म. टा. खास प्रतिनिधी, नाशिक
सिंहस्थ कुंभमेळ्यासाठी तपोवनात उभारण्यात येत असलेल्या साधुग्रामच्या कामात किरकोळ त्रुटी असल्याची कबुली पालकमंत्री आणि कुंभमेळामंत्री गिरीश महाजन यांनी दिली आहे. कामातील त्रुटी तात्काळ दूर करण्याच्या सुचना अधिकाऱ्यांना दिल्या आहेत. दरम्यान, साधुग्रामचे काम पन्नास टक्के पूर्ण झाले असून, उर्वरीत काम वेळेत पूर्ण होईल असा दावा केला आहे.
कुंभमेळामंत्री गिरीश महाजन यांनी बुधवारी अधिकाऱ्यांसमवेत सिंहस्थ घाटासह साधुग्रामच्या कामांची पाहणी केली. यावेळी महापौर अशोक मुर्तडक, जिल्हाधिकारी दीपेन्द्रसिंह कुशवाह, आयुक्त डॉ. प्रवीण गेडाम यांच्यासह जलसंपदाचे अधिकारी उपस्थित होते. महाजन यांनी घाटकामांसह साधुग्राममध्ये उभारण्यात येत असलेल्या शौचालय, रस्ते, वाहतूक व्यवस्था, इलेक्ट्र‌िकल्स कामाची पाहणी केली. यावेळी माध्यमांशी बोलताना महाजन यांनी साधुग्रामच्या कामांमध्ये किरकोळ त्रुटी असल्याचे मान्य केले. साधुग्रामसाठी जुनेच पत्रे वापरण्यात येत असून, टॉयलेटची भांडेही छोटी वापरण्यात आली आहेत. सोबतच अनेक ठिकाणी खिळे लावण्यात आलेले नाहीत. त्यामुळे या कामातील त्रुटी तात्काळ दूर करण्याच्या सुचना त्यांनी अधिकाऱ्यांना दिल्याचे त्यांनी यावेळी सांगितले. साधुग्रामसह सिंहस्थाची कामे ही पन्नास टक्के पूर्ण झाली आहेत. उर्वरीत कामेही वेळेत पूर्ण होतील, असा दावा त्यांनी केला आहे. कामांचा दर्जाही राखण्यासाठी प्रयत्न केल जातील असेही त्यांनी यावेळी सांगीतले.
'रामवाडी ते होळकर पुल घाट बांधा'
घारपुरे घाटासमोरील होळकर पूल ते रामवाडी पुलापर्यंत जलसंपदा विभागाने गोदावरीचे प्रदूषण रोखण्यासाठी घाट बांधावा, अशी मागणी महापौर अशोक मुर्तडक यांनी केली आहे. घारपुरे घाटासमोरील जागेवर बांधकाम नसल्याने नागरिक या ठिकाणी कचरा नदीत टाकतात. त्यामुळे नदीचे प्रदूषण होते. त्यामुळे या ठिकाणी जलसंपदा विभागाने घाट बांधावा अशी विनंती त्यांनी केली. महापौरांची सुचना महाजन यांनी तत्त्वतः मान्य केली असून, जलसंपदाकडून हे घाट बांधू असे आश्वासन त्यांनी यावेळी दिले.
गुंडगिरी थांबवा
शहरातील वाढलेल्या गुन्हेगारी संदर्भात आपण पोलिस आयुक्तांशी रात्री दोन वाजता चर्चा केली असून, शहरातील गुंडगिरी थांबवण्याचे निर्देश दिल्याचे महाजन यांनी यावेळी सांगीतले. गुन्हेगारी ही प्रक्रिया सुरूच असते. कौटुंबीक कलह व भानगडींमुळे गुन्हे होतच राहतात. मात्र टोळीयुद्धासारखे प्रकार खपवून घेणार नाही. गुन्हेगांरावर कडक कारवाई करण्याचे निर्देश आपण पोलिस आयुक्तांना दिल्याचे महाजन यांनी यावेळी सांगीतले.
जिल्हाधिकाऱ्यांचे आदेश
सिंहस्थाच्या पार्श्वभूमीवर बनविण्यात येणारे नदीघाट, रस्ते ही कामे पावसात अडकली तर अडचणी वाढतील. ही कायमस्वरुपी होणारी मोठी कामे असून, दर्जा खालावू न देता ती पावसाळ्यापूर्वी लवकरात लवकर पूर्ण करा असे आदेश जिल्हाधिकाऱ्यांनी बुधवारी दिले. सिंहस्थाची आढावा बैठक जिल्हाधिकारी कार्यालयामध्ये दुपारी पार पडली. जिल्हाधिकारी दीपेन्द्रसिंह कुशवाह यांनी विविध विभागांकडून सुरू असलेल्या तयारीचा आढावा घेतला. मुदत संपूनही अद्याप कोणती कामे पूर्ण झाली नाहीत याची माहिती घेण्यात आली. त्यामध्ये प्रामुख्याने नदी घाटांची कामे, रस्त्यांची कामे पिछाडीवर असल्याचे कुशवाह यांच्या लक्षात आले. ही कामे तात्पुरत्या स्वरुपाची नाहीत. ती कायमस्वरुपी नागरिकांच्या सोईची असणार आहेत. जून महिन्यापासून पावसाला सुरूवात होते. ही कामे पावसात अडकून पडली तर त्यांचा दर्जा ढासळण्याची शक्यता आहे. म्हणूनच नदीघाटांवरील प्रलंबित कामे, शाहीमार्ग, शहरातील मुख्य तसेच अंतर्गत रस्ते ही तातडीने पूर्ण करावीत. या कामांची गुणवत्ता कायम राहील याची काळजी घ्यावी, असे आदेश जिल्हाधिकाऱ्यांनी दिले आहेत. विविध विभागांकडून सुरू असलेल्या अॅक्शन प्लॅनचाही आढावा या बैठकीत घेण्यात आला. सिंहस्थ काळात नाशिक तसेच त्र्यंबकेश्वर नगरीत दाखल होणाऱ्या साधूंना धान्य तसेच सिलेंडरची आवश्यकता भासणार आहे. २५ हजार सिलिंंडर तसेच मोठ्या प्रमाणावर गहू, साखर, तांदूळ व तत्सम धान्याची मागणी त्यांच्याकडून नोंदविण्यात आली आहे. शिधा तसेच सिलेंडर मिळावेत, मंजूर निधीपैकी काही निधी अजूनही मिळू शकलेला नाही. याकडे जिल्हाधिकाऱ्यांनी आज पालकमंत्र्यांचे लक्ष वेधले.
ट्युब लाइट खरेदी
महापालिकेच्या स्थायी समितीची सभा गुरूवारी सभापती शिवाजी चुंभळे यांच्या अध्यक्षतेखाली होत आहे. या सभेत सिंहस्थांच्या कामांसह स्ट्रीटलाईटसाठी ट्युब आणि बल्ब खरेदीचा ६० लाखांचा प्रस्ताव ठेवण्यात आला आहे. सोबतच सिंहस्थ कुंभमेळा अंतर्गत सव्वा कोटीची १८ वाहने खरेदीचा प्रस्तावही ठेवण्यात आला आहे. दरम्यान विद्युत विभागासाठी ३६ लाखाची हायड्रोलिक प्लॅटफार्म वाहने खरेदीचा प्रस्तावही आहे. या सभेत विविध विकासकामांचे तब्बल ६० विषय मंजूरीसाठी ठेवण्यात आले आहे. सिंहस्थांच्या कामांसह स्ट्रीटलाईटसाठी ट्युब आणि बल्ब खरेदीचा ६० लाखांचा प्रस्ताव ठेवण्यात आला असून, सोबतच सिंहस्थ कुंभमेळा अंतर्गत सव्वा कोटीची १८ वाहने खरेदीचा प्रस्तावही ठेवण्यात आला आहे. दरम्यान, विद्युत विभागासाठी ३६ लाखाची हायड्रोलिक प्लॅटफार्म वाहने खरेदीचा प्रस्तावही ठेवण्यात आला आहे. आरोग्य विभागासाठी कॉम्बीजेट मशीनची ४६ लाखाला खरेदी करणे, उद्यानांच्या देखभाल दुरूस्तीसाठी २१ लाख रुपयांची तरतूद करण्याचा प्रस्ताव ठेवण्यात आला आहे.
मोबाइल अॅप डाउनलोड करा आणि राहा अपडेट
