राज्यभरात धुळवडीच्या दिवशीच रंग खेळण्याची परंपरा असताना शहरात मात्र पारंपरिक पद्धतीने रंगोत्सव उत्साहाने साजरा झाला. मागील वर्षीच्या तुलनेत यावर्षी पाण्याचा साठा मुबलक असल्याने नागरिकांनी मुक्तपणे रंगांची उधळण केली. सामाजिक संघटनांनी केलेल्या आव्हानाला प्रतिसाद देत काही ठिकाणी कोरडी रंगपंचमीही साजरी करण्यात आली.
दरवर्षीप्रमाणे शहरातील रहाडीवर देखील अबालवृध्दांनी गर्दी केली होती. दुपारच्या सुमारास रहाडीच्या मानकऱ्यांच्या हस्ते विधीवत पूजन करून रंग खेळायला सुरुवात झाली. पंचवटीच्या शनिचौकातील रहाडीचा मान रास्ते आखाडा तालीम संघाला, गाडगे महाराज पुलाजवळील रहाडीचा मान रोकडोबा तालीम संघाला तर तिवंध्यातील रहाडीचा मान मधली होळी तालीम संघाला असल्याने पदाधिकाऱ्यांनी पूजन करुन रंग खेळण्यास सुरुवात केली.
बुधवारी दुपारी १२ वाजल्यापासूनच अनेक तरुण, चिमुकले घराच्या बाहेर रंग खेळण्यासाठी पडले होते. यात मुली व महिलाही मागे नव्हत्या. कमी पाण्याचा वापर करीत कशा पद्धतीने या सणाचा आनंद घेता येईल, याचा प्रयत्न केला जात होता. एकमेकांना घराच्या बाहेर काढत रंग लावत हा सण साजरा करण्यात आला. शहरातील चौका चौकात तरुणाई चित्रपटातील गाण्यावर जल्लोष करीत या सणाच्या उत्साहात अधिक भर घालत होते. पिचकाऱ्यांच्या साह्याने एकमेकांच्या अंगावर रंग टाकण्यात हे चिमुकले दंग झाले होते.
पंचवटी कारंजा, रविवार कारंजा अशोकस्तंभ, मेहेर महात्मागांधी रोड, मेनरोड परिसरात मोठ्या धुमधडाक्यात सादर करण्यात आली. काही सोसायट्यांमध्ये पाण्याचा वापर न करता कोरडा रंग खेळण्यात आला. परंतु, काही ठिकाणी मात्र कशाचीही तमा न बाळगता यथेच्छा पाणी खेळण्यात आले, संध्याकाळी रामकुंड, घारपुरे घाट, येथे नागरिकांनी आंघोळीसाठी गर्दी केली होती. नदीचे पाणी लाल झाले होते. यानंतर श्रमपरिहार म्हणून भेळभत्ता व पाववड्यांवर ताव मारतांना मंडळी दिसत होती. भद्रकाली येथील शिवसेवा मित्रमंडळाच्यावतीने मोठ्या धुमधडाक्यात रंगपंचमी साजरी करण्यात आली. येथे पारंपारिक पावडरच्या रंगाबरोबरच पाण्याचाही वापर करण्यात आला. डीजेच्या तालावर तरुणाई बेधुंद होऊन नाचत होती. महिलांसाठी विशेष व्यवस्था करण्यात आली होती.
सेलिब्रेटींनीही केली रंगांची उधळण
नाशिकच्या कलाकारांनी परशुराम साईखेडकर नाट्यगृहाबाहेर येत रंगपंचमी साजरी करण्याचा पायंडाच पडला आहे. नेहमीच मुंबई-पुणे चमकवणारे, मूळ नाशिकचे असलेले सर्व कलाकार रंगपंचमीच्या दिवशी एकत्र जमतात. 'पसा'च्या बाहेर काही खेळ होतात. गाणी लावून त्यावर डान्स केला जातो. ही परंपरा यंदाही जपत नाशिकच्या कलाकारांनी रंगपंचमीचा उत्सव मोठ्या आनंदाने साजरा केला. रंगपंचमी साजरी करण्यासाठी आनंद ढाकिफळे, मोहन उपासनी, विद्या करंजीकर, दीपक करंजीकर, जयेश आपटे, पंकज क्षेमकल्याणी, आनंद क्षेमकल्याणी, विनोद राठोड, सुभाष दसककर, संजय गिते, विनायक रानडे, सुजीत काळे, सुमुखी अथनी, भूषण मटकरी, अमोल पाळेकर, ईश्वर जगताप, पल्लवी पटवर्धन, प्रमोद भडकमकर यांनी सहभाग घेतला.
मोबाइल अॅप डाउनलोड करा आणि राहा अपडेट
