महापालिका प्रशासनाकडून शुक्रवारी सर्वंकष वाहतूक धोरणाचे सादरीकरण केले जात असतांना शिवसेनेने बससेवेच्या खासगीकरणाला विरोध म्हणून या सादरीकरणावर बहिष्कार टाकण्याचा निर्णय घेतला आहे. तोट्यात चालणारी सीटीबस सेवा ताब्यात घेऊ नये, या भूमिकेवर शिवसेना ठाम असून याबाबत शिवसेनेचे पदाधिकारी विभागीय नियंत्रक यामिनी जोशींची भेट घेट घेणार आहेत. तसेच पदाधिकारी आणि शिवेसना नगरसेवक लवकरच राज्याचे परिवहनमंत्री दिवाकर रावते यांची भेट घेवून बससेवेसंदर्भात साकडे घालणार असल्याची माहिती विरोधी पक्षनेते अजय बोरस्ते यांनी दिली आहे.
महापालिकेमार्फत बससेवा चालविण्यासाठी प्रशासनाने आता राज्य शासनाच्या नगरविकास मंत्रालयाने राज्य नागरी वाहतूक धोरणाचा आधार घेतला आहे. या धोरणानुसार शहरातील सार्वजनिक वाहतुकीची जबाबदारी महापालिकेचीच असल्याचे स्पष्ट केले आहे. त्यामुळे या धोरणावर चर्चा करण्यासाठी शुक्रवारी (दि. २) सकाळी १०.३० वाजता मनपा आयुक्तांच्या दालनाशेजारील सभागृहात कार्यशाळेचे आयोजन करण्यात आले आहे. या कार्यशाळेचे संचालन राज्य शासनाने नियुक्त केलेल्या आयटीडीपी या संस्थेमार्फत केले जाणार आहे. परंतु या कार्यशाळेवर शिवसेनेने बहिष्कार टाकण्याचा निर्णय घेतला आहे. सद्यस्थितीत राज्य परिवहन महामंडळाला दरमहा २ कोटी रुपये तोटा येत असल्याचे स्पष्ट करण्यात आले होते. तर मनपाला बससेवेसाठी ८० कोटीचा फटका सोसावा लागणार आहे. त्यामुळे या पार्श्वभूमीवर विरोधीपक्षनेता अजय बोरस्ते यांनी शहर बससेवा ताब्यात घेण्यास सेनेचा पूर्णपणे विरोध असल्याचे पुन्हा एकदा स्पष्ट केले आहे. बोरस्ते यांनी क्रिसीलच्याही अहवालाबाबत शंका उपस्थित करत वस्तुस्थिती निराळी असल्याचे सांगितले. शहर बससेवा चालविणे हे महापालिकेचे काम नसून एसटी महामंडळानेच उत्पन्नाचे स्त्रोत शोधून मनपाने येणारा तोटा भरून काढण्यासाठी प्रयत्न केले पाहिजेत. यासाठी लवकरच विभागीय नियंत्रक यामिनी जोशी यांची भेट घेऊन त्यांच्याकडून शहर बससेवेची सद्यस्थिती समजून घेतली जाणार आहे. याशिवाय, राज्याचे परिवहन मंत्री व शिवसेनेचे नेते दिवाकर रावते यांचीही भेट घेऊन त्यांच्यापुढे वस्तुस्थिती मांडली जाणार असल्याचे अजय बोरस्ते यांनी सांगितले. यावेळी शिवसेना गटनेता विलास शिंदे, नगरसेवक सत्यभामा गाडेकर, संतोष गायकवाड उपस्थित होते.
मोबाइल अॅप डाउनलोड करा आणि राहा अपडेट
