कधी मुसळधार पडणारा पाऊस तर कधी रिमझीम पडणारी हलकी सर अंगावर झेलत तरुणाईचे जत्थे रविवारी पर्यटनासाटी जात होते. रविवारी सुट्टीची पर्वणी साधत अनेक लहान-मोठ्यांनी पावसाळी पर्यटनाचा आनंद लुटला.
रविवारचा दिवस कारणी लागावा यासाठी कुटुंबीयांसमावेतही अनेकजण सकाळपासूनच पर्यटनाला निघाले होते. नाशिकपासून जवळच असलेल्या इगतपुरी परिसारातील निसर्ग पहाण्यासाठी अनेकांनी गर्दी केली होती. या परिसरातील धबधबे पावसाळ्यात पर्यटकांचे लक्ष वेधून घेत असतात. काही पर्यटकांनी अप्पर वैतरणा धरण, भंडारदरा धरण, खोडाळा, सुंदरनारायण गणेश मंदिर याशिवाय कुलंग, अलंग, मदनगड, कळसूबाई, रतनगड या उत्तुंग डोंगररांगा, तसेच सांदण दरी, रंधा धबधबा या ठिकाणीदेखील जाणे पसंत केले. त्याचप्रमाणे कसारा घाटाजवळ भातसा रिव्हर व्हॅली, उंट दरी, पाच धबधबे या ठिकाणीही ना‌शिककरांनी आपला मोर्चा वळवला. कसारा घाटातील धुके अनुभवणे हा तर एक रोमांचकारी अनुभव असतो. सकाळपासूनच अनेक तरुण धुके अनुभवण्यासाठी हायवेवर उभे होते.
नाशिक जिल्ह्यातील कळवणजवळील हतगड परिसरात असलेला भिवतास धबधबा गुजरात व महाराष्ट्राच्या पर्यटकांचे आकर्षण आहे. नाशिकहून हतगड ओझरखेड धरण ओलांडल्यानंतर कळवण तालुक्याच्या हद्दीतील हे निसर्गरम्य ठिकाण दोन्ही राज्यातील पर्यटकांसाठी पर्वणी ठरते. पावसाळ्यात भिवतास धबधबा ओसंडून वाहत असून, गर्द हिरवाईतून वाहणारा हा धबधबा बघून पर्यटक सुखावत आहेत. जवळच हतगड, सापुतारा हे अवघ्या सहा किलोमीटर अंतरावरील निसर्गरम्य स्थळे पाहण्यासाठीदेखील गर्दी होत आहे.
दुगारवाडी, पेगलवाडीला गर्दी
त्र्यंबकेश्वर तालुक्यात येणारा दुगारवाडी धबधबा पर्यटकांच्या पसंतीचे ठिकाण आहे. त्र्यंबकेश्वर मंदिराजवळच असलेली पेगलवाडी, पहिने ही गावे पावसाळ्यात बघण्यासारखी असतात. एका दिवसात परत येण्याची ठिकाणे म्हणून यालादेखील नाशिककर पसंती देत असतात. रविवारी दुगारवाडीचा धबधबा ओसंडून वाहत होता. या भागातील डोंगरमाथ्यावरून वाहणारे धबधबे, गर्द हिरवाईने नटलेला परिसर आणि हिरवाईने पांघरलेला शालू व अधूनमधून संततधार कोसळणारा पाऊस असे हे निसर्गरम्य वातावरण पर्यटकांना मोहित करत होते. नाशिक जिल्ह्यात कोकणाचे सौंदर्य अनुभवास येत होते.
सर्वात जास्त गर्दी नाशिक शहरापासून अवघ्या दहा किलोमीटर अंतरावर असलेल्या सोमेश्वर धबधब्यावर झाली होती. पावसाळ्यात दुथडी भरून वाहणारी दक्षिणगंगा अर्थात गोदावरी नदीचे रूप याठिकाणी बघण्यासारखे असते. या नदीवरील सोमेश्वर धबधबा हे नाशिककरांचे पसंतीचे ठिकाण आहे. याच धबधब्याला दूधसागर धबधबाही म्हणतात. या धबधब्याचे वैशिष्ट्य म्हणजे खडकावरून कोसळणारे पाणी व रुंदी अधिक असल्यामुळे नयनमनोहर दृश्य बघावयास मिळते. जास्त रुंदीचा धबधबा म्हणून तो परिचित आहे. पावसाची संततधार असल्याने गोदावरीला चांगले पाणी आले होते. ज्या लोकांना पर्यटनासाठी बाहेर जाणे जमले नाही, अशा लोकांनी गोदाघाटावर जाऊन पाण्याचा आनंद लुटला. बाहेरगावचे अनेक पर्यटक नदीला आलेल्या पाण्यात आनंद घेत होते.
मोबाइल अॅप डाउनलोड करा आणि राहा अपडेट
