म. टा. वृत्तसेवा, दिंडोरी
कधी मारुती मंदिरात, कधी गोठ्यात, पडक्या घरात, पत्र्याच्या शेडमध्ये, गोदामात तर कधी उघड्यावर झाडाच्या सावलीत शाळा सुरू राहिली. निगडोळ गावातील सर्व मालसाने परिवारांनी एकत्र येत शिक्षकांच्या जेवणासह शालेय साहित्य पुरविण्याचे काम केले. मात्र, शाळेच्या जागेसाठी तब्बल बावीस वर्षे संघर्ष करावा लागला. अथक प्रयत्नांनंतर आज शरदराव पवार माध्यमिक शाळेला नवी व हक्कीची इमारत मिळाली आहे. ग्रामस्थांनी लोकवर्गणी जमा करून शाळेच्या इमारतीसाठी हातभार लावला.
दिंडोरी तालुक्यातील निगडोळ या आदिवासी बहुल भागात मुलींच्या शिक्षणासाठी सातवीनंतर विशेषतः खुल्या वर्गातील विद्यार्थ्यांसाठी शिक्षणाची सोय नव्हती. अशा परिस्थितीत निगडोळ येथील बबनराव मालसाने यांनी गावकऱ्यांच्या सहभागातून ९ जून १९९२ ला माध्यमिक शाळा सुरू केली. या शाळेमुळे परिसरातील वाघाड, उमराळे, नळवाडी, नळवाडपाडा, पिंपळगाव धूम या भागातील विद्यार्थ्यांना शिक्षणाची सुविधा उपलब्ध झाली. तत्कालीन मुख्यमंत्री शरद पवार यांचे शाळेला नाव देत राज्यातील अग्रणी रयत शिक्षण संस्थेशी शाळा संलग्न केली. मात्र, ही शाळा सुरुवातीपासूनच राजकारणाच्या फेऱ्यात अडकली.
या शाळेला गावकीची जागा मिळू न देण्याबरोबरच शाळाच सुरू राहू नये यासाठी मंजुरी मिळू नये, अनुदान मिळू नये यासाठी काहींनी जाणीवपूर्वक प्रयत्न केले. अनेक वेळा गावाने ठराव करून शाळेसाठी देवू केलेल्या जागेच्या प्रस्तावात अडथळे आणले गेले. कधी मारुती मंदिरात कधी गोठ्यात, तर कधी उघड्यावर झाडाच्या सावलीत शाळा सुरू राहिली. निगडोळ गावातील सर्व मालसाने परिवारांनी एकत्र येत शिक्षकांच्या जेवणासह शालेय साहित्य पुरविण्याचे काम केले. शेवटी गावाची जागा शासनाने शैक्षणिक संस्थेला देण्याचे बंद केल्यावर बबनराव मालसाने यांनी आपले बंधू दौलतराव यांना साकडे घालत त्यांची एक एकर जागा शाळेला दान देण्याची कल्पना सांगितली. दौलतराव मालसाने यांनी त्यास होकार दिला. शाळेला तब्बल बावीस वर्षांनी जागा मिळाली. संस्थेचे मॅनेजिंग कौन्सिलचे सदस्य अॅड. भगीरथ शिंदे यांना गावकऱ्यांना इमारतीच्या बांधकामसाठी तीस टक्के वाटा उचलण्याचे साकडे घतले. गावकऱ्यांनी एकीने लोकवर्गणी जमा करीत सुमारे दहा लाख निधी जमा केला. संस्थेच्या मदतीने या शाळेची इमारत उभी राहिली. या शाळा उभारणीच्या बबनराव मालसाने यांच्या संघर्षात त्यांना त्यांचे कुटुंबीय तसेच कादवाचे अध्यक्ष श्रीराम शेटे, आमदार नरहरी झिरवाळ, माजी आमदार रामदास चारोस्कर, धनराज महाले, शरद मालसाने यांच्यासह गावातील सर्व मालसाने परिवार तसेच संस्थेचे मॅनेजिंग कौन्सिलचे सदस्य अॅड. भगीरथ शिंदे, अॅड. एन. एम. आव्हाड, माजी सदस्य डी. एस. वडजे, भाई माळोदे, विभागीय अधिकारी बी. वाय. शिरसाठ यांच्यासह गेली तेवीस वर्ष संस्थेच्या विविध पदाधिकारी, पंचायत समितीचे सभापती, अधिकारी शाळेचे शिक्षक शिक्षकेतर कर्मचारी यांचे अनमोल सहकार्य लाभले.
निगडोळ येथील शरदरावजी पवार माध्यमिक विद्यालयाच्या नवीन इमारतीचे उद्घाटन उत्तर विभागीय सल्लागार समितीचे अध्यक्ष अरुण कडू पाटील यांच्या हस्ते झाले. यावेळी प्रमुख पाहुणे म्हणून मॅनेजिंग कौन्सिलचे सदस्य अॅड. भगीरथ शिंदे, कादवाचे अध्यक्ष श्रीराम शेटे, अॅड एन. एम. आव्हाड, जिल्हा बँकेचे संचालक गणपतराव पाटील, पंचायत समिती सदस्य भास्कर भगरे, माजी सदस्य डी. एस. वडजे, भाई माळोदे, विभागीय अधिकारी बी. वाय. शिरसाठ, विश्वासराव देशमुख आदी उपस्थित होते.
आजही या परिसरातील अनेक विद्यार्थ्यांना अकरावी बारावीनंतर उच्च शिक्षणाची सोय उपलब्ध नसल्याने अनेकांना शिक्षण अर्धवट सोडावे लागते. अशा परिस्थितीत आता ही सोय येथे उपलब्ध करून देण्यासाठी प्रयत्न करणार आहे. - बबनराव मालसाने
मोबाइल अॅप डाउनलोड करा आणि राहा अपडेट