मनपा कर्मचाऱ्याचा उद्योग; जिल्हा शल्यचिकित्सकांकडून भांडाफोड

म. टा. खास प्रतिनिधी, नाशिक

सिव्हिल सर्जन आणि अतिरिक्त सिव्हिल सर्जन यांच्यासाठी असलेले दोन बनावट रबरी स्टॅम्प महापालिकेच्या एका कर्मचाऱ्याकडून जप्त करण्यात आले. जिल्हा शल्यचिकित्सक डॉ. सुरेश जगदाळे यांना या प्रकरणाची माहिती मिळाल्याने संशयिताचा भांडाफोड झाला. या प्रकरणी रात्री उशिरापर्यंत गुन्हा दाखल करण्याचे काम सुरू होते.

मंगेश साळवे असे या महापालिका कर्मचाऱ्याचे नाव आहे. सिव्हिलमध्ये दाखल होणाऱ्या बेवारस मृतदेहाचे विल्हेवाट लावण्याचे काम महापालिकेने साळवे याच्याकडे सोपवले आहे. मात्र, या कामाबरोबर मंगेश काहीतरी अनधिकृत उद्योग करीत असल्याची माहिती सिव्हिल सर्जन डॉ. जगदाळे यांना मिळाली होती. या प्रकरणाची सखोल माहिती घेतली असता त्यात मंगेश आपल्याकडील बनावट रबरी शिक्क्यांच्या आधारे विविध सर्टिफिकेट देण्याचे काम करीत असल्याचे समोर आले. त्यानुसार शुक्रवारी (दि.१५) दुपारी तीन वाजेच्या सुमारास सिव्हिल सर्जन डॉ. जगदाळे, अतिरिक्त सिव्हिल सर्जन डॉ. निखील सैंदाणे, सिव्हील हॉस्पिटलचे प्रशासन विभागाचे व्ही. डी. पाटील, वैद्यकीय अधिकारी तसेच सुरक्षारक्षकांसमवेत सर्वांनी मृतदेह उत्तरीय तपासणी केंद्राकडे धाव घेतली. या ठिकाणी बेवारस मृतदेहाची विल्हेवाट लावणाऱ्या कर्मचाऱ्यास बसण्यासाठी जागा देण्यात आली आहे. त्या ठिकाणी या पथकाला एक बॅग आढळून आली. त्याबाबत चौकशी करण्यात आली असता ती मंगेशची असल्याचे समजले. या पथकाने बॅगची तपासणी केली असता त्यात सिव्हिल हॉस्पिटलचे दोन रबरी आणि बनावट सील स्टॅम्प सापडले. या पथकाने केलेल्या चौकशीत तथ्य आढळून आल्याने संबंधितावर सरकारवाडा पोलिस स्टेशनमध्ये गुन्हा दाखल करण्याचे आदेश जिल्हा शल्यचिकित्सक डॉ. जगदाळे यांनी दिलेत. हा गुन्हा दाखल करण्याचे काम रात्री उशिरापर्यंत सुरू होते.

बनावट सर्टिफिकेटचा उद्योग

सिव्हिल हॉस्पिटलमध्ये आजारपणाच्या रजा, अपंगत्वाचा दाखला यासह इतर काही महत्त्वाचे सर्टिफिकेट तयार केले जातात. अर्थात, यासाठी विविध तपासण्या पार पडतात. यानंतर सदर अर्ज सिव्हिल सर्जन अथवा अतिरिक्त सिव्हिल सर्जन यांच्याकडे पोहचतो. तिथे सही शिक्का झाल्यानंतर हे सर्टिफिकेट सरकारी कामांसाठी वापरले जाते. या शिक्क्यांनी सील स्टॅम्प म्हणतात. मंगेशकडे हेच शिक्के आढळल्याने बनावट सर्टिफिकेटचा उद्योग समोर आल्याची प्रतिक्रिया डॉक्टरांकडून व्यक्त केली जाते आहे. हा उद्योग किती दिवसांपासून सुरू होता तसेच त्यात सिव्हिल हॉस्पिटलमधील कोणांचा संबंध आहे काय याचा शोध लागणे देखील महत्त्वाचे आहे.

बनावट सही आणि शिक्क्यांचा वापर होत असल्याची माहिती समोर आली होती. त्यानुसार चौकशी केली असता मंगेश साळवेचा संबंध उघडकीस आला. त्याच्या बॅगेतून दोन रबरी स्टॅम्प हस्तगत करण्यात आले असून, या प्रकरणी गुन्हा दाखल करण्याचे आदेश देण्यात आले आहे.

- डॉ. सुरेश जगदाळे, जिल्हा शल्यचिकित्सक

पाच दुचाकी चोरीच्या घटनांची नोंद

म. टा. खास प्रतिनिधी, नाशिक

शहरात वाहनचोरीच्या घटनांनी वेग घेतला आहे. दररोज नवनवीन गुन्हे दाखल होत असून, वाहनचोरट्यांचा बंदोबस्त करण्याची मागणी करण्यात येते आहे. नुकत्याच वेगवेगळ्या ठिकाणी पार्क केलेल्या पाच दुचाकी अज्ञात चोरट्यांनी चोरून नेल्या. या प्रकरणी सरकारवाडा, अंबड, मुंबई नाका आणि पंचवटी पोलिस ठाण्यात गुन्हे दाखल करण्यात आले.

पेठफाटा भागातील दीपाली पुंडलिक चौधरी (रा. म्हाडा बिल्डींग, एरंडवाडी) यांची प्लेझर (एमएच १५ सीयू १३१९) बुधवारी (दि. १३) रात्री त्यांच्या बिल्डिंगच्या पार्किंगमध्ये लावलेली असतांना चोरट्यांनी चोरून नेली. या प्रकरणी पंचवटी पोलिस ठाण्यात गुन्हा दाखल करण्यात आला. अधिक तपास एएसआय वानखेडे करीत आहेत. दुसरी घटना ठक्कर बाजार बसस्थानक परिसरात घडली. तळेगाव (ता. इगतपुरी) येथील कुणाल चंद्रकांत साबळे हा तरुण मंगळवारी (दि.१२) कामानिमित्त शहरात आला होता. ठक्कर बाजार बसस्थानक परिसरात त्याने आपली शाईन (एमएच१५ डीए २५७६) पार्क केली असता चोरट्यांनी पळवून नेली. या प्रकरणी सरकारवाडा पोलिसात गुन्हा दाखल करण्यात आला असून, अधिक तपास हवालदार सातभाई करीत आहेत.

अशोका मार्गावर वाहनचोरीची तिसरी घटना घडली. शिवरामनगर भागात राहणारे योगेश अंबादास शेलार याची ज्युपिटर (एमएच १५ जीक्यू ०४१६) सोमवारी (दि.११) रात्री अशोका मार्गावरील स्वरा डेंटल क्लिनिक येथे पार्क केलेली असतांना चोरट्यांनी चोरून नेली. या प्रकरणी मुंबई नाका पोलिस ठाण्यात गुन्हा दाखल करण्यात आला. अधिक तपास हवालदार ठाकूर करीत आहेत.

सिडकोमध्ये वाहनचोरीच्या दोन घटना घडल्या. सुनील तुकाराम कातकाडे (रा. दत्तमंदिराजवळ, मोरवाडी) यांची स्प्लेंडर (एमएच १५ एएल ४३३७) मंगळवारी (दि. १२) रात्री त्यांच्या घरासमोर पार्क केलेली असतांना चोरट्यांनी चोरून नेली. तसेच पाटीलनगर भागात राहणारे सूरज शिवदास शिरसाठ (रा. स्वामी समर्थ चौक) यांची होंडा शाईन (एमएच १५ इयू १९९१) रविवारी (दि. १७) दुर्गामाता मंदिरामागे पार्क केलेली असतांना चोरट्यांनी चोरून नेली. दोन्ही घटनांप्रकरणी अंबड पोलिस ठाण्यात वेगवेगळे गुन्हे दाखल करण्यात आले असून अधिक तपास हवालदार धरम व उघडे करीत आहेत.

म. टा. खास प्रतिनिधी, नाशिक

बसस्थानक, रेल्वेस्थानक आणि बस व इतर वाहनांवरील, तसेच इतर सार्वजनिक ठिकाणी लावण्यात आलेले शासकीय जाहिरातींचे फलक काढण्यात येऊन विकासकामांच्या ठिकाणी लावण्यात आलेल्या कोनशिला व्यवस्थित झाकाव्यात, असे निर्देश जिल्हाधिकारी सूरज मांढरे यांनी शुक्रवारी दिले.

जिल्हाधिकारी कार्यालयातील बैठक सभागृहात निवडणूक कामकाज आढावा बैठकीत ते बोलत होते. यावेळी अपर जिल्हाधिकारी नीलेश सागर, लक्ष्मण राऊत, सहाय्यक जिल्हाधिकारी कुमार आशीर्वाद, पंकज अशिया, निवासी उपजिल्हाधिकारी रामदास खेडकर, निवडणूक उपजिल्हाधिकारी अरुण आनंदकर आदी उपस्थित होते. जिल्हाधिकारी म्हणाले, की आचारसंहिता काळात आचारसंहितेचा भंग होणार नाही यासाठी सर्व संबंधित अधिकाऱ्यांनी नियमानुसार कामकाज करावे. त्या अनुषंगाने इलेक्ट्रॉनिक व प्रिंट मीडिया यांच्यासोबतच सोशल मीडियावरील उमेदवारांच्या जाहिरातींचे दर निश्चित करावेत. ईव्हीएम व व्हीव्हीपॅटची पुरेशी व्यवस्था, निवडणूक कामकाजसंबंधीत प्रशिक्षण व्यवस्था, निवडणूक खर्चाचे नियोजन, जिल्हा निवडणूक संवाद आराखडा, निवडणूक काळातील वाहतूक व्यवस्था, मतदान केंद्रांवरील मतदानाची व्यवस्था, निवडणुकीसंबंधी संकेतस्थळ, तसेच सॉफ्टवेअर व हार्डवेअर अद्ययावत ठेवण्याच्या सूचना देऊन नमूद विषयांचा आढावा घेण्यात आला. लोकसभा निवडणूक प्रक्रियेसाठी कामाचे पूर्वनियोजन करणे महत्त्वाचे आहे. त्यामुळे प्रत्येक नोडल अधिकाऱ्याने आपली जबाबदारी नियोजनबद्ध पार पाडावी, अशा सूचनाही जिल्हाधिकाऱ्यांनी दिल्या. या बैठकीस जिल्ह्यातील सर्व उपजिल्हाधिकारी, उपविभागीय अधिकारी, तहसीलदार आदी उपस्थित होते.

संशयितांवर गुन्हा; सिव्हिल हॉस्पिटलमध्ये उपचार

म. टा. खास प्रतिनिधी, नाशिक

पंचवटीतील हत्येचा प्रयत्न केल्याप्रकरणी दाखल गुन्ह्याचा वाद ताजा असताना आता गंगापूर पोलिस स्टेशनमध्ये हत्येचा प्रयत्न केल्या प्रकरणी गुन्हा दाखल झालेल्या संशयिताने आत्महत्येचा प्रयत्न केल्याचा प्रकार समोर आला आहे. संशयितावर सिव्हिल हॉस्पिटलमध्ये गुन्हा दाखल असून, त्याच्यावर आत्महत्येचा प्रयत्न केल्याप्रकरणी गुन्हा दाखल करण्यात आला.

संजय लक्ष्मण खरात (रा. संत कबीरनगर झोपडपट्टी, भोसला कॉलेजच्या मागे) असे पोलिस स्टेशनमध्ये आत्महत्येचा प्रयत्न करणाऱ्या संशयिताचे नाव आहे. संजय खरातवर गंगापूर पोलिस ठाण्यात काही दिवसांपूर्वी हत्येचा प्रयत्न केल्या प्रकरणी गुन्हा दाखल झाला. या गुन्ह्याच्या चौकशीसाठी खरात गुरुवारी (दि.१४) सांयकाळी ५ वाजेच्या सुमारास पोलिस स्टेशनला आला. वरिष्ठ पोलिस निरीक्षक के. जी. मोरे यांच्या दालनात त्याची चौकशी सुरू असताना हा प्रकार घडला. संशयित खरातला अटकेचे कारण समजावून सांगण्यात येत असताना त्याने पोलिसांना शिवीगाळ सुरू केली. हत्येचा प्रयत्न करण्याच्या आरोपात विनाकारक अटक करून तुम्ही मला त्रास देत असल्याचे सांगत त्याने पोलिस नाईक मनोहर नागरे यांना धक्का देऊन पाडले. यानंतर त्याने भिंतीवर जोर जोरात डोके आपटून आत्महत्येचा प्रयत्न केला. यामुळे गंगापूर पोलिस स्टेशनमध्ये धावपळ उडाली. पोलिस स्टेशनमध्ये इतर कर्मचाऱ्यांनी खरातला काबूत आणले आणि यानंतर त्याला उपचारासाठी सिव्हिल हॉस्पिटलमध्ये दाखल करण्यात आले. या प्रकरणी पोलिस नाईक मनोहर नाईक यांनी दिलेल्या फिर्यादीनुसार खरात विरूद्ध आत्महत्येचा प्रयत्न करणे, सरकारी कामात अडथळा आणणे आदी कलमांनुसार गुन्हा दाखल करण्यात आला. घटनेचा पुढील तपास सहायक पोलिस निरीक्षक पवार करीत आहेत.

१७ मार्च रोजी पुण्यात सादरीकरण

म. टा. प्रतिनिधी, जळगाव

'परिवर्तन जळगाव' ही संस्था आपल्या प्रयोगशील प्रयोगांमुळे महाराष्ट्रभर सुपरिचित आहे. महाराष्ट्र कल्चरल सेंटर, पुणे यांनी 'परिवर्तन'ला कार्यक्रमाला सादरीकरणासाठी आमंत्रित केले आहे.

संपूर्ण मराठी भाषेला ज्यांच्या कवितांनी अंतर्मुख केले अशा खान्देशकन्या बहिणाबाई चौधरी यांच्या कवितांचा आणि गाण्यांचा कार्यक्रम 'अरे संसार संसार' याची परिवर्तन जळगाव संस्थेची निर्मिती केली आहे. आजवर या कार्यक्रमाचे महाराष्ट्रात अनेक प्रयोग परिवर्तनतर्फे करण्यात आले आहेत. येत्या १७ मार्च रोजी सायंकाळी पाच वाजता महाराष्ट्र कल्चरल सेंटर यांनी पुणे येथील सुदर्शन रंगमंच येथे याचे आयोजन केलेले आहे. 'अरे संसार संसार'या बहिणाबाईंच्या कवितेच्या कार्यक्रमात सुदिप्ता सरकार, श्रद्धा कुलकर्णी, मंजुषा भिडे, अक्षय गजभिये, नारायण बावीस्कर आदींचा सहभाग असणार आहे. नारायण बाविस्कर दिग्दर्शित या संगीतमय कार्यक्रमाला रंगकर्मी शंभू पाटील यांचे निवेदन असणार आहे. निर्मिती प्रमुख होरिलसिंग राजपूत व वसंत गायकवाड हे आहेत.

या कार्यक्रमानंतर श्रीकांत देशमुख लिखित 'नली' या नाट्याचा प्रयोग सादर होणार आहे. सध्या महाराष्ट्रभर आतापर्यंत २६ प्रयोग झाले आहेत. पुण्यातला हा पहिलाच प्रयोग असून, नली एकलनाट्याची मूळ संकल्पना व नाट्यरूपांतर शंभू पाटील यांची आहे. तर दिग्दर्शन योगेश पाटील यांचे आहे. सादरकर्ते हर्षल पाटील आहेत. खान्देशी बोली आणि संस्कृतीचे सादरीकरण परिवर्तनाच्या या दोन्ही कार्यक्रमातून सादर होणार आहे. या कार्यक्रमात साहित्य अकादमी पुरस्काराने सन्मानित ज्येष्ठ कवी श्रीकांत देशमुख यांनी लिहिलेल्या यांनी लिहिलेल्या 'पिढीजात' या राजहंस प्रकाशनाने प्रकाशित केलेल्या कादंबरीचे प्रकाशन अखिल भारतीय मराठी साहित्य संमेलनाचे माजी अध्यक्ष डॉ. सदानंद मोरे, ज्येष्ठ लेखक संजय भास्कर जोशी, श्रीकांत देशमुख यांच्या हस्ते होणार आहे.

म. टा. प्रतिनिधी, नाशिक

तुळशीसाठी अंगणात उभारलेले वृंदावन अंगावर पडल्याने दीड वर्षीय चिमुकल्याचा मृत्यू झाल्याची दुर्दैवी घटना मखमलाबाद येथील स्वामी विवेकानंदनगर भागात घडली. या प्रकरणी म्हसरूळ पोलिस ठाण्यात आकस्मात मृत्यूची नोंद करण्यात आली आहे. राज भूषण बच्छाव (रा. पाण्याच्या टाकीजवळ, स्वामी विवेकानंदनगर) असे मृत बालकाचे नाव आहे.

गुरुवारी सायंकाळी राज हा आपल्या घराच्या अंगणात खेळत असताना ही घटना घडली. अंगणात खेळत असताना अचानक त्याच्या अंगावर सिमेंट काँक्रीटचे तुळशी वृंदावन कोसळले. या घटनेत राज वृंदावनाखाली दबला जाऊन गंभीर जखमी झाला. वडील भूषण बच्छाव यांनी त्यास तत्काळ जिल्हा रुग्णालयात दाखल केले. मात्र, उपचार सुरू असताना रात्री त्याचा मृत्यू झाला. डोक्यास वर्मी मार लागल्याने त्याचा मृत्यू झाल्याचा अंदाज वैद्यकीय सूत्रांनी वर्तवला आहे.

--

दुचाकी अपघातात

तरुणाचा मृत्यू

नाशिक : भरधाव दुचाकी घसरल्याने एका तरुणाचा मृत्यू झाला, तर दुसरा गंभीर जखमी झाला आहे. त्याच्यावर खासगी रुग्णालयात उपचार सुरू आहेत. हा अपघात तुपादेवी फाटा भागात झाला होता. याप्रकरणी त्र्यंबकेश्वर पोलिस ठाण्यात नोंद करण्यात आली आहे. सुनील कासू केंग (वय ३०, रा. त्र्यंबकेश्वर) असे मृत तरुणाचे नाव असून, त्याचा मित्र उमेश ढवळू वाघ (वय २२) हा गंभीर जखमी आहे. केंग आणि वाघ हे दोघे मित्र गुरुवारी (दि.१४) सायंकाळी दुचाकीवर प्रवास करीत असताना हा अपघात झाला. उमेश वाघची प्रकृती चिंताजनक असून, त्यास खासगी रुग्णालयात हलविण्यात आले आहे.

म. टा. वृत्तसेवा, सिडको

नाशिक लोकसभा मतदारसंघात भुजबळ कुटुंबातीलच एक उमेदवार असेल असे यापूर्वी जाहीर केले होते. मात्र, येवल्यातील मतदारांनी तुम्ही येथूनच लढा, असा आग्रह धरल्याने आणि समीर भुजबळ यांना खासदारकीचा अनुभव असल्याने त्यांच्यासाठीच प्रयत्न केल्याचे प्रतिपादन माजी उपमुख्यमंत्री आमदार छगन भुजबळ यांनी शुक्रवारी पत्रकार परिषदेत केले.

नाशिक लोकसभा मतदारसंघातून समीर भुजबळ यांना, तर दिंडोरी लोकसभा मतदारसंघातून धनराज महाले यांना उमेदवारी जाहीर झाल्यानंतर भुजबळ फार्म येथे आयोजित पत्रकार परिषदेत भुजबळ बोलत होते. ते म्हणाले, की समीर भुजबळ यांना खासदारकीचा अनुभव आहे. मतदारसंघातील गावागावांत त्यांचे संबंध जोडले गेले आहेत. त्यामुळेच पक्षाने त्यांचे नाव निश्चित केले आहे. दोन महिन्यांपासूनच लोकसभा निवडणुकीच्या दृष्टीने काम सुरू झाले आहे. हे दोन्ही मतदारसंघ राष्ट्रवादीच्या ताब्यात असल्याने निश्चितच या ठिकाणी राष्ट्रवादीचे उमेदवारच विजयी होतील. सन २००९ ते २०१४ या काळात नाशिकचा खऱ्या अर्थाने विकास झाला. मात्र, त्यानंतर नाशिकची विकासकामे अन्यत्र पळविण्यात आल्याचा आरोपही त्यांनी केला. नाशिकचे प्रकल्प पळविल्यामुळे नागपूरचाच विकास होत असल्याचेही ते म्हणाले.

--

दिंडोरीतील बंडखोरीवर लक्ष

दिंडोरी लोकसभा मतदारसंघातून भारती पवार यांनी मागील पाच वर्षांत पक्षाचे खूप काम केले. मात्र, त्यांना घरातूनच विरोध असल्याने त्यांच्याऐवजी महालेंना उमेदवारी दिली आहे. दिंडोरीतून बंडखोरी होणार नाही याकडे आपले लक्ष असल्याचेही त्यांनी सांगितले. प्रकाश आंबेडकर यांच्याबरोबर आघाडीची चर्चा झाली होती. मात्र त्यांच्याकडून सकारात्मक प्रतिसाद न आल्याने ती आघाडी झाली नाही. मात्र सध्या सर्वांनी एकत्र येण्याचे मत त्यांनी मांडले. राज ठाकरे निश्चितच आमच्या बाजूने असल्याचेही भुजबळांनी सांगितले.

\B'सावाना'च्या वतीने विविध पुरस्कारांचे वितरण

\B

म. टा. खास प्रतिनिधी, नाशिक

सार्वजनिक वाचनालय, नाशिक या संस्थेच्या १७९ व्या वार्षिक समारंभानिमित्त देण्यात येणाऱ्या विविध वाङमयीन पुरस्कारांचे वितरण मराठवाडा साहित्य परिषदेचे अध्यक्ष प्रा.कौतिकराव ठाले-पाटील यांच्या हस्ते करण्यात आले. यावेळी मंचावर सावानाचे अध्यक्ष प्रा. विलास औरंगाबादकर, प्रमुख सचिव श्रीकांत बेणी, उपाध्यक्ष नानासाहेब बोरस्ते, किशोर पाठक यांची उपस्थिती होती. संस्थेच्या आवारातील मु. शं. औरंगाबादकर सभागृहात हा कार्यक्रम झाला.

यावेळी ललितेतर ग्रंथासाठी देण्यात येणारा डॉ. वि. म. गोगटे स्मृती पुरस्कार मुंबई दूरदर्शन केंद्राच्या सह्याद्री वाहिनीवरील कार्यक्रमाचे निर्माते रविराज गंधे यांना त्यांच्या 'माध्यमरंग' या पुस्तकासाठी देण्यात आला. पु. ना. पंडित पुरस्कार अंबरनाथ येथील डॉ. किरण येले यांनी लिहिलेल्या 'मोराची बायको' या लघुकथा संग्रहास, उमेदीने लेखन करणाऱ्यांना डॉ. अ. वा. वर्टी कथालेखक पुरस्कार दिनकर कुटे यांना, अशोक देवदत्त टिळक स्मृती पुरस्कार येवला येथील प्रा. गो. तु. पाटील यांनी लिहिलेल्या 'ओल अंतरीचे' या आत्मचरित्राला, मु. ब. यंदे स्मृती पुरस्कार नाशिक येथील संत साहित्याचे अभ्यास प्रा. डॉ. यशवंतराव पाटील यांनी लिहिलेल्या 'संस्कारांचा अमृतकलश' या सामाजिक ग्रंथाला, कै. धनंजय कुलकर्णी स्मृती पुरस्कार ज्येष्ठ पत्रकार अभिजित कुलकर्णी यांनी लिहिलेल्या 'रेडटेप' कादंबरीला, ग. वि. अकोलकर स्मृती पुरस्कार अकोले येथील शिक्षण क्षेत्राचे अभ्यासक हेरंब कुलकर्णी यांना 'माझी शिक्षण परिक्रमा' या पुस्तकासाठी देण्यात आला. पाच हजार रूपये, धनादेश स्मृतिचिन्ह, शाल, पुष्पगुच्छ असे पुरस्काराचे स्वरूप होते.

वाङमयीन पुरस्कार निवड समितीपैकी प्रा. अनंत येवलेकर, डॉ. सुनील कुटे, प्रकाश वैद्य, प्रा. डॉ. भास्कर ढोके, विवेक उगलमुगले यांनी मनोगत व्यक्त केले. अॅड. अभिजित बगदे यांनी प्रास्ताविक केले. वसंत खैरनार यांनी मान्यवरांचा परिचय करून दिला. अॅड. भानुदास शौचे यांनी अहवालवाचन केले तर प्रा. डॉ. शंकर बोऱ्हाडे यांनी सूत्रसंचालन केले. गिरीश नातू यांनी आभार मानले.

माझी जडणघडण ज्या वाचनालयातून झाली त्यांच्यावतीने देण्यात येणारा पुरस्कार मला मिळतोय, त्यामुळे मी भारावून गेलो आहे.

- यशवंतराव पाटील, पुरस्कारार्थी

मला प. रा. चांदे व मो. ग. तपस्वी यांची प्रकर्षाने आठवण येत आहे. त्यांच्या योगदानामुळे माझी जडणघडण झाली आहे.

- रविराज गंधे, पुरस्कारार्थी

म. टा. प्रतिनिधी, नाशिक

मुंबई येथील पादचारी पुलाचा काही भाग कोसळल्यानंतर नाशिकमधील ब्रिटिशकालीन पुलांचा विषय पुन्हा चर्चेत आला आहे. शहरातील तीन ब्रिटिशकालीन पुलांचे महापालिकेने गेल्या अनेक वर्षांत स्ट्रक्चरल ऑडिटच केले नसल्याची बाब समोर आली आहे.

कोणताही पूल तयार झाल्याच्या तीस वर्षांनंतर त्या पुलाचे स्ट्रक्चरल ऑडिट होणे गरजेचे असते. तसा शासकीय नियमदेखील आहे. मात्र, या नियमाला खुद्द महापालिकेनेच पायदळी तुडवले आहे. शहरातील अहिल्यादेवी होळकर पूल, वालदेवी नदीवरील पूल आणि आडगावमध्ये प्रवेश करताना लागणारा पूल असे तीन पूल महापालिकेच्या हद्दीत येतात. त्यापैकी आडगाव येथील पूल पूर्णपणे मोडकळीस आला असल्याने त्या ठिकाणी नवीन पूल बांधण्याचा प्रस्ताव नाशिक महापालिकेने तयार केला आहे. मात्र, शहराच्या मुख्य भागात असलेल्या अहिल्यादेवी होळकर पुलाचे व देवळालीगावातील वालदेवी नदीवर बांधलेल्या पुलाचे अद्याप स्ट्रक्चरल ऑडिटच झाले नसल्याची बाब समोर आली आहे. या पुलांचे स्ट्रक्चरल ऑडिट करावे, अशी गेल्या अनेक वर्षांपासून मागणी होत असताना त्याकडे दुर्लक्ष करण्यात आले आहे. या दोन्ही पुलांना समांतर पूल बांधून तयार आहेत. ब्रिटिश सरकरने महापालिकेला अहिल्यादेवी होळकर पुलाबाबत स्मरणपत्रही पाठविलेले आहे. सुनील खुने शहर अभियंता असताना या पुलांचे ऑडिट करण्याचे काम सुरू करण्यात आले होते. मात्र, अद्याप या फायलींना हात लागलेला नाही. गेल्या वर्षी हा विषय पुन्हा चर्चेला आला होता. मात्र, तत्कालीन आयुक्त तुकाराम मुंढे यांनी ही फाइल बाजूला सारल्याचे अधिकाऱ्यांचे म्हणणे आहे. या कामाचे टेंडर निघाले असून, त्याची मुदत जानेवारी २०१९ होती. मात्र, ज्यांना काम दिले आहे त्यांनी अद्याप याबाबतचा अहवाल दिलेला नाही.

--

डागडुजीकडेही दुर्लक्ष

होळकर पुलाच्या सुरक्षेकडे दुर्लक्ष होत असतानाच देवळालीगावातील पुलाबाबतही तशीच स्थिती आहे. या ठिकाणी सिंहस्थाच्या काळात नवीन पूल बांधण्यात आला. मात्र, जुन्या पुलाची साधी डागडुजी करण्याचे कामही महापालिकेने केले नाही. या पुलाच्या खालच्या भागातदेखील मोठ्या प्रमाणात वनस्पती उगवल्या आहेत. खांबांमध्ये झाडे उगवली आहेत. मात्र, अद्याप या पुलाचे स्ट्रक्चरल ऑडिटच झालेले नाही. महापालिकेने या पुलांचे स्ट्रक्चरल ऑडिट करावे व पुलांची दुरुस्ती करावी, अशी मागणी होत आहे.

नाशिक : केंद्र व राज्य सरकारने राज्यातील सर्व महापालिकांना पोलिओ लसीकरणाचे उद्दिष्टे ठरवून दिले होते. त्यानुसार नाशिक महापालिकेने मोहीम राबवित उद्दिष्टापेक्षा जास्त बालकांना लसीकरण केले आहे. महापालिकेला १ लाख ८२ हजार ५९६ बालकांना लसीकरणाचे उद्दिष्टे देण्यात आले होते. हे उद्दिष्टे महापालिकेने साध्य केले. शहरात एकूण १ लाख ८४ हजार ३९६ बालकांना लसीकरण करण्यात आले. त्यामुळे दिलेल्या उद्दिष्टापेक्षा अधिक लसीकरण झाले असल्याची माहिती महापालिकेचे आरोग्यधिकारी डॉ. राहुल गायकवाड यांनी दिली.

'अक्षरमानव'तर्फे अनोख्या कार्यक्रमाचे आयोजन

म. टा. प्रतिनिधी, नाशिक

अक्षरमानव नाशिक शाखेच्या वतीने 'मी, माझा छंद आणि आनंद' या अनोख्या कार्यक्रमाचे आयोजन केले होते. विरंगुळा म्हणून कित्येकजण एखादा तरी छंद जोपासतात, छंद असलेली व्यक्ती या वेडापायी कसेही आणि कुठेही पोहोचतात, त्यासाठी काय उलटसुलट प्रयोग करतात हे जाणून घेण्यासाठी हा कार्यक्रम होता.

कार्यक्रमाच्या सुरुवातीला अक्षर मानवच्या शहर उपाध्यक्ष नरेंद्र सोनवणे यांनी अक्षर मानव संस्थेची ओळख करून दिली व शहर अध्यक्षा मेघा मनोहर यांनी वर्षभरातील व महाराष्ट्र भर घेत असलेल्या वेगवेगळ्या उपक्रमांची माहिती दिली. कार्यक्रमाचे प्रमुख वक्ते प्रसाद देशपांडे यांनी ओळख करून देताना आजपर्यंतचे जीवन उलगडून सांगितले. छंदाची सुरुवात कशी झाली हे सांगताना ते म्हणाले, की लहानपणी कुसुमाग्रजांची पुस्तके वाचून झाल्यावर त्यांना अभिप्राय लिहायचे मग त्यांची उत्तरे यायची व खाली सही असायची आणि ती सही पाहून ऑटोग्राफ गोळा करायचा छंद जुळला. हळू हळू इतर लेखकांच्या सह्या गोळा करू लागले, कधी लोक सह्या देत, कधी देत नव्हते, खूप पाठपुरावा करून, रांगेत उभे राहून, सहनशक्ती प्रबळ करून ऑटोग्राफ घेण्याचा छंद सुटेनास झाला आणि त्यात आनंद मिळू लागला, असे ते म्हणाले. पुढे जाऊन कलाकारांच्या व इतर क्षेत्रातील व्यक्तीचे ऑटोग्राफ घेऊ लागले. असा निरंतर प्रवास सुरू असताना अनेकदा नकार मिळाले. पण न खचता मार्ग काढत हा छंद आजपर्यंत सुरूच ठेवला. सध्याचे दिग्गज व्यक्तिमत्व शरद पवार यांचीदेखील सही घेतल्याचं त्यांनी नमूद केलं.

कार्यक्रमाला वैशाली मुठे, स्नेहा आपटे, वासंती देशपांडे, उर्मिला ठाकूर, साहेबराव देशपांडे, सुलभा देशपांडे, सतीश जोशी, डॉ. मुरलीधर भावसार, विनोद बोधले, रवींद्र वामनाचार्य, नितीन केकाण, सुधीर कुलकर्णी, भाग्यश्री गुजर, प्रांजल आणि स्वरा सोनावणे, अनिता सोनवणे यांनी छंदावरील गप्पांमध्ये भाग घेतला. संस्थेचे शहर उपाध्यक्ष नरेंद्र सोनवणे यांनी उपस्थितांचे आभार मानले.

लोगो : कल्चर वार्ता

म. टा. प्रतिनिधी, नाशिक

शहरातील कै. के.एन.डी.बहुउद्देशीय मंडळ आणि क्रीडा साधना यांच्या वतीने अंबड पोलिस स्टेशनजवळील महेश भवन येथे उत्तर महाराष्ट्र क्रीडारत्न शिक्षक पुरस्कार सोहळा शनिवारी (दि. १६) सायंकाळी साडेचार वाजता होणार आहे.

कार्यक्रमात उत्तर महाराष्ट्रातील अहमदनगर, धुळे, जळगाव, नंदुरबार आणि नाशिकमधील ७४ तालुक्यांमधील उत्कृष्ट कार्य करणारे १०४ क्रीडा शिक्षक आणि २६ क्रीडा प्रशिक्षक यांचा गौरव करण्यात येणार आहे. या कार्यक्रमासाठी प्रमुख पाहुणे म्हणून महाराष्ट्र इंजिनीरिंग रिसर्च इन्स्टिट्यूट (मेरी) चे कार्यकारी अभियंता संतोष भोसले, नाशिक विभागाचे क्रीडा उपसंचालक डॉ. जयप्रकाश दुबळे, नाशिकचे जिल्हा क्रीडा अधिकारी रवींद्र नाईक, माजी मुख्याध्यापक तथा कुस्ती संघटक रवींद्र मोरे, ज्येष्ठ शिक्षक नेते शिवाजी निरगुडे आदी मान्यवरांच्या हस्ते या गुणवत्ताधारक क्रीडा शिक्षक आणि क्रीडा प्रशिक्षक याना सन्मानित करण्यात येणार आहे. या कार्यक्रमाला नाशिकच्या क्रीडाप्रेमीनी आणि हितचिंतकानी उपस्थित राहून या कार्यक्रमाची शोभा वाढवावी, असे आवाहन संयोजक अशोक दुधारे, दीपक निकम, आनंद खरे, नितीन हिंगमीरे आणि कार्यकर्त्यांनी केले आहे.

म. टा. खास प्रतिनिधी, नाशिक

शहरात गुरूवारी (दि.१४) वेगवेगळ्या ठिकाणी तिघांनी गळफास लावून घेत आत्महत्या केल्या. मृतांच्या आत्महत्येचे कारण स्पष्ट होऊ शकले नाही. या प्रकरणी इंदिरानगर, नाशिकरोड आणि पंचवटी पोलिस ठाण्यात आकस्मात मृत्यूची नोंद करण्यात आली आहे.

दत्तनगर भागात राहणाऱ्या पोपट सुखदेव भोये (वय ३५) या तरुणाने गुरुवारी (दि. १४) विल्होळी शिवारातील एकनाथ भावनाथ यांच्या शेतातील बाभळीच्या झाडास गळफास लावून आत्महत्या केली. ही घटना दुपारी चारच्या सुमारास उघडकीस आली. मृत्याच्या आत्महत्येचे कारण स्पष्ट होऊ शकले नाही. या प्रकरणी इंदिरानगर पोलिस ठाण्यात आकस्मात मृत्यूची नोंद करण्यात आली असून अधिक तपास हवालदार चव्हाण करीत आहेत.

दुसरी घटना जेलरोड भागात उघडकीस आली. संतोष अशोक निकम (वय ४७, रा.ओम रेसि. पवारवाडी, मोरेमळा) यांनी गुरुवारी (दि. १४) आपल्या घरात अज्ञात कारणातून पंख्यास ओढणी बांधून गळफास लावून आत्महत्या केली. याप्रकरणी नाशिकरोड पोलिसात मृत्यूची नोंद करण्यात आली असून, अधिक तपास एएसआय कदम करीत आहेत. तर पंकज राजू माने (वय २०, रा. शनि मंदिरामागे, रामगार्डन) या तरुणाने गुरुवारी (दि. १४) अज्ञात कारणातून आपल्या घरातील छताला साडी बांधून गळफास लावून घेतला होता. ही बाब लक्षात येताच कुटुंबीयांनी त्यास जिल्हा रुग्णालयात दाखल केले. मात्र, डॉक्टरांनी तपासून मृत घोषित केले. या प्रकरणी पंचवटी पोलिस ठाण्यात आकस्मात मृत्यूची नोंद करण्यात आली. अधिक तपास हवालदार ढुमसे करीत आहेत.

१७ मार्च

जयदत्त होळकर

संचालक, लासलगाव कृउबा

सावळीराम तिदमे

लेखक

समीर बोंदार्डे

ज्येष्ठ छायाचित्रकार

अविनाश गायकवाड

उद्योजक

वैजयंती डांगे

लेखिका

म. टा. प्रतिनिधी, नाशिक\B

\B'आयडिया'ची सेवा शनिवारी चांगलीच फसली. यामुळे मोबाइलच्या भरवशावर असलेल्या ग्राहकांना नाहक मनस्ताप सहन करावा लागला. केवळ तांत्रिक अडचणींमुळे सकाळी दहाच्या सुमारास फेल झालेले नेटवर्क तीन ते साडेतीन तासांनंतर दुपारी दीड वाजेच्या सुमारास सुरू झाले. त्यानंतर आयडिया ग्राहकांचा एकमेकांसोबत संपर्क सुरू झाला.

रोजच्या जगण्याचा भाग बनलेल्या मोबाइलची विश्वासार्हता एवढी वाढलीय की, प्रत्येक गोष्ट अलीकडे मोबाइलच्या भरवश्यावर पुढे ढकलण्याची सवय अंगवळणी पडलीय. प्रत्येक क्षणाला सोबत असणारे नेटवर्क नेमक्या महत्त्वाच्या वेळेला डाऊन झाले की तारांबळ उडते. याचा अनुभव शनिवारी (१६ मार्च) सकाळी १० ते दुपारी १.३० या वेळेत नाशिकच्या आयडिया ग्राहकांनी घेतला. त्यामुळे सर्वसामान्य ग्राहकांना मनस्ताप सहन करावा लागला. फोन कॉल्सची सेवा पूर्णत: ठप्प झाल्याने 'नो आयडिया सर जी' म्हणण्याची वेळ ग्राहकांवर आली. लँडलाइन अथवा अन्य नेटवर्कवरून आयडियाच्या क्रमांकावर फोन केल्यावर 'तुम्ही डायल केलेल्या नेटवर्कमध्ये कंजेशन असल्यामुळे आपला कॉल जोडला जाऊ शकत नाही', असे सांगण्यात येत होते. तर, आयडिच्या क्रमांकावरून इतर कंपन्यांच्या क्रमांकावर संपर्क होत नव्हता. त्याचे पडसाद व्हॉट्सअॅप व फेसबुकवरही पहायला मिळाले. कॉल्सची सुविधा ठप्प झाल्याने ग्राहकांनी त्या संबंधित पोस्ट शेअर केल्या. दुपारी दीड वाजेच्या दरम्यान कॉल्स जोडले जाऊ लागले. त्यानंतर काही तरी चुकल्याच्या मानसिकतेत असलेले ग्राहकही 'रेंज'मध्ये आले.

...

\Bम्हणे, रिचार्ज संपला...

\B आयडिया कंपनीच्या ग्राहकांचे कॉल्स जोडले जात नसल्याने ग्राहकांनी कस्टमर केअरशी संपर्क साधला. त्यावेळी 'तुमचा रिचार्ज संपला असेल किंवा तुम्ही बिल उशिराने भरले असेल. नेमका काय तांत्रिक गोंधळ आहे तो बघून तुमची सेवा पूर्ववत करतो', असे उत्तर ग्राहकांना देण्यात आले. काही ग्राहकांनी संपूर्ण नाशिकमध्येच सेवा ठप्प असल्याचे सांगितल्यावर 'तांत्रिक अडचण आहे. काही तासांत सेवा सुरळीत होईल', असे आयडियातर्फे सांगण्यात आले.