म. टा. प्रतिनिधी, नाशिक
उन्हाळ्याच्या दोन महिन्यांच्या सुटीनंतर शहरातील काही शाळा सुरू झाल्या आहेत, तर काही शाळा येत्या आठवड्यात सुरू होणार आहेत. या नव्या शैक्षणिक वर्षात गेल्या काही वर्षांमध्ये पालकांना सामोरे जावे लागत असलेल्या समस्यांनी पुन्हा डोके वर काढले आहे. शालेय साहित्य शाळेकडूनच विकत घेण्याची सक्ती पुन्हा काही शाळा पालकांवर करीत आहेत. अशा स्वरूपाची विक्री केली जाऊ नये, अशा सूचना असतानाही शहरातील शाळांनी आपली दुकानदारी सुरूच ठेवली असल्याचे पुन्हा समोर आले आहे. सेंट फ्रान्सिस स्कूलने या स्वरूपाच्या शालेय साहित्याची विक्री शनिवारीही केल्याच्या तक्रारी पालकांनी केल्या आहेत.
इंग्रजी शाळांची नियमबाह्य फीवाढ, विद्यार्थ्यांना वेगवेगळ्या कारणांनी वेठीस धरण्याचे प्रकार शहरात घडत असतानाच शाळा शालेय साहित्याच्या खरेदीची सक्ती करीत असल्याच्या तक्रारी पालक पुढे आणत आहेत. रंगपेटी, कंपास बॉक्स, पुस्तक-वह्यांचे कव्हर, हस्तकलेचे साहित्य, डिक्शनरी, नकाशे, युनिफॉर्मचा कापडी बेल्ट अशा स्वरूपाचे साहित्य शाळेतूनच घ्यावे, असा दबाव पालकांवर आणला जात आहे. शाळेने कोणत्याही स्वरूपाचे साहित्य विकणे हे नियमबाह्य आहे, हे शहरातील शाळांना प्रशासनाने नवे शैक्षणिक वर्ष सुरू होण्यापूर्वीच पत्राद्वारे कळविले आहे. मात्र, तरीदेखील सेंट फ्रान्सिस शाळेत शालेय साहित्याची विक्री केली गेल्याने शाळा प्रशासनालाही जुमानत नसल्याचे दिसून येत आहे.
शाळांची नफेखोरी
शाळांकडून विकली जात असलेली पुस्तके खासगी प्रकाशकांची असून, शाळेने त्यावर आपल्या सोयीने वाढीव किमतीचे स्टीकर्स चिकटविले आहेत. यातील बरेचशी पुस्तके अनावश्यक असून, ती खरेदी करण्याची सक्ती पालकांवर केली जात आहे. साहित्य विकण्याची परवानगी नसतानाही शहरातील शाळांनी आपली दुकानदारी सुरूच ठेवली आहे. वारंवार याविषयी तक्रारी करूनदेखील प्रशासनाकडून कोणतीही ठोस कारवाई करण्यात येत नसल्याने शाळांचे चांगलेच फावत असल्याच्या प्रतिक्रिया पालक व्यक्त करीत आहेत.
कोणत्याही स्वरूपाच्या शालेय साहित्याची विक्री करू नये, अशी तंबी आम्ही शाळेला दिली आहे. मात्र, तरीदेखील शाळा नियमांचे उल्लंघन करीत असेल, तर याबाबत पडताळणी करून कडक कारवाई केली जाईल. ज्या पालकांवर अशा साहित्य खरेदीची सक्ती झाली आहे त्यांनी पुढे यावे.
-नितीन उपासनी, प्रशासनाधिकारी, महापालिका शिक्षण समिती
--
एप्रिल महिन्यात आम्ही हे साहित्य पालकांना दिले होते. परंतु, प्रशासनाने दिलेल्या सूचनेनंतर आम्ही कोणत्याही स्वरूपाचे साहित्य विकलेले नाही.
-कुसुमा शेट्टी, मुख्याध्यापिका, सेंट फ्रान्सिस स्कूल, तिडके कॉलनी
मोबाइल अॅप डाउनलोड करा आणि राहा अपडेट