शहराच्या मध्यवर्ती भागात असलेल्या हुतात्मा स्मारकाला अवकळा आली असून, तातडीने या ठिकाणच्या दुरुस्तीला सुरुवात करावी, अशी मागणी जोर धरत होती. याची दखल घेऊन महापालिकेने या स्मारकाच्या दुरुस्ती कामाची निविदा प्रसिद्ध केली आहे. मात्र, हे काम स्वातंत्र्यसैनिकांना अंधारात ठेवून केले जात असल्याचा थेट आरोप ज्येष्ठ स्वातंत्र्यसैनिक वसंतराव हुदलीकर यांनी केला आहे. त्यामुळे हे काम वादात सापडण्याची चिन्हे आहेत.
स्वातंत्र्य चळवळीचा इतिहास आणि प्रेरणा देणारा साक्षीदार म्हणून हुतात्मा स्मारक ओळखले जाते. याच स्मारकाच्या दुरुस्तीसाठी महापालिकेने निविदा काढली आहे. ७ लाख ४६ हजार ११८ रुपये खर्चून या ठिकाणी दुरुस्तीची कामे केली जाणार आहेत. मात्र, या कामाबाबत हुदलीकर यांनी तीव्र नाराजी व्यक्त केली आहे. हुतात्मा स्मारकात स्वच्छतेसाठी केवळ एका कर्मचाऱ्याची नियुक्ती केली आहे. स्मारकाचे आवार मोठे आणि कर्मचाऱ्यांची संख्या एक असल्याने त्याच्या कामावर ताण पडतो. त्यामुळे हवी तशी स्वच्छता होत नाही. याबाबत महापालिकेत अनेकदा तक्रार करण्यात आली. परंतु, याबाबत काहीही कार्यवाही झालेली नाही.
या ठिकाणी दुरुस्ती करण्याची तयारी काही आमदारांनी दर्शविली होती. परंतु, त्याकडे पुन्हा दुर्लक्ष होत आहे. एका आमदारांनी या ठिकाणचे झाडे तोडून इमारत बांधण्याची तयारी दर्शविली होती. परंतु, स्वातंत्र्यसैनिकांच्या संस्थेने झाडे तोडण्याला मनाई केल्याने हे प्रकरण थांबवावे लागले होते. या ठिकाणची दुरुस्ती हवी आहे. परंतु, येथील झाडाझुडपांना हात लावू, नये असे स्वातंत्र्यसैनिकांचे म्हणणे आहे. महापालिकेने या ठिकाणची नुकतीच पाहणी केली. परंतु, स्वातंत्र्यसैनिकांना विश्वासात घेतले नसल्याचे संघटनेचे म्हणणे आहे. आमच्या गरजेनुसार या ठिकाणी काम होणे आवश्यक आहे, असे हुदलीकर यांनी सांगितले.
--
अशी आहे सद्यस्थिती
या स्मारकाचे काम १९८० मध्ये करण्यात आले. याचा पाया मातीत असल्याने इमारत खचत आहे. अनेकदा काम करूनदेखील पाया मजबूत नसल्याने अडचणींना तोंड द्यावे लागते आहे. त्याचप्रमाणे या ठिकाणच्या फरशा उखडल्या असून, पावसाळ्यात जमिनीखालून पाणी वर येते. सर्व स्मारकाची वायरिंग उखडली असून, बहुतांश लाइटचे पॉइंट बिनकामाचे झाले आहेत. या वायरिंगमुळे शॉक लागून अपघात होण्याची दाट शक्यता आहे. त्याकरिता येथील वायरिंगचे काम तातडीने करणे गरजेचे आहे. दरवाजांसह त्यांच्या फ्रेमही खराब झाल्या आहेत, तेदेखील बदलणे गरजेचे आहे.
--
महापालिका काही तरी काम करणार असल्याचे ऐकिवात आले आहे. याबाबत आमच्याशी संपर्क साधलेला नाही. आम्हाला विचारल्यास डागडुजी न करता सगळे काम करा, असा सल्ला आम्ही देणार आहोत.
-वसंतराव हुदलीकर, ज्येष्ठ स्वातंत्र्यसैनिक
मोबाइल अॅप डाउनलोड करा आणि राहा अपडेट
