शेतकऱ्यांना सरसकट कर्जमुक्ती द्या, एकच नारा सातबारा कोरा अशा घोषणा देत विविध मागण्यांसाठी शेतकरी संघटनांच्या सुकाणू समितीतर्फे जिल्ह्यात सोमवारी सकाळी १० ते ११ दरम्यान चक्का जाम आंदोलन करण्यात आले. नैताळे येथे शेतकऱ्यांनी पोलिसांच्या दबंगगिरीविरुद्ध गाव बंद केले, तर मनमाड येथे लिलाव बंद पाडले. गिरणारे येथे वीजबिलांची होळी करण्यात आली, तर महिरावणी येथे ट्रॅक्टर आडवे करून आंदोलन करण्यात आले. आंदोलनामुळे जिल्हाभरातील वाहतूक काही काळ ठप्प झाली होती. मनमाड येथे चारशेहून अधिक जणांनी आंदोलनात सहभाग घेत लिलाव बंद पाडले.
स्वातंत्र्यदिनी पुन्हा आंदोलन
जिल्हा पातळीवर १५ ऑगस्ट रोजी पालकमंत्र्यांऐवजी शेतकऱ्यांच्या हस्ते ध्वजवंदन व्हावे, अशी सुकाणू समितीची भूमिका आहे. महाराष्ट्रातील शेतकऱ्यांना संपूर्ण कर्जमुक्ती दिलेली नाही. शेतकऱ्यांच्या आत्महत्यांना राज्य सरकारचे धोरण जबाबदार आहे. त्यामुळे ध्वजवंदन शेतकऱ्यांच्या हस्ते व्हावे, यासाठी पालकमंत्र्यांना ध्वजवंदन करण्यापासून रोखणार असल्याचे समितीने स्पष्ट केले.
घोटीत आंदोलन
घोटी ः इगतपुरी तालुक्यातील घोटी महामार्गावर आज भाकपा, शेतकरी सुकाणू समिती, समृद्धी महामार्ग हटाव कृती समिती व शेतकरीसमर्थक नेत्यांच्या उपस्थितीत सोमवारी घोटी टोल नाका चौफुलीवर चक्का जाम आंदोलन करण्यात आले. या वेळी ‘एकच नारा, सातबारा कोरा’, ‘समृद्धी महामार्ग हटाव’, ‘कामगारांचे प्रश्न मार्गी लावा’ आदी घोषणा देऊन शासन व प्रशासनाचे लक्ष वेधण्यात आले. या वेळी तहसीलदार अनिल पुरे यांच्याकडे निवेदन देण्यात आले. घोटी टोल नाका चौफुलीवर देवीदास आडोळे, दौलत दुभाषे, पांडुरंग वारुंगसे, उमेश खातळे, भास्कर गुंजाळ, कांतिलाल गरुड यांनी आपल्या मागण्या सरकारकडे मांडल्या. या वेळी पोलिसांचा ताफा तैनात करण्यात आलेला होता.
चांदोरी चौफुली जाम
निफाड ः सातबारा कोरा करा या मागणीसाठी निफाड तालुक्यातील शेतकऱ्यांनी नाशिक-औरंगाबाद चौफुलीवर सकाळी दहा वाजता चक्का जाम आंदोलन करण्यात आले. शेतकरी कर्जमाफी सुकाणू समितीचे सदस्य करण गायकर यांच्या नेतृत्वाखाली झालेल्या या आंदोलनामुळे सकाळी रस्त्यावरील वाहतूक एक तास ठप्प होती. आंदोलनात माजी आमदार दिलीप बनकर, जिल्हा परिषदेचे सदस्य सिद्धार्थ वनारसे, राष्ट्रवादीचे तालुकाध्यक्ष अनिल कुंदे, शिवाजी मोरे, जिल्हा परिषदेचे सदस्य सुरेश कमानकर, राजेंद्र बोरगुडे आदींसह शेतकरी सहभागी झाले होते. या वेळी गायकर यांच्यासह ३६ आंदोलकांना पोलिसांनी ताब्यात घेतले. काही वेळाने त्यांना सोडून देण्यात आले.
नैताळे येथे बंद
निफाड ः यापूर्वी झालेल्या शेतकरी आंदोलनात अग्रभागी असलेल्या नैताळे येथील शेतकऱ्यांवर निफाड पोलिसांनी गुन्हे दाखल करून त्यांना बेदम मारहाण केली होती. आता पुन्हा त्याच शेतकऱ्यांना व शेतकरी संघाचे जिल्हाध्यक्ष राजेंद्र बोरगुडे व अन्य शेतकऱ्यांना निफाड पोलिस ठाण्यात बोलावून पोलिस अधिकाऱ्यांनी दमबाजी केल्याचे बोरगुडे यांनी सांगितले. नोटिसा दिल्या असून, तडीपार करण्याची धमकी दिल्याने नैताळे व परिसरातील शेतकऱ्यांनी संताप व्यक्त केला आहे. पोलिसांच्या या दमबाजीच्या निषेधार्थ नैताळे शहरातील व्यावसायिकांनी सोमवारी शंभर टक्के बंद ठेवला होता.
शेतकरी संघटना लांबच!
कळवण ः राज्य सरकारने कर्जमाफीची करूनही राज्यातील व कळवण तालुक्यातील शेतकरी बांधवांना या योजनेचा लाभ न झाल्याने या फसव्या कर्जमाफीविरोधात सोमवारी कोल्हापूर फाटा येथील प्रशासकीय इमारतीसमोर कळवण तालुक्यातील शेतकऱ्यांनी चक्का जाम आंदोलन केले. या वेळी तहसीलदार कैलास चावडे यांना विविध मागण्यांचे निवेदन देण्यात आले. कळवण येथील प्रशासकीय इमारतीसमोर कोल्हापूर फाटा, मानूर येथे मार्क्सवादी कम्युनिस्ट पक्षाच्या नेतृत्वाखाली चक्का जाम आंदोलन करण्यात आले. आंदोलनाला सीपीएमचे नेते सावळीराम पवार, हेमंत पाटील यांनी मार्गदर्शन केले. आंदोलनात शेतकरी संघटनेचे व स्वाभिमानी शेतकरी संघटनेचे पदाधिकारी व कार्यकर्त्यांचा सहभाग दिसला नाही.
मनमाडला लिलाव बंद पाडले
मनमाड : नाशिक जिल्हा किसान सभेतर्फे मनमाड येथे मालेगाव चौफुली येथे सोमवारी सकाळी दहा वाजता रास्ता रोको आंदोलन करण्यात आले. बाजार समिती येथे कांदा लिलाव बंद पडून किसान सभा पदाधिकारी व शेतकऱ्यांनी चौफुलीवर जाऊन ४० मिनिटे रास्ता रोको केला. त्यामुळे मालेगाव व शिर्डीकडे जाणारी वाहतूक ठप्प झाली होती. रस्त्याच्या दुतर्फा वाहनांच्या रांगा लागल्या होत्या. आंदोलनात किसान सभेचे राजू देसले, देविदास भोपळे, विजय दराडे, अॅड. साधना गायकवाड, दामूअण्णा पाटील, नाना बच्छाव, विजय दराडे आदींसह शेतकरी सहभागी झाले होते. मंडल अधिकारी कैलास चौधरी व पोलिस निरीक्षक पुंडलीक सपकाळे यांना मागण्यांचे निवेदन देण्यात आले.
नांदगावला चक्का जाम
स्वाभिमानी शेतकरी संघटनेने नांदगाव येथे सोमवारी सकाळी हुतात्मा चौकात चक्का जाम आंदोलन केले. या वेळी राज्य सरकारचा निषेध करण्यात आला. तहसीलदार चंद्रकांत देवगुणे व पोलिस निरीक्षक बशीर शेख यांना स्वाभिमान संघटनेचे जिल्हा युवा उपाध्यक्ष नीलेश चव्हाण, विशाल वडघुले, शिवाजी जाधव, देविदास देवरे आदींनी निवेदन दिले.
मोबाइल अॅप डाउनलोड करा आणि राहा अपडेट
