औद्योगिक विकास महामंडाळाने अंबड एमआयडीसीत दोनशे लघु व मध्यम गाळ्यांचा प्रकल्पाची उभारणी केली असून, येथील दोनशे गाळ्यांचा प्रकल्प महिनाभरात कार्यान्वित होणार असल्याचे एमआयडीसीच्या प्रादेशिक अधिकारी हेमांगी पाटील यांनी ‘मटा’ला सांगितले. त्यामुळे भाडेतत्त्वावरील जागेत उद्योग-व्यवसाय करणाऱ्यांना दिलासा मिळणार असल्याचेही त्यांनी सांगितले. मात्र, या गाळ्यांचे दर बाजारभावापेक्षा जास्त असल्याचे उद्योजकांचे म्हणणे आहे. एमआयडीसीने उद्योजकांना परवडतील असे दर करावेत, अशी मागणी उद्योजकांनी केली आहे.
निमा, आयमा, लघु उद्योग भारती, निवेक, नाइस यांच्यासह इतरही औद्योगिक संघटनांनी लघु, मध्यम उद्योजक व भाडेकरूंना गरजेप्रमाणे एमआयडीसीने गाळे उपलब्ध करून द्यावेत, अशी मागणी केली होती. औद्योगिक संघटनांची मागणी लक्षात घेता एमआयडीसीने अंबड एमआयडीसीत दोनशे गाळ्यांचा प्रकल्पाचे काम हाती घेतले होते. निमा, आयमाचे माजी अध्यक्ष धनंजय बेळे यांनी भाडेधारकांना एमआयडीसीने गाळे उपलब्ध करून द्यावेत यासाठी उद्योजकांना बरोबर घेत आंदोलनही छेडले होते. उद्योजकांची मागणी लक्षात घेता एमआयडीसीने दोनशे गाळ्यांचा प्रकल्प हाती घेतल्याने उद्योजकांनी समाधान व्यक्त केले होते.
अंबड एमआयडीसीत सुरू असलेला दोनशे गाळ्यांचा प्रकल्प महिनाभरात कार्यान्वित होणार असल्याने गेल्या अनेक वर्षांपासून भाडेतत्त्वावर उद्योग-व्यवसाय करणाऱ्यांना त्याचा लाभ होणार आहे. मात्र, एमआयडीसीने उभारलेल्या गाळ्यांचे दर बाजारभावापेक्षा जास्त असल्याचे निमा, आयमाचे माजी अध्यक्ष धनंजय बेळे यांनी म्हटले आहे. उद्योजकांना परवडतील अशा दरातच एमआयडीसीने गाळे द्यावेत, अशी मागणी बेळे यांनी नुकत्याच झालेल्या ‘झूम’च्या बैठकीत केली होती.
--
एमआयडीसीने नव्याने उभारलेल्या गाळ्यांचे दर बाजारभावापेक्षा अधिक आहेत. उद्योजकांना परवडतील अशा दरात एमआयडीसीने गाळे देण्याची गरज आहे. असे झाले, तरच खऱ्या अर्थाने सर्वांना या गाळ्यांच्या उपयोग होऊ शकेल. अन्यथा बरेच जण स्वतःच्या गाळ्यांपासून वंचित राहू शकतील.
-धनंजय बेळे, माजी अध्यक्ष, आयमा
--
लघू, मध्यम व भाडेतत्त्वावर उद्योग-व्यवसाय करणाऱ्यांची अनेक वर्षांपासून गाळ्यांची मागणी होती. त्यातच निमा, आयमा या औद्योगिक संघटनांच्या मागणीवरून दोनशे गाळ्यांचा प्रकल्प एमआयडीसीने बांधला आहे. महिनाभरात गाळ्यांचे काम पूर्ण होणार असून, गरजू उद्योजकांना त्यांचा लाभ मिळणार आहे.
-हेमांगी पाटील, प्रादेशिक अधिकारी, एमआयडीसी
मोबाइल अॅप डाउनलोड करा आणि राहा अपडेट