वेस्टर्न इंडिया फुटबॉल असोसिएशन, मुंबई आणि फुटबॉल असोसिएशन ऑफ नाशिक डिस्ट्रिक्ट, नाशिक यांच्या संयुक्त विद्यमाने पंचवटीतील विभागीय क्रीडा संकुलात सुरू असलेल्या १४ वर्षांआतील मुलांसाठी राज्यस्तरीय सबज्युनियर फुटबॉल स्पर्धेमध्ये मंगळवारी नाशिक संघाने उपांत्य फेरीत प्रवेश केला.
रविवारच्या विश्रांतीनंतर सोमवारी उपांत्यपूर्व फेरीच्या सामन्यांना सकाळी सुरुवात झाली. सकाळच्या सत्रात मुंबई विरुद्ध सातारा संघात झालेल्या पहिल्या उपांत्यपूर्व फेरीच्या सामन्यामध्ये मुंबईने दमदार खेळाचे प्रदर्शन करत, आतापर्यंत सातत्यपूर्ण कामगिरी करणाऱ्या सातारा संघाचा ८ विरुद्ध ० गोल फरकाने दणदणीत पराभव करून उपांत्य फेरीत प्रवेश केला.
दुसऱ्या उपांत्यपूर्व फेरीत नागपूर आणि जालना या दोन संघांत सामना रंगला, सामन्याच्या पहिल्या सत्रात दोन्ही संघांनी चांगला खेळ केला. नागपूर संघाने अखेर ३ विरुद्ध १ अशा गोल फरकाने सामना जिंकून उपांत्य फेरीत प्रवेश केला.
दुपारच्या सत्रात दुपारी १ वाजता गोंदिया व पुणे या संघांमध्ये झालेल्या सामन्यात पुणे संघाने १० विरुद्ध ० अशा मोठ्या फरकाने एकतर्फी विजय प्राप्त केला.
राज्य स्पर्धेत प्रथमच खेळत असलेल्या नाशिक व या स्पर्धेमध्ये सीडिंग मिळालेल्या अकोला संघांमध्ये अत्यंत चुरशीची लढत नाशिककरांना बघायला मिळाली, सामन्यांच्या निर्धारित वेळेत दोन्ही संघांनी प्रत्येकी दोन गोल करून सामना बरोबरीत राहिला, त्यानंतर झालेल्या टायब्रेकरमध्ये नाशिक संघाने ५ पैकी ३ गोल केले तर अकोला संघाचे आक्रमण नाशिकच्या गोल रक्षकाने थोपवून अकोला संघाला ५ पैकी फक्त २ गोल करण्याची संधी दिली. नाशिक संघाने हा सामना ५ विरुद्ध ४ गोलने जिंकून राज्यस्पर्धेच्या उपांत्य फेरीत दिमाखात प्रवेश केला. या सामन्यांच्या उपांत्य फेरीचे सामने मंगळवारी सकाळी १० वाजता मुंबई विरुद्ध नागपूर तर दुपारी १२ वाजता नाशिक विरुद्ध पुणे या संघांमध्ये रंगणार आहेत.
सामन्याचा निकाल खालीलप्रमाणे
सामना स्कोअर
मुंबई विरुद्ध सातारा मुंबई ८ विरुद्ध ० गोलने विजयी
नागपूर विरुद्ध जालना नागपूर ३ विरुद्ध १ गोलने विजयी
पुणे विरुद्ध गोंदिया पुणे १० विरुद्ध ० गोलने विजयी
नाशिक विरुद्ध अकोला नाशिक ५ विरुद्ध ४ गोलने विजयी
मोबाइल अॅप डाउनलोड करा आणि राहा अपडेट