हल्लीच्या युगात लहान मुले मोबाइल, कॉम्प्युटरसमोर बसलेली असल्याचे दिसून येते. मात्र, काही पालकांच्या जागरूकतेमुळे लहान वयातच मुलांना निसर्गाच्या सान्निध्यात ट्रेकिंग करण्याची आवड निर्माण होत असल्याचीही उदाहरणे आहेत. नाशिकमधील साडेसहा वर्षांचा श्रीरंग व नऊ वर्षांची अयाना माने हे दोन चिमुकले त्यापैकीच असून, त्यांनी जगप्रसिद्ध एव्हरेस्ट बेस कॅम्प हा अत्यंत खडतर मानला जाणारा ट्रेक पूर्ण केला.
गेल्या महिन्यात पंचवीस भारतीय ट्रेकर्स या ट्रेकसाठी काठमांडू येथे गेले होते. मुंबई, नागपूर, बेंगळूरू, हैदराबाद, म्हैसूर अशा वेगवेगळ्या ठिकाणांहून काही अनुभवी, तर काही नवखे ट्रेकर्स या ट्रेकमध्ये सहभागी झाले होते. यामध्ये नाशिकमधील युरो किड्स इंटरनॅशनल प्री-स्कूलच्या मुख्याध्यापिका सुचित्रा माने, विश्वनाथ माने व त्यांची मुले श्रीरंग व अयाना सहभागी झाले होते. माने दाम्पत्य नियमित ट्रेकिंग करतात. यावेळी आपल्या मुलांनीही ट्रेकिंगमध्ये सहभाग घ्यावा, या भूमिकेतून त्यांनी मुलांना प्रोत्साहन दिले. एव्हरेस्ट बेस कॅम्प समुद्र सपाटीपासून १७ हजार ५९८ फूट (५ हजार ३६४ मीटर) उंचीवर आहे. दहा वर्षांखालील अतिशय मोजक्या मुलांनी ही ट्रेक पूर्ण केल्याचे माने दाम्पत्याने सांगितले.
हा सोळा दिवसांचा ट्रेक आहे. रोज किमान सहा ते सात तास चालावे लागते. जसजसे आपण समुद्र सपाटीपासून उंच जातो तसतसे वातावरणातील प्राणवायूचे प्रमाण कमी होत जाते. त्यामुळे श्वसनाचा त्रास, डोकेदुखी, मळमळ यांसारखा त्रास होताे. या सगळ्यावर मात करून या दोन चिमुकल्यांनी हा ट्रेक पूर्ण केला आहे. त्यांच्याबरोबर नागपूरची बारावर्षीय तानिया पटवर्धन व तेरावर्षीय रिया सोलंकी यांनीही हा ट्रेक यशस्वीपणे पूर्ण केला.
--
मुलांमध्ये कमालीची क्षमता असते. पालकांनी ती ओळखण्याची गरज असते. त्यांना योग्य ती संधी उपलब्ध करून दिल्यास मुले उल्लेखनीय कामगिरी करू शकतात.
-सुचित्रा माने, पालक
--
या ट्रेकसाठी तीन महिन्यांपासून आम्ही मुलांची तयारी करवून घेतली होती. रोज सहा ते आठ किलोमीटर चालणे, जिन्यांची चढ-उतर आदी प्रकारांचा त्यात समावेश होता.
-विश्वनाथ माने, पालक
मोबाइल अॅप डाउनलोड करा आणि राहा अपडेट
