म. टा. खास प्रतिनिधी, नाशिक
नाशिकला निसर्गाच मोठ वरदान असून शहरात विकासाची मोठी क्षमता आहे. त्यामुळे शहर स्मार्ट करण्यासाठी लोकप्रतिनिधी, अधिकाऱ्यांचे एकत्रित प्रयत्न तसेच सूक्ष्म नियोजन आवश्यक आहे. स्मार्ट नाशिकसाठी लोकसहभागही महत्त्वाचा असून, त्यासाठी सर्वांनी एकत्र यावे, असे आवाहन पालकमंत्री तथा वैद्यकीय व जलसंपदा मंत्री गिरीश महाजन यांनी केले. नाशिक हे परिपूर्ण असल्याने राज्यातील पहिले स्मार्ट शहर म्हणून नाशिकला उदयास आणू, असा विश्वासही महाजन यांनी व्यक्त केला. भविष्यात ‘स्मार्ट शहर’ अशी ओळख प्रस्थापित करण्यात नाशिक यशस्वी ठरेल, असा विश्वास त्यांनी व्यक्त केला.
नाशिक म्युनिस‌िपल स्मार्ट सिटी कॉर्पोरेशन आणि नाशिक महानगरपालिका यांच्या संयुक्त विद्यमाने हॉटेल ताज गेटवे येथे आयोजित स्मार्ट सिटी परिषदेच्या उद्घाटनप्रसंगी महाजन बोलत होते. यावेळी महापौर रंजना भानसी, आमदार बाळासाहेब सानप, सीमा हिरे, नॉर्वेच्या काऊन्सुलेट जनरल अॅन ओलेस्टड, विभागीय आयुक्त महेश झगडे, मनपा आयुक्त अभिषेक कृष्णा, स्मार्ट सिटी एलेट्सचे जोसेफ मॅक्व‌िल, स्मार्ट सिटीचे सीईओ प्रकाश थव‌िल, अतिरिक्त आयुक्त किशोर बोर्डे, रमेश पवार, आमदार बाळासाहेब सानप, सीमा हिरे, विरोधी पक्षनेता अजय बोरस्ते, सभागृहनेता दिनकर पाटील, माजी आमदार वसंत गिते आदी उपस्थित होते.
यावेळी महाजन यांनी स्मार्ट सिटीसाठी केंद्र व राज्य सरकारकडून केल्या जाणाऱ्या प्रयत्नांची माहिती दिली. देशात एकूण ९८ शहरांची स्मार्ट सिटी प्रकल्पांतर्गत निवड करण्यात आली असून, त्यात नाशिकचा समावेश झाल्याने विकासाला चालना मिळणार आहे. नाशिकला निसर्गाचे वरदान लाभले असून, सामाजिक, आर्थिक, सांस्कृतिक, धार्मिक, शैक्षणिक या साऱ्या दृष्टीने नाशिक परिपूर्ण शहर आहे. त्यामुळे या शहरात विकासाच्या मोठ्या संधी आहेत. केवळ चांगले कपडे घातले म्हणजे माणूस स्मार्ट होत नाही, तर त्याचे बौद्धिक, शारीरिक स्वास्थ्यही तितकेच महत्त्वाचे आहे. तसेच शहराचेही असून, स्मार्ट शहरासाठी घनकचरा व्यवस्थापन, सृदृढ आरोग्य, शुद्ध पाणी, उत्तम वाहतूक व्यवस्था, सांडपाण्याची व्यवस्था गरजेची असते, असेही त्यांनी यावेळी सांगीतले.
महाजन यांनी सध्याच्या शहराच्या स्थितीवरही टीका करत, आरोग्याच्या बाबतीत पिछाडीवर असलेल्या नाशिक महापालिकेला आरसाही दाखवला. शहरात आरोग्यविषयक अनेक तक्रारी आहेत. राज्यात डेंग्यूचे सर्वाधिक रुग्ण नाशिकमध्ये असल्याने आरोग्यविषयक चांगल्या प्रकल्पांवर काम करण्याची गरज असल्याचे त्यांनी यावेळी सांगितले. स्मार्ट नाशिकअंतर्गत अनेक महत्त्वपूर्ण प्रकल्पांवर सध्या काम सुरू आहे. १६ कोटी रुपये खर्चून कौशल्य विकासाची केंद्रे उभारली जाणार आहेत. त्यामुळे उद्योगांना पूरक मनुष्यबळ उपलब्ध होऊ शकणार आहे. शहर बदलासाठी प्रत्येकाने आपली मानसिकताही बदलली पाहिजे. प्रकल्प राबविताना अडचणी येतील; परंतु, लोकसहभागाशिवाय शहर स्मार्ट होणे अशक्य असल्याचेही महाजन यांनी स्पष्ट केले. यावेळी जोसेफ, आयटीडीपीचे हर्षद अभ्यंकर, यूएसटी ग्लोबचे कार्तिक हरिहरन यांनी स्मार्ट सिटी प्रकल्पाच्या विविध पैलूंबाबत सादरीकरणाद्वारे माहिती दिली.
गोदाप्रकल्पावर भर
गोदावरी ही नाशिकची जीवनदाय‌िनी आहे. त्यामुळे स्मार्ट सिटीअंतर्गत गोदा प्रकल्प राबविला जात असून, त्याकडे राज्य सरकारचे विशेष लक्ष असल्याचे गिरीश महाजन यांनी सांगितले. या प्रकल्पासाठीची सर्व तरतूद करण्यात आली असून, त्यातून गोदावरीचे प्रदूषणही रोखले जाणार आहे. गोदा प्रकल्पाद्वारे शहराच्या पर्यटनाला तसेच अर्थव्यवस्थेलाही चालना मिळणार असल्याचे त्यांनी सांगितले. नागरिकांनादेखील मनोरंजन, सांस्कृतिक कार्यक्रम आणि विरंगुळ्यासाठी चांगली सुविधा उपलब्ध होईल, असे त्यांनी सांगितले.
काँक्रिट‌ीकरणाबाबत अभ्यास
गोदावरी नदीचे प्रदूषण कमी करण्यासाठी नदीपात्रातील काँक्रिटीकरण काढण्याची मागणी केली जात आहे. काँक्रिटीकरण काढल्यास गोदावरीतील नैसर्गिक स्रोत मोकळे होतील असा दावा केला जात आहे. परंतु, हे स्रोत मोकळे झाले तरी, चिखलामुळे गोदावरीचे प्रदूषण होण्याची शक्यता आहे. त्यामुळे गोदावरी पात्रातील कॉँक्रिटीकरण काढावे की नाही, याबाबत अभ्यासाअंतीच निर्णय घेण्यात येणार असल्याचेही महाजन यांनी स्पष्ट केले.
स्मार्ट रोडवर भर-महापौर
महापौर भानसी यांनी नाशिक शहर स्मार्ट करण्यासाठी ‘स्मार्ट रोड’ तयार करण्यात येत असल्याचे सांगितले. अशोकस्तंभ ते मॉडर्न सर्कलदरम्यान पहिल्या रस्त्याचे काम लवकरच सुरू होईल, असे त्या म्हणाल्या. पंतप्रधान नरेंद्र मोदी यांनी स्मार्ट सिटीची मांडलेली संकल्पना तडीस नेण्यासाठी सर्वांचा पुढाकार असणे आवश्यक असल्याचे सांगत, कुंभनगरीत विकासाच्या योजना राबविण्याबरोबरच गावठाणाचाही विकास होणार असल्याचे स्पष्ट केले.
तरच शहर स्मार्ट- झगडे
महेश झगडे म्हणाले, गेल्या दोनशे वर्षांत शहाराच्या लोकसंख्येत लक्षणीय वाढ झाली आहे. शहरीकरण वेगाने होत असताना शहर विस्ताराचे योग्य नियोजन होणे गरजेचे आहे. त्यासाठी आधुनिक तंत्रज्ञानाचा उपयोग तेवढाच महत्त्वाचा आहे. नियोजनाद्वारे रोजगार आणि संपत्तीची निर्मिती, उत्तम मानव विकास निर्देशांक आणि शाश्वत पर्यावरण संवर्धन या बाबी स्मार्ट शहरासाठी आवश्यक आहेत, असे त्यांनी सांगितले. शहरातील मुलभूत समस्या दूर करूनच
शहर स्मार्ट करता येणे शक्य असल्याचे सांगून शिक्षण, सांडपाणी व्यवस्थापन, आरोग्य, पर्यावरण, रोजगार, वाहतूक, आवास अशा विविध पैलूंचा विचार या संदर्भात होणे गरजेचे आहे, असे मत त्यांनी व्यक्त केले.
लवकरच ई प्रमाणपत्र - कृष्णा
कृष्णा म्हणाले, नागरिकांना शहराचे आकर्षण वाटावे अशा सुविधा निर्माण करण्याचा महापालिकेचा प्रयत्न आहे. त्यासाठी नदीघाट विकास, सीसीटीव्ही आणि इतरही प्रकल्प हाती घेण्यात येत आहेत. नागरिकांना ऑनलाइन सुविधा उपलब्ध करुन देण्यात येत असून, लवकरच ई-प्रमाणपत्र सुविधा सुरू करण्यात येईल, अशी माहिती त्यांनी दिली.
मोबाइल अॅप डाउनलोड करा आणि राहा अपडेट
