बिबट्याच्या वावराने रोकडोबावाडी परिसर भयग्रस्त
म. टा. प्रतिनिधी, नाशिकरोड
देवळाली गावाजवळील रोकडोबावाडी येथील डोबी मळ्यात वर्षभरात तिसऱ्यांदा बिबट्याला जेरबंद करण्यात आले आहे. येथे आणखी तीन बिबटे असल्याने नागरिक दिवसाही दहशतीखाली वावरत आहेत. कोणाची तरी भेदक नजर २४ तास रोखली असल्याचा आभास सर्वांना होत आहे.
रोकडोबावाडीजवळील डोबी मळा हे देवळालीगावचे शेवटचे टोक आहे. अडीचशे लोकांची येथे वस्ती आहे. शेतक-यांची जमीन १९३९ साली महायुद्धाच्या काळात लष्कराने ताब्यात घेतली. १९६५ मध्ये अल्पभूधारक झाल्यामुळे शेतकरी चारा, ऊस हीच पिके घेतात. शस्त्रसाठ्यासाठी ताब्यात घेतलेली जागा लष्कराने वापरलीच नाही. चार पाच किलोमीटरच्या या क्षेत्रात कोणीच जात नाही. येथे विपुल प्रमाणात वन्य प्राणी आढळतात. एकूण पंधरा एकर क्षेत्रात ऊस असल्याने बिबट्याला लपण्यास चांगली जागा आहे. शेजारीच वालदेवी नदी आहे. रोकडोबावाडी, देवळाली कॅम्प, बान्स स्कूल, पाथर्डी, भगूरपर्यंत बिबट्याचे साम्राज्य आहे.
त्रिशुळ, कु-डीचा आधार
डॉ. तुषार बुवा, एमडी करत असलेले नितीन बुवा, निलेश बुवा ऊस तोडायला गेले असता त्यांना शेतातून गुरगुरण्याचा आवाज आला. त्यांनी बैलजोडी तेथेच सोडून घर गाठलं. नंतर सगळ्यांनी एकत्र जाऊन सुतळी बाम्ब फोडून बिबट्याला पळून लावले व बैलांना आणले. लाठ्या-काठ्या नेऊ नका, बिबट्या जुमाननार नाही, शस्त्राला बिबट्या घाबरतो, असा सल्ला वनविभागाने दिला आहे. तेव्हापासून भाले, त्रिशूळ, कोयते, कु-हाडी घेऊनच शेतकरी शेतात जात आहेत. तीन बिबटे पकडले तरी बिबट्यांच्या डरकाळ्या आजही घुमत असतात, त्याची पावले शेतात उमटत असतात. त्यामुळे सायंकाळी किंवा पहाटे कोणी घराबाहेर पडत नाही. बिबट्याला टक्कर देण्यासाठी राटव्हिलर या खतरनाक जातीची टफी, स्विटी ही कुत्रे पाळल्याची माहिती निलेश बुवा यांनी दिली.
कुत्री, मोर झाले गायब
डोबी मळ्यातील कुत्री-मांजरं दोन वर्षांपासून गायब होऊ लागली. तीनशे चारशे मोर होते. तेही कमी झाल्याने नागरिक चक्रावून गेले. बिबट्याच्या फॅमिलीने त्यांचा फडशा पाडल्याचे समजल्यावर ते जाम हादरले. गोरखनाथ बुवा यांच्या चुलीच्या शेडमधून बिबट्याने कुत्र्याला उचलले. नातवांना बिबट्या कधी उचलेल याचा नेम नसल्याने वडिलधा-यांना दिवसरात्र त्यांच्यामागे काठी घेऊन फिरण्याची ड्युटी करावी लागते. शेतावर गेलेला कुंकवाचा धनी सुखरुप परत येऊ दे, अशी प्रार्थना घरातील बाई न चुकता करत असते.
बिनचाकाचा पिंजरा
बिबट्याला पकडण्यासाठी लोकांनी वनविभागाकडे पिंजरा मागितला. तो त्यांनी एकलहरे येथून स्वखर्चाने टेम्पोतून आणला. हा पिंजरा जळका व बिन चाकाचा होता. लष्करी जवानांच्या मदतीने तो उचलून आठ दिवस विविध ठिकाणी लोकांनी ठेवला. तेव्हा कुठं छोटा बिबट्या अडकला. लोकांनी घाबरतच पिंजरा उचलून ट्रकमध्ये चढवला. आणखी तीन बिबटे आहेत, तेव्हा चाकाचे पिंजरे द्या, अशी विनंती लोकांनी केली. परिमंडळ अधिकारी एम. एस. गोसावी यांनी ती मान्य केली आहे.
घरचं झालं थोडं...
परिसरात बिबट्याचा वावर सुरू असल्याने नागरिकांनी मोठ्या बॅट-या आणल्या आहेत. रात्री पथदीपांचा मोठा आधार होतो. परंतु, बाहेरुन गुंड वस्तीवर येतात. पथदीप फोडून अंधारात दारू पिऊन निघून जातात. महापालिकेने चांगल्या दर्जाचे व जाळ्या असलेले दिवे बसवावेत, पोलिसांनी गुंडाचा बंदोबस्त करावा, अशी मागणी नागरिकांनी केली आहे.
वनविभागाने बिबट्याचा कायमचा बंदोबस्त करुन आम्हाला दिलासा द्यावा. आमच्या पोराबाळांचं, जनावरांचं रक्षण करुन आर्शीवाद घ्यावेत. - शकुंतला बुवा
बिबट्यांना मारुन, पकडून ही समस्या सुटणार नाही. माणूसच त्यांच्या मुळावर उठला आहे. शासनाने माळरानावर जंगल करुन बिबट्यांची व्यवस्था करावी. - त्र्यंबकनाथ बुवा
मोबाइल अॅप डाउनलोड करा आणि राहा अपडेट
