सिंहस्थ कुंभमेळ्यासाठी शहरात उभ्या केलेल्या पायाभूत सुविधा गुंडाळण्याचे काम पोलिस प्रशासनाने सुरू आहे. पोलिस चौक्या, वॉच टॉवर यासह बॅरिकेड इत्यादी वस्तूंचे वाटप युध्द पातळीवर सुरू असून राज्यातील वेगवेगळ्या पोलिस स्टेशनला हे साहित्य वितरित केले जात आहे.
सिंहस्थ कुंभमेळ्यासाठी राज्य पोलिस दलाकडून शहर आणि ग्रामीण पोलिसांसाठी कोट्यवधी रुपयांचे साहित्य देण्यात आले. यापैकी पक्के बॅरकेडींग, पोलिस चौक्या, वॉच टॉवर इत्यादी पायाभूत सुविधा पोलिस प्रशासनाने स्वतः खरेदी केल्यात. नाशिकमधील कुंभमेळ्याचे काम आटोपल्यानंतर हे साहित्य राज्याच्या वेगवेगळ्या भागात पोचविण्याचे काम युध्द पातळीवर सुरू आहे. पोलिस आयुक्तालय, महाराष्ट्र पोलिस अकादमी किंवा ग्रामीण पोलिस दलाकडून पोलिस महासंचालकांकडे या साहित्यासाठी सतत पाठपुरवा होत असतो. पोलिस महासंचालकांकडे येणाऱ्या एकूण मागणीपैंकी आवश्यक ठिकाणी सध्या साहित्य पाठवण्याचे काम सुरू असल्याची माहिती सूत्रांनी दिली. वॉच टॉवरसाठी मुंबई आणि पुणे येथील फोर्स वन आग्रही होते. त्यामुळे वॉच टॉवर फोर्सवनला देण्यात आले.
शहरात जवळपास २० पोलिस चौक्यांची आवश्यकता होती. त्या वगळता इतर पोलिस चौक्या राज्याच्या वेगवेगळ्या पोलिस स्टेशनला पाठवण्यात येत असून उर्वरित काम लवकरच मार्गी लागण्याची शक्यता आहे. शहर पोलिसांसाठी एक हजार बॅरकेडींग ठेवण्यात आले असून उर्वरीत १७ ते १८ हजार पक्के बॅरेकेडींग ट्रक तसेच रेल्वेद्वारे रवाना करण्यात येत आहे.
डिजिटल वायरलेस सेट रवाना
सिंहस्थ कुंभमेळ्यासाठी शहर पोलिसाना ६३४ डिजिटल वायरलेस सेट देण्यात आले होते. राज्यातील काही पोलिस आयुक्तालय आणि नाशिक ग्रामीणसह इतर ठिकाणी डिजीटल वायरलेस सेट वापरले जातात. नाशिक शहर पोलिसांकडे अद्याप अॅनालॉग पध्दतीचे वायरलेस सेट असल्याने सर्व डिजीटल वायरलेस सेट परत पाठवण्यात आल्याचे सूत्रांनी स्पष्ट केले.
पोलिस महासंचालक कार्यालयाकडून येणाऱ्या आदेशाप्रमाणे साहित्याचे वाटप केले जात आहे. काही पोलिस चौक्यांमधील वीज पुरवठा खंडीत करायचा असून तो झाल्यानंतर त्याही काढून घेण्यात येतील. साहित्याचे वितरण करण्यासाठी रस्त्यासह रेल्वे मार्गाचा वापर होतो आहे. शहर पोलिसांना आवश्यकतेनुसार साहित्य उपलब्ध आहे.
- पंकज डहाणे, पोलिस उपायुक्त
मोबाइल अॅप डाउनलोड करा आणि राहा अपडेट
