क्षणचित्रे
'रॅली'चे रंगले सेलिब्रेशन
- सकाळी ६.४५ वाजेपासून बाइक रॅलीत सहभागी होण्यासाठी महिलांची ईदगाह मैदानावर गर्दी होऊ लागली.
- सकाळी ७ वाजता सजवलेल्या बाइकसह रॅलीत जल्लोष करण्यासाठी महिला सज्ज झाल्या.
- सकाळी ७.१५ वाजता शहरातील मान्यवरांची रॅलीत उपस्थिती.
- सकाळी ७.२० वाजता प्रसिद्ध अभिनेत्री सई लोकूर रॅलीसाठी येताच महिलांचा जल्लोष.
- सकाळी ७.४५ वाजता मान्यवरांच्या हस्ते झेंडा दाखवून रॅलीस प्रारंभ.
- रॅलीस प्रारंभ झाल्यानंतर नारीशक्तीच्या शौर्याला सलाम करत महिलांचा जल्लोष.
- जवानांच्या पत्नींना सलाम करण्यासाठी 'भारत माता की जय'चा जयघोष.
- अतिशय शिस्तबद्धरित्या रॅलीतून सामाजिक विषयांवर भाष्य करणारे फलक उंचावले गेले.
- सकाळी ८.३० वाजता रॅलीच्या मार्गावरुन आलेल्या बाइकर्णी पुन्हा ईदगाह मैदान येथे पोहोचल्या.
- सकाळी ८.४५ वाजता हिंदी मराठी गाण्यांच्या तालावर झुम्बा करत महिला थिरकल्या.
- सकाळी ९ वाजता 'बेस्ट' पारितोषिकांचे वितरण.
- सकाळी ९.१५ ला पुन्हा झुम्बा नृत्य करत बाइक रॅलीचा धमाकेदार समारोप करण्यात आला.
--
शहिदांना मानवंदना
सीमेवर तैनात जवान आणि सैन्याधिकाऱ्यांची खरी ताकद असलेल्या त्यांच्या पत्नींना सलाम करण्यासाठी बाइकर्णींनी रॅलीत शहिदांना मानवंदना दिली. त्यासाठी बाइकर्णी जवानांच्या वेशात सहभागी झाल्या. काही बाइकर्णींनी बाइक्सवर 'मेरा भारत महान', 'भारतीय जवानांचा विजय असो', 'भारतीय सैन्याचा विजय असो', 'शहीद जवान अमर रहे', असे फलक लावले होते. त्यावेळी बाइकर्णींनी महिलांच्या शौर्याला सलाम करताना शहिदांना मानवंदना वाहिली.
--
साकारल्या व्यक्तिरेखा
यंदा बाइक रॅलीत फक्त वेशभूषेवर भर देण्यात आला नव्हता, तर बाइकर्णी विविध व्यक्तिरेखा साकारत सहभागी झाल्या. पूनम दंडगव्हाळ यांनी वायूदलाचे जवान 'अभिनंदन' यांची वेशभूषा साकारत इतर बाइकर्णींचे लक्ष वेधले. तर, प्रतिभा पवार आणि दीपाली देवकर यांनी आनंदी आणि गोपाळ जोशी यांची व्यक्तिरेखा साकारली. त्यांच्यासह इतर बाइकर्णी ऐतिहासिक वेशभूषा करत रॅलीत सहभागी झाल्या.
--
'सई'चे 'इन्स्टा' अपडेट
सई लोकूर रॅलीत उपस्थित होताच, तिने इन्स्टाग्रामवर बाइक रॅलीच्या पोस्ट अपलोड करण्यास सुरुवात केली. सुरुवातीला 'फ्लॅग ऑफ ऑल वूमेन पॉवर बाइक रॅली' असे लिहित सईने फोटो अपलोड केला. रॅलीला प्रारंभ होण्यापूर्वी बाइकवर होत सईने पोस्ट अपलोड केली. त्यानंतर पुन्हा मैदानात आल्यानंतर सईने बाइकर्णींसोबत घेतलेले अनेक सेल्फी इन्स्टावर अपलोड केले. बाइकर्णी झुम्बा करत असतानाचा व्हिडिओदेखील सईने अपलोड केला. त्यामुळे नाशिकच्या बाइकर्णींच्या उत्साहाला उधाण आले होते.
--
वेशभुषेत वैविध्य
बाइक रॅलीत सहभागी झालेल्या बाइकर्णींनी पारंपरिक वेशभूषेपासून तर वेस्टर्न आऊटफिटपर्यंतची फॅशन फॉलो केली. मराठमोठ्या फेट्यांसह राजवाडी फेटे, गांधी टोपी, ट्रॅव्हल कॅप, रेट्रो कॅप परिधान करत बाइकर्णी रॅलीत सहभागी झाल्या. नववारी साडीसह प्रोफेशन लूक अन् रायडर्सच्या वेशात आलेल्या बाइकर्णींनी लक्ष वेधून घेतले. विविध प्रकारच्या फॅशन फॉलो करत, एकमेकींना टशन देण्यात आली.
--
बाइक्सची व्हरायटी
महिलांची बाइक राइड फक्त मोपेड पुरतीच मर्यादित राहिली नसल्याचे बाइक रॅलीत प्रकर्षाने जाणवले. मोपेडसह बुलेट, रॉयल इन्फिल्ड, यामाहा आर एक्स १०० या विंटेज बाइक घेऊन बाइकर्णी वेगावर स्वार झाल्या. करिझ्मा, केटीएम ड्यूक, एफझी या स्पोर्ट बाइकलाही बाइकर्णींनी पसंती दिली. स्पोर्टस् बाइक्स असूनही रॅलीत बाइकर्णींचे वेगावर नियंत्रण कायम होते. त्यामुळे उत्साहाच्या जोडीला रॅलीत बाइक्सची व्हरायटी दिसून आली.
--
महिला पोलिसांची शान
मोठ्या ऐटीत रॅलीत शहर पोलिस आयुक्तालयातील महिला पोलिस अधिकारी आणि कर्मचाऱ्यांचे पथक सहभागी झाले. महिला पोलिसांची शान दाखवत त्यावेळी हेल्मेट वापरा, सीट बेल्ट लावा, वाहन चालविताना मोबाइलचा वापर टाळा यासह वाहतुकीचे सर्व नियम पाळा, असे प्रबोधन करण्यात आले. बाइक रॅलीचे नेतृत्व महिला पोलिस अधिकाऱ्यांनी केले तर, रॅलीच्या अखेरीसही महिला कर्मचारी बाइकवर स्वार होऊन महिलांच्या शौर्याला सलाम करीत होत्या. महिला पोलिसांच्या या सहभागामुळे बाइकर्णींचा जल्लोष अधिक वाढला होता.
--
आनंदाला आले भरते
बाइक रॅली पुन्हा मैदानात आल्यानंतर बाइकर्णींच्या आनंदाला भरती आली. हिंदी मराठी गाण्यांवर तरुणींसह सर्व महिलांनी झुम्बा केला. नवीन डान्स अॅकॅडमीच्या झुम्बा प्रशिक्षकांनी महिलांना थिरकायला लावले. त्यावेळी सईनेदेखील महिलांसोबत काही स्टेप्स फॉलो केल्या. रॅलीत प्रबोधन केल्यानंतर झुम्बा नृत्याने बाइकर्णींनी रॅलीची उत्साहात सांगता केली.
--
या ठरल्या 'बेस्ट'
बेस्ट ग्रुप : देशप्रेमी ग्रुप
बेस्ट कॉस्च्युम : प्रतिभा पवार, दीपाली देवकर
बेस्ट मेसेज : हॅप्पी टू ब्लीड ग्रुप
बेस्ट डेकोरेटेड बाइक : अल्पना झवेरी, साक्षी टर्ले आणि मनीषा पाटील
बेस्ट डेकोरेटेड हेल्मेट : वृषाली लिटे
विशेष गौरव : आरोग्यधाम योगा ग्रुप, नाशिकरोड
विशेष सत्कार : नलिनी कड (४२ किलोमीटर मॅरेथॉन रनर)
--