म. टा. प्रतिनिधी, नाशिक
अरूंद रस्ते आणि त्यावर झालेले अतिक्रमण यामुळे चालकांना बस चालवणे मुश्किल झाले आहे. अगदी जीव मुठीत धरून बसचालक काम करतात. त्यात गुंड प्रवृत्तींकडून एसटी कर्मचाऱ्यांना त्रास दिला जातो. मंगळवारी तर प्राणघातक हल्ला झाला. यापुढे एसटी कर्मचाऱ्यांवर असा हल्ला झाला तर तत्काळ चक्काजाम आंदोलन छेडले जाईल. कर्मचाऱ्यांवरील अन्याय सहन केला जाणार नाही, असा इशारा महाराष्ट्र राज्य प्रादेशिक परिवहन महामंडळाच्या कर्मचाऱ्यांनी दिला.
पंचवटी डेपोतील सुरक्षारक्षक एस. एच. गाढवे आणि बसचालक नितीन जाधव यांच्यावर एका टोळक्याने सोमवारी रात्री साडेआठ वाजेच्या सुमारास धारदार शस्त्रांसह हल्ला चढवला. यात दोघे कर्मचारी गंभीर जखमी झाले. या हल्ल्याची घटना समजाताच एस.टी. कर्मचारी संघटनेने आंदोलनाचा पवित्रा घेतला. मात्र, पंचवटी पोलिस व लोकप्रतिनिधींच्या मध्यस्थीने हे आंदोलन मागे घेण्यात आले. एसटी कर्मचाऱ्यावर झालेल्या प्राणघातक हल्ल्याचे पडसाद मंगळवारी सकाळी पुन्हा उमटले. पंचवटी डेपोच्या कर्मचाऱ्यांनी आपल्या वरिष्ठ अधिकाऱ्यासह पंचवटी पोलिस स्टेशनवर मोर्चा काढला. हल्लेखोरांना कडक शासन झालेच पाहिजे, अशी मागणी त्यांनी केली. यावेळी एसटी महामंडळाचे जनरल मॅनेजर आर. आर. पाटील, रिजनल मॅनेजर मिलिंद बंड, जिल्हा व्यवस्थापक यामिनी जोशी, प्रमोद भालेकर, विजय पवार, सुभाष जाधव, शाम सांगळे, बाबा वाघचौर, योगेश लिंगायत, भूषण पाराशेर, गणेश बोडके, तुषार लाटकर यांच्यासह पंचवटी बस डेपोतील २०० ते २५० कर्मचारी हजर होते. संबंधित संशयितांना अटक करण्यात आली असून, त्यांच्याविरोधात जीवे मारण्याचा प्रयत्न, सरकारी कामात अडथळा आणणे तसेच दंगलीचा गुन्हा दाखल केला असल्याची माहिती वरिष्ठ पोलिस निरीक्षक प्रकाश सपकाळे यांनी दिली.
सकाळच्या सत्रात प्रवाशांचे हाल
महामंडळाच्या कर्मचाऱ्यांवर सोमवारी रात्री प्राणघातक हल्ला झाला. या घटनेचे पडसाद मंगळवारी सकाळी उमटले. सकाळच्या सुमारास डेपोचे अडीचशे ते तीनशे कर्मचारी डेपोमध्ये जमा झाले. तेथून त्यांनी पंचवटी पोलिस स्टेशनपर्यंत मोर्चा काढला. सर्वच कर्मचारी आंदोलनात गुंतल्याने पंचवटी डेपोतून सुटणाऱ्या बसेस उभ्या राहिल्यात. याचा परिणाम प्रवाशांना भोगावा लागला. सकाळाच्या सुमारास बस नसल्याने प्रवाशांची हाल झाली. दुपारी १ वाजेनंतर सर्व कर्मचारी डेपोत परतल्यानंतर शहरांतर्गत वाहतूक काही प्रमाणात सुरळीत झाली.
स्मार्ट सिटीमधून वाहतूक सुरळीत करा
एसटीचे आकारमान तुलनेत मोठे असते. बसचा टर्निंग रेडियस मोठा असून निमाणी, रविवार कारंजा, शालिमार, नाशिकरोडसह शहरातील इतर भागातील रस्ते तुलनेत अरूंद आहेत. त्यावर अतिक्रमणे असून, रिक्षाचालकही दमदाटी करतात. बसचालकाने पुढे जाण्याचा प्रयत्न केल्यास इतर वाहनचालक कट मारल्याचा आरोप करतात. वस्तुस्थिती मात्र भिन्न असते. गेल्या काही वर्षात वाहनांची संख्या प्रचंड वाढली असून, याचा ताण बसचालकांवर पडत आहे. यासाठी किमान बसस्थानकावरील अतिक्रमणे काढून रिक्षाचालकांना २०० मीटर परिसर सोडून जागा उपलब्ध करून देण्याची मागणी एसटीच्या अधिकाऱ्यांनी केली. स्मार्ट सिटी योजनेत याचा योग्य तो विचार व्हावा, यासाठी लवकरच पोलिस आयुक्त एस. जगन्नाथन, महापालिका आयुक्त प्रवीण गेडाम यांच्याशी संयुक्त बैठक घेण्याची मागणी एसटीच्या वरिष्ठ अधिकाऱ्यांनी केली.
मोबाइल अॅप डाउनलोड करा आणि राहा अपडेट
