सभापती निवडीचा प्रस्ताव आयुक्तांकडे

March 13, 2015, 11:59 am

≪ Previous: पर्यटन वाढीसाठी सर्व्हेक्षण गरजेचे

म.टा.खास प्रतिनिधी,नाशिक

महापालिका स्थायी समितीच्या सभापती निवडीच्या प्रक्रियेला वेग आला असून, शुक्रवारी आयुक्तांकडून विभागीय आयुक्तांकडे निवडणूक प्रक्रिया राबविण्यासंदर्भातील प्रस्ताव रवाना झाला आहे. त्यामुळे २२ मार्चनंतर निवडणुुकीला मुहूर्त लागण्याची शक्यता आहे.

नगरसचिवांकडून शुक्रवारी विभागीय आयुक्तांकडे निवडणूक प्रक्रिया राबविण्यासंदर्भातील प्रस्ताव पाठविण्यात आला. समितीच्या १६ सदस्यांची निवड प्रक्रिया पार पडली असून, सभापतींची निवड घोषित करण्याची मागणी केली आहे. त्यामुळे आयुक्तांकडून सोमवारी किंवा मंगळवारी निवडणूक तारीख घोषित होण्याची शक्यता आहे. निवडणुकीसाठी कमीत कमी सात दिवसांचा कालावधी लागत असल्याने २२ तारखेनंतरची तारीख घोषित होण्याची शक्यता आहे.

दरम्यान, स्थायीचा प्रस्ताव गेल्यानंतर राजकीय पक्षांनीही रणनीती आखायला सुरुवात केली आहे. मनसे, राष्ट्रवादी, शिवसेना, भाजपसह अपक्षांनीही उडी घेतली आहे. विशेषतः स्थायीत महिला उमेदवारांची संख्या १६ पैकी १० झाल्याने महिला सभापतीसाठीही प्रयत्न सुरू झाले आहेत. इच्छुकांनी सदस्यांना चाचपणीची मोहीम सुरू केली असून, मनसे आणि राष्ट्रवादीच्या वादात आता भाजपनेही उतरण्याची तयारी सुरू केली आहे. मनसेचे माजी पदाधिकारी व सध्या भाजपवासी झालेल्या माजी आमदार वसंत गिते यांनी भाजपचा सभापती होण्यासाठी आपल्या सर्वपक्षीय मैत्रीचा वापर करायला सुरुवात केली अाहे. मनसेला शह देवून भाजपमध्ये आपली ताकद वाढवण्यासाठी गिते प्रयत्नशील असल्याची चर्चा आहे.

Latest Images