टीम मटा
हरित महाराष्ट्र अभियानांतर्गत शनिवारी (दि. १) नाशिक शहरात ठिकठिकाणी विविध संस्थांकडून वृक्षारोपण करण्यात आले. सृष्टीसंवर्धनाचा संदेश देत सरकारी यंत्रणा, सामाजिक संस्था, शाळा-कॉलेजेसनी या चळवळीत सहभाग नोंदविला. शहरातील विविध संस्थांकडून वृक्षारोपणाचे कार्यक्रम घेण्यात आले. तसेच मागील वर्षी लावण्यात आलेल्या झाडांचा वाढदिवस साजरा करण्यात आला. शहर परिसरातील सामाजिक, राजकीय, शैक्षणिक, तसेच अन्य संस्था-संघटनांतर्फे पर्यावरण संवर्धनाचा जागर करून मोठ्या प्रमाणावर वृक्ष लागवड करण्यात आली. अनेकांनी वृक्षारोपण करतानाचे सेल्फीही काढून सोशल मीडियावर शेअर केले.
राज्य सरकारच्या आवाहनाला प्रतिसाद देत नाशिक महानगरपालिका, सोशल नेटवर्किंग फोरम आणि इंडियन मेडिकल असोसिएशन यांच्या संयुक्त विद्यमाने शनिवारी (दि. १) म्हसोबावाडी येथे ५००० रोपांची यशस्वी लागवड करण्यात आली. या वृक्षारोपणासाठी फेसबुक आणि व्हॉटस अॅपवर केलेल्या आवाहनाला उत्स्फूर्त प्रतिसाद देत दीड हजार नाशिककरांनी या वृक्षारोपणास भर पावसात हजेरी लावली.
या अभूतपूर्व प्रतिसादामुळे अतिशय शिस्तबद्ध रितीने केवळ १ तासात ५००० रोपांची योग्य शास्त्रीय पद्धतीने लागवड झाल्याने एका नव्या हरित इतिहासाला सुरुवात झाली आहे. यावेळी उपमहापौर प्रथमेश गीते, शिवाजी गांगुर्डे, आयएमएचे अध्यक्ष मंगेश थेटे, फोरमचे अध्यक्ष प्रमोद गायकवाड, पंकज भदाणे यांच्या प्रमुख उपस्थितीत वृक्षारोपणास सुरुवात करण्यात आली.
दिंडोरी रोडवर आरोग्य विज्ञान पीठामागे नाशिक मनपाची जागा असून, या जागेतील साडे चार एकर जागेवर मागील वर्षी सोशल नेटवर्किंग फोरमने २२०० झाडांची लागवड केली होती. वर्षभर त्यांचे जतन करण्यातही फोरमला यश मिळाले. यातून प्रोत्साहन मिळून यावर्षीही उर्वरित जागेवर वृक्षारोपण करण्याचे ठरले होते. या कामासाठी महापालिकेने जागा उपलब्ध करून देण्यापासून खड्डे खोदणे, रोपे उपलब्ध करून देणे यासाठी सर्वतोपरी सहकार्य केले. या नंतरचे खरे आवाहन या रोपांचे संवर्धन आहे. यासाठी इंडियन मेडिकल असोसिएशन ही वैद्यकीय प्रॅक्टिशनर्स संघटनेने पुढाकार घेतला असून, पावसाळ्यानंतर कायमस्वरूपी पाण्याची व्यवस्था करण्यात येणार आहे. याशिवाय राखण आणि रोपांची दैनंदिन निगा ठेवण्यासाठी रखवालदाराची नेमणूक करण्यात येणार आहे. यासाठी येणाऱ्या खर्चाची जबाबदारी आयएमएच्या सदस्यांनी घेतली आहे. या अभियानाला नागरिकांनी पावसातही उत्स्फूर्त प्रतिसाद दिला.
एकलहरे औष्णिक वीज केंद्र
नाशिकरोड : एकलहरे येथील औष्णिक वीज केंद्रातर्फे आज वृक्षारोपण करण्यात आले. महानिर्मितीचे संचालक (संचलन) चंद्रकांत थोटवे यांच्याहस्ते सुरुवात झाली. केंद्राचे मुख्य अभियंता उमाकांत निखारे, मनुष्यबळाचे मुख्य अभियंता भिंताडे, वितरणच्या मुख्य अभियंता पगारे, उपमुख्य अभियंता राजेंद्र खालापूरकर, सुनील इंगळे, अधीक्षक अभियंता राजेशकुमार कमटमकर, मनोहर तायडे, नितीन पुणेकर, माशळकर, लीना पाटील, सूर्यकांत पवार, कल्याण अधिकारी निवृत्ती कोंडवले, उपमुख्य अभियंता राजेश मोराळे आदींची प्रमुख उपस्थिती होती. शासनाने या केंद्राला ९३३ झाडे लावण्याचे उद्दिष्ट दिले होते तेही पूर्ण करण्यात आले. विविध बारा कर्मचारी संघटनांनी मिळून बाराशे झाडे लावली.
'पर्यावरणात झाडे बजावतात महत्त्वाची भूमिका'
देवळाली कॅम्प : महाराष्ट्र हे कृषिप्रधान राज्य आहे त्यात पर्यावरणात झाडे महत्त्वाची भूमिका बजावत असतात. राज्य शासनाने ४ कोटी वृक्ष लागवड करण्याचे यंदा केलेल्या संकल्पास आपण हातभार लावत असल्याचे प्रतिपादन महाराष्ट्र शासनाचा वनश्री पुरस्कारप्राप्त तानाजी भोर यांनी केले. ओम साई राम सेवाभावी संस्था व भोर नर्सरी यांच्या संयुक्त विद्यमाने कृषी दिनाचे औचित्य साधत शनिवारी (दि. १) येथील नूतन माध्यमिक विद्या मंदिरात बदाम, काशिद, रेन ट्री, गुलमोहर, कडुलिंब सारख्या ५० वृक्षांचे रोपण करण्यात आले.यावेळी मुख्याध्यापिका लता जोशी, अशोक बोराडे, जितेंद्र भावसार, अनिल ढोकणे, जितेंद्र पावशे, देविदास आंबेकर, अनिल कपडे, संदीप गायकवाड आदी उपस्थित होते.
महावितरणतर्फे वृक्षांचा वाढदिवस साजरा
नाशिकरोड : जेलरोड परिसरातील शिवाजीनगर येथील स्काडा सेंटरच्या आवारात मुख्य अभियंता दीपक कुमठेकर यांच्या हस्ते वृक्ष लागवड मोहिमेची सुरुवात झाली. या मोहिमेत नाशिक व नगर जिल्ह्यातील महावितरणच्या विविध कार्यालयांच्या परिसरात जवळपास सात हजार वृक्षांची लागवड होईल. तसेच या वृक्षांचे संवर्धन करण्याची जबाबदारी निश्चित करण्यात आली आहे. गतवर्षी राबविलेल्या मोहिमेतील बहुतांश वृक्ष सुस्थितीत आहेत. यातील काही वृक्षांचा वाढदिवस शनिवारी (दि. १) साजरा करण्यात आला. नाशिक शहर विभाग-२ कार्यालय परिसरातील वृक्षाजवळ केक कापून वाढदिवस साजरा करतानाच नवीन वृक्षाचे संगोपन करण्याचा संकल्प करण्यात आला. याप्रसंगी अधिकारी, कर्मचारी उपस्थित होते.
मोबाइल अॅप डाउनलोड करा आणि राहा अपडेट
