वेगवेगळ्या गुन्ह्यांत सहभागी असलेल्या, तसेच जामिनावर सुटलेल्या गुन्हेगारांनी सोशल मीडियावर साम्रज्य पसरविले आहे. अशा आरोपींच्या अकाउंट्सवर पोलिसांची नजर पडली असून, त्यांची सविस्तर चौकशी पोलिसांनी सुरू केली आहे. विशेषतः संशयितांच्या क्लोज फ्रेंड्सना पोलिसांनी रडारवर घेण्याचे ठरविले आहे. त्यामुळे अशा संशयितांच्या पोस्ट लाइक्स करण्यासह त्यांच्या अकाउंटपासूनही सर्वसामान्यांनी चार हात दूरच राहणे फायद्याचे ठरेल, असे पोलिस आयुक्त डॉ. रवींद्रकुमार सिंगल यांनी सांगितले.
पंचवटीतील संशयित गुन्हेगार जया दिवे यास हत्या प्रकरणी अटक केल्यानंतर पोलिसांनी हा अॅक्शन प्लॅन तयार केला आहे. दिवे फेसबुकवर अॅक्टिव असून, त्याच्या फ्रेंडलिस्टमध्ये जवळपास पाच हजार जणांचा समावेश आहे. हत्या व इतर गंभीर गुन्हे नावे असलेल्या दिवेचे मित्र नक्की कोण, असा प्रश्न पोलिसांना पडला. त्यादृष्टीने पोलिसांनी चौकशी सुरू केली. याबाबत बोलताना आयुक्त डॉ. सिंगल यांनी सांगितले, की सोशल मीडियाचा दुरुपयोग करण्याचे प्रमाण वाढले असून, यात काही सराईत गुन्हेगारांचा समावेश धक्कादायक आहे. नावावर अनेक गंभीर गुन्हे असलेले सराईत गुन्हेगार फेसबुकसह इतर सोशल मीडियावर विविध फोटोग्राफ्स, व्हिडीओ शेअर करतात. तलवारीने केक कापणे हा असाच एक प्रकार आहे. अशा बाबी लाइक करून संशयितांना प्रोत्साहित करण्याचे काम केले जाते. संशयिताच्या पोस्टवर कॉमेंट्स करणारे आणि लाइक करणारे हे आरोपींच्या अधिक जवळचे असण्याची शक्यता आहे. किंबहुना गुन्हेगारांसोबत तेही एखाद्या गुन्ह्यात सहभागी असण्याची शक्यता नाकारता येत नाही. या पार्श्वभूमीवर सराईत गुन्हेगारांनी निर्माण केलेले सोशल कनेक्टचे नेटवर्क रडारवर घेण्यात आल्याचे डॉ. सिंगल यांनी स्पष्ट केले. पोलिसांनी फेसबुक फ्रेंड्सना लक्ष्य केले असून, त्यांची माहिती गोळा करण्याचे काम सायबर सेलच्या माध्यमातून सुरू करण्यात आले आहे. अनेक सराईत गुन्हेगारांच्या फॉलोअर्सच्या याद्या तयार करण्यात आल्या असून, लवकरच त्यांची चौकशी सुरू करण्यात येणार असल्याचे आयुक्तांनी स्पष्ट केले. दरम्यान, दिवेच्या किमान ५० मित्रांची यादी तयार करण्यात आली असून, त्यांचीही चौकशी सुरू असल्याचे यावेळी स्पष्ट करण्यात आले.
--
मोक्काच्या दोन केस प्रस्तावित
सराईत गुन्हेगारांना मदत करणाऱ्यांना कायद्याच्या कचाट्यात ओढण्यासाठी शक्य ते प्रयत्न सुरू असल्याचे पोलिस आयुक्तांनी सांगितले. सध्या मोक्काच्या दोन केस प्रस्तावित असून, त्यात सराईत गुन्हेगारांना आर्थिक, तसेच इतर प्रकारची मदत करणाऱ्यांचा गुन्हेगार म्हणून समावेश करण्यात येत असल्याचे डॉ. सिंगल यांनी स्पष्ट केले. विशेषतः राजकीय पार्श्वभूमी असलेल्या व्यक्तींनी सराईत गुन्हेगारांपासून दूरच राहावे, असा सूचनावजा इशारा यापूर्वीच दिला असल्याचेही त्यांनी सांगितले.
--
सोशल मीडियाचा वापर जबाबदारीने व्हायला हवा. सोशल मीडियावर लाइक, तसेच कॉमेंट करण्यापूर्वी सदर व्यक्ती कोण आहे ते पाहावे. आपल्या एका कृतीमुळे कोणाला काय फायदा होतो, हे तपासूनच व्यक्त व्हावे.
-डॉ. रवींद्रकुमार सिंगल, पोलिस आयुक्त
मोबाइल अॅप डाउनलोड करा आणि राहा अपडेट
