निकालात निचांक कॉपीत उच्चांक

May 28, 2015, 12:11 pm

म. टा. प्रतिनिधी, नाशिक

बारावीच्या परीक्षेत नाशिक विभागाचा निकाल निचांकी लागला आहे तर नाशिक जिल्ह्यात सर्वाधिक कॉपीबहाद्दर असल्याचे आढळून आले आहे. नाशिक विभागातील एक लाख चाळीस हजार ८२४ विद्यार्थ्यांनी बारावीची परीक्षा दिली होती. त्यापैकी ८६ विद्यार्थी गैरमार्ग प्रकरणात प्रकरणे उघडकीस आले. त्यातील १५ विद्यार्थ्यांना चौकशीअंती दोषमुक्त करण्यात आले होते.

उर्वरित ७१ विद्यार्थ्यांना मंडळ शिक्षासूचीनुसार कारवाई करण्यात आली होती. त्यापैकी कॉपी करणाऱ्यांमध्ये ६२ विद्यार्थी पकडले गेले. नाशिक जिल्ह्यामध्ये ३०, धुळे जिल्ह्यात ०८, जळगाव जिल्ह्यात २४ व नंदूरबार जिल्ह्यात ०९ विद्यार्थ्यांचा समावेश या गैरमार्गी प्रकरणांमध्ये होता.

२०१२ साली कॉपीची ७९, २०१३ साली ४७, २०१४ मध्ये ३६ तर यावर्षी म्हणजेच २०१५ मध्ये ३० प्रकरणे प्राप्त झाली होती. या प्रक्रिया रोखण्यासाठी संपूर्ण राज्यासाठी एक नियोजनबद्ध व सर्व घटक समावेशक असा 'गैरमार्गाशी लढा' या अभियानाचा कृती कार्यक्रम या वर्षीदेखील मंडळाने राबविला होता. संपूर्ण महाराष्ट्रात एकसूत्रीपणा हे तत्त्व विचारात घेऊन याबाबत नियोजन करण्यात आले होते.

त्यामुळेच मागील वर्षांचा विचार करता यावर्षी झालेल्या कॉपी प्रकरणांना आळा घालण्यात या अभियानाला यश मिळाल्याचे दिसते. हे प्रकरणे टाळण्यासाठी स्थानिक दक्षता समिती व केंद्रस्तर, पालकसभा, विद्यार्थ्यांचे उदबोधन, प्रजासत्ताकदिनी प्रतिज्ञा करणे आदी उपक्रम संपूर्ण राज्यभरात राबविण्यात आले होते. त्यामुळे परीक्षेशी संबंधित घटकांच्या विशिष्ट वैचारिक मनोवृत्तीमध्ये सकारात्मक बदल होण्यास व परीक्षेतील गैरप्रकार कमी होण्यास मदत झाली असे मंडळाचे विभागीय अध्यक्ष दत्तात्रय जगताप यांनी सांगितले.

Latest Images