.
‘निष्पक्ष वृत्तपत्र’ अशी वाचकांच्या पसंतीची पावती मिळविणारा ‘मटा’ नाशिकमध्ये ८ जून रोजी सातव्या वर्षात पदार्पण करीत आहे. अल्पावधीतच ‘मटा’ने नाशिककरांचा विश्वास संपादन करीत त्यांच्या मनात अढळ स्थान निर्माण केले आहे. पौराणिक आणि ऐतिहासिक वारसा जोपासणाऱ्या अन् विकासाकडे झेपावणाऱ्या नाशिकनगरीची स्पंदने अलवार टिपली आहेत. आक्रमकपणा तसूभरही कमी होऊ न देता गैरप्रकारांवर कोरडे ओढले. चांगल्याचे कौतुक केले अन् यशाला गवसणी घालणाऱ्यांच्या पाठीवर अभिमानाने कौतुकाची थापही दिली.
--
६ ते १३ जूनदरम्यान रेलचेल
वर्धापन दिनानिमित्त ६ जून ते १३ जून या कालावधीत विविध उपक्रमांची आणि कार्यक्रमांची मेजवानी नाशिककरांना मिळणार आहे. मंत्रभूमी ते यंत्रभूमी असा प्रवास करणाऱ्या अन् सांस्कृतिक ठेवा जपतानाच स्मार्ट बनू पाहणाऱ्या या नगरीने अनेक कलारत्नांना मानसन्मान दिला. या रत्नांनीदेखील नाशिकचा बहुमान वाढविला. ‘मटा’च्या वर्धापन दिन कार्यक्रमात त्यांना एकत्रित करून एक मोठा आर्ट फेस्ट नाशिकमध्ये होणार आहे. कलाकारांच्या कलागुणांना वाव देणे, त्यांना व्यासपीठ उपलब्ध करून देणे आणि नवोदितांच्या पाठीवर शाबासकीची थाप देणे हा या मटा आर्ट फेस्टचा उद्देश आहे. खरं तर ‘मटा’ वर्धापन दिनाला २८ मेपासूनच हॉटेल एक्स्प्रेस इन येथे प्रख्यात गायक जावेद अलींच्या लाइव्ह कॉन्सर्टने रंगारंग सुरुवात झाली आहे. १३ जूनपर्यंत हे कार्यक्रम सुरू राहणार आहेत. यात वाचकांना सहभागी करून घेण्यासाठी हेरिटेज वॉक, वर्धापन दिन सोहळा, नाटक, आर्ट फेस्ट, वर्कशॉप अशी विविधरंगी मेजवानी मिळणार आहे.
---
६ व ७ रोजी हेरिटेज वॉक
आता ६ व ७ जूनला मटा हेरिटेज वॉक होणार आहे. नाशिकमधील विविध ऐतिहासिक स्थळे यात नाशिककरांना पाहायला मिळणार असून, त्याबाबत सखोल मार्गदर्शनही मिळणार आहे.
--
९ तारखेला नाट्यप्रयोग
९ जानेवारी रोजी ‘दोन स्पेशल’ हे बहारदार नाटक महाकवी कालिदास कलामंदिर येथे होणार आहे. ह. मो. मराठे यांच्या न्यूज स्टोरी कथेवर आधारित अथर्व थिएटर्सचे हे नाटक असून, लेखक-दिग्दर्शक क्षितिज पटवर्धन, निर्माता संतोष भरत काणेकर, जितेंद्र जोशी आहेत. या नाटकात गिरिजा ओक-गोडबोले, रोहित हळदीकर, जितेंद्र जोशी यांच्या प्रमुख भूमिका आहेत. रात्री ९ वाजता हे नाटक असून, कल्चर क्लब मेंबरसाठी ३०० रुपयांच्या एका तिकिटावर एक तिकीट फ्री देण्यात येणार आहे. जे कल्चर क्लबचे नवीन मेंबर होतील त्यांच्यासाठी एक कपल पास मोफत देण्यात येईल. ज्यांना नाटक बघावयाचे आहे, परंतु मेंबर नाही अशा वाचकांसाठी तिकीट बुकिंगची स्वतंत्र व्यवस्था राहील.
---
१० व ११ रोजी मटा आर्ट फेस्ट
आर्किटेक्ट कॉलेजमध्ये दि. १० व ११ रोजी दिवसभर मटा आर्ट फेस्ट होणार आहे. त्यात विविध कलांचे डेमो, नृत्य, गायन, वादन, मुलाखती, पेंटिंग, शिल्पकला अशा विविध कलांचा समावेश आहे.
--
१२ तारखेला चित्रकला स्पर्धा
विद्यार्थ्यांसाठी १२ जून रोजी मते लॉन्स, सावरकरनगर (नंदनवन लॉन्स) येथे चित्रकला स्पर्धा होणार आहे. या स्पर्धेसाठी ‘स्मार्ट सिटी’ हा विषय देण्यात आला आहे.
--
१३ रोजी झुम्बा वर्कशॉप
१३ जून रोजी अखिल भारतीय माध्यंदिन ब्राह्मण संस्थेच्या हॉलमध्ये झुम्बा वर्कशॉप होणार आहे. या वर्कशॉपमध्ये प्रतीक हिंगमिरे मार्गदर्शन करणार असून, वर्कशॉपसाठी रजिस्ट्रेशन ठेवण्यात आले आहे. रजिस्ट्रेशनसाठी कमलेश घरटे (मोबाइल- ७०४०७६२२५४) यांच्याशी संपर्क साधावा.
मोबाइल अॅप डाउनलोड करा आणि राहा अपडेट