उपवासाच्या पदार्थांमध्ये आवडीने खाल्ले जाणारे रताळी हे कंदमुळ बाजारात दाखल झाले आहे. खास महाशिवरात्रीसाठी रताळांची वाढलेली मागणी लक्षात घेऊन नाशिक कृषी उत्पन्न बाजार समितीत रताळीची मोठ्या प्रमाणात आवक झाली आहे. नाशिक जिल्ह्यात रताळीची लागवड अत्यंत कमी प्रमाणात होत असल्याने अहमदनगर जिल्ह्यातून नाशिकच्या बाजारात रताळी दाखल झाली आहेत.
चवीला काहीसे गोड असलेल्या रताळीला उपवासाच्या पदार्थांमध्ये स्थान असल्यामुळे उपवासांच्या काळात त्याची मागणी वाढते. ही मागणी लक्षात घेऊन रताळीची लागवड केली जाते. नाशिक जिल्ह्यात रताळीची लागवड फारच कमी प्रमाणात होत असल्याने येथील मागणी लक्षात घेऊन अहमदनगर जिल्ह्यातून ट्रकमधून नाशिकच्या बाजारात सध्या रताळी दाखल होत आहेत.
नाशिक बाजार समितीच्या आवारात व्यापाऱ्यांच्या गाळ्यांवर हे रताळीची पोते भरलेल्या ट्रक येऊ लागले आहेत. घाऊक बाजारात रताळीला दर्जानुसार १५ ते २५ रुपये किलो असा दर मिळत आहे. किरकोळ विक्रीत हा दर दुप्पटीने वाढत असल्याने ग्राहकांना ३० ते ५० रुपयांपर्यंत रताळीची खरेदी करावी लागत आहे.
द्राक्ष झाले स्वस्त
फेब्रुवारी महिना उजाडला की द्राक्षांची रेलचेल वाढण्यास सुरुवात होते. गेल्या महिन्यात ७० ते ८० रुपये किलोने विकल्या जाणाऱ्या द्राक्षांची आवक वाढल्याने स्थानिक बाजारपेठेत आता ५० ते ६० रुपये दर मिळत आहे. आणखी दहा ते पंधरा दिवसांत आवक वाढून दर आणखी खाली येण्याची शक्यता आहे. इतर उन्हाळी फळांचीही आवक वाढली असून, दरही थोडे कमी झाले आहेत.
जानेवारी महिन्यापासून बाजारपेठेत द्राक्षांची आवक सुरू झाली. फेब्रुवारीत आवक वाढल्याने दरात १० ते २० रुपयांची घसरण झाली आहे. स्थानिक बाजारपेठेत द्राक्षाला दर्जानुसार दर मिळत आहे. बाजारात ५० ते ७० रुपये किलो दरानुसार द्राक्षांची विक्री होत आहे. निर्यातक्षम द्राक्षांचे बाजारभावही कमी झाल्याने त्याचा स्थानिक बाजारभावावर परिणाम झाला आहे.
उन्हाळी फळांची आवक वाढू लागली आहे. टरबूज, खरबूज, संत्री या फळांची आवक वाढली आहे. संत्र्याला ५० रुपये किलो दर मिळत आहे. आणखी पंधरा दिवसांत आवक वाढून दर कमी होतील. सफरचंद, पपई व चिक्कूचे दर स्थिर आहेत. टरबूज १५ ते २० रुपये किलो, तर खरबूज ३० रुपये किलोने दराने मिळत आहे. कडाका व उमराणा या बोरांची आवक घटली असली तरी अॅपल बोरची आवक मात्र वाढली आहे. अॅपलबोर ३० रुपये किलोने विक्री होत आहे. डाळिंबाला सध्या चांगले दर मिळत आहे. गेल्या आठवड्यापासून दरात वाढ झाली आहे. चांगल्या दर्जाच्या डाळिंबाच्या वीस किलोच्या क्रेटला १२०० पासून १८०० रुपयांपर्यंत दर मिळत आहे.
महाशिवरात्रीमुळे मागणी वाढणार
येत्या मंगळवारी महाशिवरात्री असल्याने फळांची मागणी वाढणार आहे. यामुळे दरात किरकोळ वाढ होण्याची शक्यता आहे. महाशिवरात्रीनिमित्त विक्रेत्यांनी फळांचा स्टॉक वाढवला असून, चौकाचौकात दुकाने थाटण्यात आली आहेत.
किलोचे दर
पपई - ३०, द्राक्ष - ५० ते ५०, अॅपल बोर - ३०, टरबूज - १५, खरबूज - २०, संत्री - ५०, चिक्कू - ५०, सफरचंद - ८० ते १२०, केळी ३० रुपये डझन, किवी - ४० रुपये नग, डाळिंब ५० ते ७०, पेरू - ४० ते ६०
मोबाइल अॅप डाउनलोड करा आणि राहा अपडेट
