शतपावलीसाठी घराबाहेर पडलेल्या मायलेकींपैकी आईच्या गळ्यातील मंगळसूत्र चोरट्यांनी तोडून पोबारा केला. ही घटना अशोका मार्ग परिसरात घडली. या प्रकरणी मुंबई नाका पोलिसांनी जबरी चोरीच्या गुन्ह्याची नोंद केली आहे.
प्रीती सागर उत्तरवार (रा. टागोरनगर, रविशंकर मार्ग) यांनी दिलेल्या फिर्यादीनुसार, प्रीती, तसेच त्यांची आई छाया व्यवहारे मंगळवारी रात्री आठच्या सुमारास जेवण आटोपून फेरफटका मारण्यासाठी घराबाहेर पायी निघाल्या होत्या. अशोका मार्गावरील चैत्रपालवी इमारतीसमोर दुचाकीवर आलेल्या चोरट्यांनी व्यवहारे यांच्या गळ्यातील सुमारे ३० हजार रुपये किमतीचे मंगळसूत्र खेचून नेले. सहाय्यक निरीक्षक शिंदे तपास करीत आहेत.
लाखाचा ऐवज लंपास
शहरात तीन घरफोड्या झाल्याचे समोर आले असून, त्यात भरदिवसा झालेल्या घरफोडीचा समावेश आहे. सिडकोतील खुटवडनगर भागात राहणाऱ्या निशा विक्रम दळवी (रा. रमा अपार्टमेंट) कुटुंबीयांसह दिवाळीनंतर बाहेरगावी गेल्या होत्या. चोरट्यांनी घरात कोणी नसल्याची संधी साधत, त्यांच्या फ्लॅटचा दरवाजा उचकटून हॉलमधील एलसीडी व कपाटात ठेवलेल्या सोन्या-चांदीच्या दागिन्यांसह सुमारे ४९ हजार रुपयांचा मुद्देमाल लंपास केला. या प्रकरणी अंबड पोलिसांनी गुन्हा दाखल केला असून, उपनिरीक्षक देवरे तपास करीत आहेत. घरफोडीची दुसरी घटना दिंडोरी रोड भागात घडली. प्रसाद शंकर शिरसाठ यांच्या जामखेडे मळ्यातील गणेश मंदिरासमोरील बंद बंगल्याच्या खिडकीचे लोखंडी गज वाकवून चोरट्यांनी आत प्रवेश केला. शेगडी, गॅस सिलिंडर, मिक्सर ग्राइंडर, दोन टेबल फॅन, नळ, पितळी समया असा सुमारे १७,५०० रुपयांच्या संसारोपयोगी वस्तू लंपास केल्या. घरफोडीची घटना २४ ऑक्टोबर रोजी सायंकाळी उघडकीस आली. या प्रकरणी पंचवटी पोलिसांनी गुन्ह्याची नोंद केली असून, हवालदार साळवे तपास करीत आहेत. दरम्यान, पाथर्डी फाटा भागातील स्वप्निल कमलाकर सुलक्षणे (रा. रसोदे संकुल, वासननगर) यांचे घरदेखील चोरट्यांनी फोडले. सुलक्षणे कुटुंबीय मंगळवारी परगावी गेले असल्याचा फायदा घेत चोरट्यांनी घराचा कडीकोयंडा तोडून घरातील एलसीडी टीव्ही व कपाटातील रोकड असा सुमारे ४४,५०० रुपयांचा मुद्देमाल लंपास केला. सहायक पोलिस उपनिरीक्षक गोसावी तपास करीत आहेत.
तडीपारास अटक
तडीपार करूनही शहरात वास्तव्य करणाऱ्या संतोष माने या सराईतास पोलिसांनी अटक केली. या प्रकरणी अंबड पोलिसांनी गुन्हा दाखल केला असून, ही कारवाई क्राइम ब्रँचच्या युनिट दोनच्या पथकाने केली.
तडीपार संतोष बबन माने (रा. माऊली चौक, दत्तनगर) याच्यावर वेगवेगळ्या पोलिस स्टेशनमध्ये अनेक गंभीर गुन्हे दाखल आहेत. त्यामुळे मानेला शहर पोलिसांनी एका वर्षासाठी शहर व जिल्ह्यातून तडीपार केले. मात्र, मानेने शहरातच मुक्काम ठोकला. मानेच्या वास्तव्याबाबत पोलिसांना माहिती मिळाली होती. बुधवारी, १ नोव्हेंबर रोजी माने अंबड एमआयडीसीतील एक्स्लो पॉइंट परिसरात येताच, त्याच्या मुसक्या आवळण्यात आल्या.
चार झाडांची कत्तल
वडनेरसह वडनेर गेट परिसरातील भररस्त्यावर असलेली पिंपळ व भेंडीची चार झाडे चोरट्यांनी कापून नेली. या प्रकरणी लाकूड तस्करांविरुद्ध उपनगर पोलिसांनी भारतीय वन अधिनियमान्वये गुन्हा दाखल केला आहे. बबन तुळशीराम कटारे (रा. श्रीपादकृपा अपार्टमेंट, कलानगर) यांनी दिलेल्या फिर्यादीनुसार, ५ ते १२ ऑगस्टदरम्यान ही झाडे तोडण्यात आली. आरोपींनी रस्त्यावरील एक पिंपळाचे आणि तीन भेंडीची झाडे तोडून लाकूड घेऊन गेले. हवालदार काकड तपास करीत आहेत.
अधिकाऱ्यास धक्काबुक्की
मुलीचे लर्निंग लायसन्स तत्काळ मिळावे, या मागणीसाठी आरटीओ कार्यालयात गोंधळ घालत सहाय्यक प्रादेशिक अधिकाऱ्यास एकाने धक्काबुक्की केली. हा प्रकार बुधवारी घडला असून, या प्रकरणी पंचवटी पोलिसांनी शासकीय कामात अडथळा आणल्याप्रकरणी गुन्हा दाखल केला आहे. सुरेय वल्लभ अग्रवाल (रा. गजानन पार्क) याच्याविरोधात हा गुन्हा दाखल करण्यात आला आहे. बुधवारी अग्रवाल आपल्या मुलीला सोबत घेऊन लर्निंग लायसन्स काढण्यासाठी आरटीओ कार्यालयात गेले होते. या वेळी त्यांनी लायसन्सची मागणी केली. मात्र, गर्दी असल्याने अधिकाऱ्यांनी त्यांना रांगेत उभे राहण्यास सांगितले. यानंतर अग्रवाल यांनी वरिष्ठांना गाठले. मात्र, तेथेही गोंधळ झाला. सहाय्यक प्रादेशिक अधिकारी राहुल कदम यांनी अग्रवाल यांना समजावून सांगण्याचा प्रयत्न केला असता, त्यांनी कदम यांना धक्काबुक्की केली. उपनिरीक्षक जगदाळे तपास करीत आहेत.
पल्सरस्वारांनी मोबाइल पळविला
रस्त्याने मोबाइलवर बोलत चाललेल्या तरुणाच्या हातातील मोबाइल पल्सरवरील चोरट्यांनी खेचून नेला. नगरकर कॅन्सर हॉस्पिटल भागात ही घटना घडली. या प्रकरणी मुंबई नाका पोलिसांनी गुन्ह्याची नोंद केली आहे. रूपेश शिवाजी शिरसाठ (वय १६, रा. श्रीजी पॅलेस, द्वारका) या तरुणाने या प्रकरणी तक्रार दिली आहे. रूपेश सरोज ट्रॅव्हल्स कार्यालयाकडून रविवारी रात्री नऊ वाजेच्या सुमारास मोबाइलवर बोलत सिटीकेअर हॉस्पिटलच्या दिशेने पायी जात होता. समोरून आलेल्या पल्सरस्वारांनी त्याच्या हातातील सुमारे १८ हजार रुपयांचा मोबाइल हिसकावून पोबारा केला.
मोबाइल अॅप डाउनलोड करा आणि राहा अपडेट
