म. टा. प्रतिनिधी, नाशिक
कल्पकतेने रचलेल्या गोवऱ्या, मध्यभागी ऊस, एरंडाच्या डहाळीला खोबऱ्याच्या वाट्यांचे बांधलेले तोरण, होळीची पूजा व होळी पेटल्यानंतरचा जल्लोष अशा उत्साहपूर्ण वातावरणात शहरात गुरुवारी होळी सण पारंपरिक पद्धतीने साजरा करण्यात आला.
भारतीय परंपरेनुसार फाल्गुन पौर्णिमा अर्थात हुताशनी पौर्णिमेनिमित्त देशभरात होळी सण साजरा केला जातो. सकाळपासून शहरातील चौकाचौकांमध्ये होळीची तयारी करण्यात आली. शहरातील पंचवटी, रामकुंड, सिडको, म्हसरूळ, नाशिकरोड, गंगापुर रोडी, कॉलेज रोड सातपूर, अशोक स्तंभ, जुने नाशिक अशा विविध भागांत होळीनिमित्त मोठ-मोठ्या होळ्या रचण्यात आल्या. यानिमित्त विविध ठिकाणी आकर्षक रंगानी गोवऱ्या सजवण्यात आल्या. त्यात लहान मुलांपासून ज्येष्ठांपर्यंत सर्वांनी उत्साहपूर्ण वातावरणात होळी सण साजरा केला. काही ठिकाणी पर्यावरण प्रेमींनी प्रतिकात्मक होळीचे आयोजन करत पर्यावरण बचावचा संदेश दिला.
पंचवटी, दहीपुल, सिडको, सातपुर, नाशिक रोड अशा विविध ठिकाणी होळीसाठी लागणारे साहित्य, गोवऱ्यांच्या खरेदीसाठी बुधवारपासूनच नागरिक व विविध परिसरातील तरुणांनी गर्दी झाली होती. दहिपुल जवळील पटांगणात आदिवासी भागातून खास होळीसाठी गोवऱ्या विक्रीसाठी उपलब्ध होत्या. याठिकाणी टेम्पो, ट्रक, जीपमधून आणलेल्या गोवऱ्यांची ने आण दिवसभर चालू होती.
शहरांतील विविध भागांतील वखारींमध्ये होळीसाठी लागणारी लाकडे खरेदीसाठी गर्दी झाली होती. शहरातील विविध भागांत मोठ्या प्रमाणावर होळ्या पेटवण्यात आल्या. यामध्ये बाळगोपालांचा उत्साह मोठ्याप्रमाणावर दिसून आला. शहारातील विविध भागांतील सोसायटीमध्ये छोट्या स्वरुपात होळी पेटवण्यात आली.
अशीही होळी.....
सामाजिक वनीकरण विभागाच्या वतीने होळी निमित्त गोल्फ क्लब येथे सकाळी ७ वाजता रोप वाटपांचा कार्यक्रम राबवला. करंज, बेल, अडुळसा, आपटा, कांचन, पुत्रंजीवा, कैलासपती, गुलमोहर, अशोका आदी रोपांचे वाटप यावेळी करण्यात आले.
मोबाइल अॅप डाउनलोड करा आणि राहा अपडेट
